(ສພຊ) ລະຫວ່າງວັນທີ 13-15 ທັນວາ 2021, ຄະນະຜູ້ແທນສະພາແຫ່ງຊາດລາວ ນຳໂດຍທ່ານ ສັນຍາ ປຣະເສີດ ປະທານກຳມາທິການການຕ່າງປະເທດ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມປະຈຳປີ ຂອງເວທີປຶກສາຫາລືລັດຖະສະພາອາຊີ-ປາຊີຟິກ (Asia-Pacific Parliamentary Forum (APPF)) ຄັ້ງທີ 29, ໃນຮູບແບບທາງໄກ ໂດຍແມ່ນ ສ.ເກົາຫລີ ເປັນເຈົ້າພາບ ໂດຍການເປັນປະທານຂອງທ່ານ ປັກ ບີຍ່ອງ ຊຶງ ປະທານສະພາແຫ່ງຊາດ ແຫ່ງ ສ.ເກົາຫລີ ເຊິ່ງມີຄະນະຜູ້ແທນ ຈໍານວນ 111 ທ່ານ ທີ່ມາຈາກ 20 ປະເທດ ໃນພາກພື້ນອາຊີ-ປາຊີຟິກ ເຂົ້າຮ່ວມ.
ກອງປະຊຸມຄັ້ງນີ້, ໄດ້ສຸມໃສ່ຄົ້ນຄວ້າ, ປຶກສາຫາລື ແລະ ແລກປ່ຽນຄວາມຄິດຄວາມເຫັນພາຍໃຕ້ຫົວຂໍ້: “ບົດບາດຂອງລັດຖະສະພາໃນການເພີ່ມທະວີຄວາມຢືດຍຸ່ນໃນຍຸກຫລັງໂຄວິດ-19” ໂດຍໄດ້ລົງເລິກປຶກສາຫາລືກັນກ່ຽວກັບບັນຫາການເມືອງ ແລະ ຄວາມໝັ້ນຄົງ, ເສດຖະກິດ ແລະ ການຄ້າ ແລະ ການຮ່ວມມືໃນພາກພື້ນອາຊີ-ປາຊີຟິກ ຕາມພາລະບົດບາດຂອງອົງການນິຕິບັນຍັດ.
ໃນການເຂົ້າຮ່ວມກອງປະຊຸມຄັ້ງນີ້, ທ່ານ ສັນຍາ ປຣະເສີດ ຫົວໜ້າຄະນະຜູ້ແທນລາວ ໄດ້ມີຄຳເຫັນຕໍ່ບັນຫາການເມືອງ ແລະ ຄວາມໝັ້ນຄົງ ໃນພາກພື້ນອາຊີ-ປາຊິຟິກ ເຊິ່ງທ່ານໄດ້ຍົກໃຫ້ເຫັນເຖິງສິ່ງທ້າທາຍຫລາຍດ້ານ ທີ່ສົ່ງຜົນກະທົບຕໍ່ສັນຕິພາບ ແລະ ຄວາມໝັ້ນຄົງໃນພາກພື້ນ ກໍຄືໃນໂລກ ເປັນຕົ້ນແມ່ນການແຜ່ລະບາດຂອງພະຍາດໂຄວິດ-19, ໄພພິບັດທາງທຳມະຊາດ, ການກໍ່ການຮ້າຍ ແລະ ບັນຫາອື່ນໆ. ພ້ອມດຽວກັນນັ້ນ, ທ່ານກໍໄດ້ຍົກໃຫ້ເຫັນເຖິງນະໂຍບາຍການຕ່າງປະເທດສັນຕິພາບ, ເອກະລາດ, ມິດຕະພາບ ແລະ ການຮ່ວມມື ຂອງ ສປປລາວ ແລະ ບົດບາດຂອງສະພາແຫ່ງຊາດລາວ ໃນນາມເປັນຕົວແທນແຫ່ງສິດ, ຜົນປະໂຫຍດ ແລະ ຄວາມມຸ່ງມາດປາຖະໜາຂອງປະຊາຊົນລາວບັນດາເຜົ່າ ເຊິ່ງເປັນການປະກອບສ່ວນທີ່ສຳຄັນເຂົ້າໃນການຄຸ້ມຄອງລັດຄຸ້ມຄອງສັງຄົມດ້ວຍລະບຽບກົດໝາຍ. ສະພາແຫ່ງຊາດລາວ ໄດ້ມີການຄົ້ນຄວ້າພິຈາລະນາໃຫ້ສັດຕະຍາບັນແກ່ສົນທິສັນຍາ ແລະ ສັນຍາສາກົນ ກ່ຽວກັບການຕ້ານອາຊະຍາກຳຂ້າມຊາດ, ການຄ້າມະນຸດ, ການຕ້ານການກໍ່ການຮ້າຍ, ການຕ້ານ ແລະ ສະກັດກັ້ນອາດຊະຍາກຳທາງຄອມພິວເຕີ, ການເກືອດຫ້າມອາວຸດນິວເຄຣຍ ແລະ ອື່ນໆ ເຊິ່ງໄດ້ປະກອບສ່ວນອັນສຳຄັນໃນການເສີມສ້າງສັນຕິພາບ, ຄວາມໝັ້ນຄົງ, ສະຖຽນລະພາບ ແລະ ການພັດທະນາແບບຍືນຍົງໃນພາກພື້ນ ແລະ ໃນໂລກ.
ທ່ານຍັງໄດ້ຮຽກຮ້ອງໃຫ້ບັນດາສະມາຊິກລັດຖະສະພາໃນພາກພື້ນອາຊີ-ປາຊີຟິກ ສືບຕໍ່ຮ່ວມມືກັນ ແລະ ເພີ່ມທະວີບົດບາດການເປັນຜູ້ນຳຂອງອົງການນິຕິບັນຍັດ ເຂົ້າໃນພາລະກິດເສີມສ້າງສັນຕິພາບ, ຄວາມໝັ້ນຄົງ ແລະ ຄວາມຈະເລີນຮຸ່ງເຮືອງຂອງພາກພື້ນ, ສ້າງຄວາມໄວ້ເນື້ອເຊື່ອໃຈ, ຮ່ວມມື ແລະ ຊ່ວຍເຫລືອເຊິ່ງກັນ ແລະ ກັນ ເພື່ອຮັບມືກັບສິ່ງທ້າທາຍ ແລະ ແກ້ໄຂບັນຫາຕ່າງຂອງພາກພື້ນ ແລະ ສາກົນ ດ້ວຍການເຈລະຈາ ແລະ ສັນຕິວິທີ. ນອກຈາກນັ້ນ, ຄະນະຜູ້ແທນສະພາແຫ່ງຊາດລາວ ຍັງໄດ້ເຂົ້າຮ່ວມກອງປະຊຸມກ່ຽວກັບຂົງເຂດເສດຖະກິດ-ການຄ້າ ແລະ ການຮ່ວມມືໃນພາກພື້ນອາຊີ-ປາຊີຟິກ ໂດຍໄດ້ຍົກໃຫ້ເຫັນເຖິງນະໂຍບາຍການຟື້ນຟູເສດຖະກິດ ໃນຍຸກໂຄວິດ-19 ຂອງ ສປປລາວ ເຊິ່ງໄດ້ເຊື່ອມສານເປົ້າໝາຍການພັດທະນາແບບຍືນຍົງ ເຂົ້າໃນແຜນພັດທະນາເສດຖະກິດ-ສັງຄົມແຫ່ງຊາດ, ການຮັບຮອງເອົາຍຸດທະສາດການພັດທະນາເສດຖະກິດດີຈີຕອນ ແຫ່ງຊາດ 2021-2030 ແລະ ແຜນພັດທະນາເສດຖະກິດດີຈີຕອນ ແຫ່ງຊາດ 2021-2025 ພ້ອມທັງຊຸກຍູ້ສົ່ງເສີມຈຸລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ, ການເປີດນຳໃຊ້ທາງລົດໄຟຄວາມໄວສູງລາວ-ຈີນ ແລະ ການຫັນສັງຄົມເຂົ້າສູ່ວິຖີການໃຊ້ຊີວິດປົກກະຕິແບບໃໝ່. ພ້ອມນີ້, ຍັງໄດ້ເນັ້ນກ່ຽວກັບການຮ່ວມມືທາງດ້ານເສດຖະກິດ-ການຄ້າ ການລົງທຶນໃນ ສປປລາວ ແລະ ຮຽກຮ້ອງໃຫ້ບັນດາລັດຖະສະພາສະມາຊິກ APPF ຊຸກຍູ້ການລົງທຶນໃນການຜະລິດພະລັງງານສະອາດ, ການຜະລິດສະບຽງອາຫານ ເພື່ອຫລຸດຜ່ອນຄວາມທຸກຍາກຂອງປະຊາຊົນ ແລະ ພ້ອມກັນບັນລຸເປົ້າໝາຍການພັດທະນາແບບຍືນຍົງ ໃນຕໍ່ໜ້າ.
ໃນຕອນທ້າຍຂອງກອງປະຊຸມ ຄະນະຜູ້ແທນທີ່ເຂົ້າຮ່ວມໄດ້ຄົ້ນຄວ້າ, ພິຈາລະນາ ແລະ ຮັບຮອງເອົາມະຕິທີ່ປີ່ນອ້ອມຫົວຂໍ້ຕ່າງໆກອງປະຊຸມ ຈຳນວນ 13 ສະບັບ ພ້ອມທັງພິຈາລະນາຮັບຮອງເອົາຖະແຫລງການຮ່ວມຂອງກອງປະຊຸມ APPF ຄັ້ງທີ 29 ແລະ ຕົກລົງເຫັນດີໃຫ້ລັດຖະສະພາ ແຫ່ງ ຣາຊະອານາຈັກໄທ ເປັນເຈົ້າພາບຈັດກອງປະຊຸມ APPF ຄັ້ງທີ 30 ໃນປີ 2022.
(ພາບ ແລະຂ່າວ: ສອນສັກ ວັນວິໄຊ)