(ສພຊ) – ເພື່ອສະຫຼຸບຕີລາຄາການເຄື່ອນໄຫວວຽກງານກວດກາຂອງຄະນະກວດກາພັກ-ລັດ ສະພາແຫ່ງຊາດ (ສພຊ) ປະຈຳປີ 2023 ແລະ ກຳນົດທິດທາງແຜນການປະຈຳປີ 2024; ເພື່ອເຮັດໃຫ້ຄະນະພັກຮາກຖານ, ຄະນະໜ່ວຍພັກ, ສະມາຊິກພັກ, ພະນັກງານ-ລັດຖະກອນ ພາຍໃນ ສພຊ ໄດ້ມີຄວາມຮັບຮູ້, ເຂົ້າໃຈ ແລະ ກຳແໜ້ນເນື້ອໃນວຽກງານກວດກາ, ຫັນມາເປັນແຜນວຽກຂອງຕົນ ແລະ ຈັດຕັ້ງປະຕິບັດວຽກງານຕົວຈິງໃນແຕ່ລະໄລຍະ, ຮັບປະກັນບົດບາດອິດທິພົນໃນການນໍາພາຂອງພັກ ແລະ ການຄຸ້ມຄອງຂອງລັດ ແນໃສ່ເຮັດໃຫ້ວຽກງານກວດກາມີບາດກ້າວຫັນ ປ່ຽນຢ່າງຈະແຈ້ງ ແລະ ສອດຫ້ອຍເຂົ້າໃນທຸກຂົງເຂດວຽກງານ.
ໃນຕອນເຊົ້າວັນພຸດທີ 24 ເມສາ 2024 ທີ່ສະພາແຫ່ງຊາດ, ໄດ້ມີກອງປະຊຸມສະຫຼຸບຕີລາຄາການເຄື່ອນໄຫວວຽກງານກວດກາປະຈຳປີ 2023 ແລະ ທິດທາງແຜນການປະຈຳປີ 2024 ຂອງຄະນະກວດກາພັກ-ລັດ ສພຊ ໂດຍການເປັນປະທານຂອງສະຫາຍ ຄຳໃບ ດຳລັດ ກຳມະການສູນກາງພັກ, ປະທານກວດກາພັກ-ລັດສະພາແຫ່ງຊາດ; ເຂົ້າຮ່ວມມີບັນດາສະຫາຍໃນຄະນະບໍລິຫານງານພັກ, ຄະນະພັກຮາກຖານ, ໜ່ວຍພັກຮາກຖານ, ໜ່ວຍພັກທີ່ຂຶ້ນກັບຄະນະພັກຮາກຖານ ພ້ອມດ້ວຍຄະນະກົມ, ສູນ, ຫ້ອງການ, ພະແນກ ແລະ ອົງການຈັດຕັ້ງມະຫາຊົນພາຍໃນ ສພຊ.
ສະຫາຍ ຄຳໃບ ດຳລັດ ໄດ້ກ່າວວ່າ: ປີ 2023 ຜ່ານມາ, ຄະນະກວດກາພັກ-ລັດສະພາແຫ່ງຊາດ ໄດ້ຕັ້ງໜ້າບຸກບືນປະຕິບັດວຽກງານຕິດຕາມ-ກວດກາ, ສະກັດກັ້ນ ແລະ ຕ້ານການສໍ້ລາດບັງຫຼວງ, ຄົ້ນຄວ້າແກ້ໄຂຄໍາຮ້ອງຄໍາສະເໜີ ແລະ ປັບປຸງການຈັດຕັ້ງຢູ່ຂັ້ນຂອງຕົນມີຜົນສໍາເລັດຫຼາຍດ້ານ; ພ້ອມກັນນັ້ນ, ກໍຍັງມີດ້ານອ່ອນ ແລະ ຂໍ້ຄົງຄ້າງຫຼາຍປະ ການ. ສະນັ້ນ, ກອງປະຊຸມໃນເທື່ອນີ້ ຈະໄດ້ພ້ອມກັນຍົກໃຫ້ເຫັນດ້ານດີ, ບົດຮຽນທີ່ຕ້ອງເສີມຂະຫຍາຍ, ຊອກໃຫ້ເຫັນດ້ານອ່ອນ, ຂໍ້ຄົງຄ້າງ, ສາເຫດ ເພື່ອປັບປຸງແກ້ໄຂໃນຕໍ່ໜ້າ ເປັນຕົ້ນແມ່ນວຽກງານຕິດຕາມກວດກາພາຍໃນພັກ, ການຄຸ້ມຄອງບໍລິຫານລັດດ້ວຍກົດໝາຍ, ການສະກັດກັ້ນ ແລະ ຕ້ານການສໍ້ລາດບັງຫຼວງ; ພ້ອມກັນນັ້ນ, ຕ້ອງຄົ້ນຄວ້າປະກອບຄໍາຄິດຄໍາເຫັນໃຫ້ເລິກເຊິ່ງ, ເປັນເອະພາບຕໍ່ທິດທາງ, ໜ້າທີ່ ແລະ ບັນດາວຽກທີ່ຕ້ອງສຸມໃສ່ຈັດຕັ້ງປະຕິບັດ ໃນປີ 2024 ແນໃສ່ເຮັດໃຫ້ວຽກງານຕິດຕາມ-ກວດກາ, ສະກັດກັ້ນ ແລະ ຕ້ານການສໍ້ລາດບັງຫຼວງ ຢູ່ພາຍໃນສະພາແຫ່ງຊາດ ໄດ້ຮັບການຈັດຕັ້ງປະຕິບັດຢ່າງຕັ້ງໜ້າ, ມີການຫັນປ່ຽນດີຂຶ້ນກວ່າເກົ່າ ແລະ ບັນລຸຕາມລະດັບຄາດໝາຍທີ່ວາງໄວ້.
ໃນກອງປະຊຸມ, ໄດ້ຮັບຟັງບົດສະຫຼຸບຕີລາຄາການເຄື່ອນໄຫວວຽກງານກວດກາປະຈຳປີ 2023 ແລະ ທິດທາງແຜນການປະຈຳປີ 2024 ຂອງຄະນະກວດກາພັກ-ລັດ ສະພາແຫ່ງຊາດ; ການເຜີຍແຜ່ເຊື່ອມຊຶມຜົນສຳເລັດກອງປະ ຊຸມວຽກງານກວດກາທົ່ວປະເທດ ປະຈຳປີ 2023 ເຊິ່ງມີບັນດານິຕິກຳ ຄື: ຄໍາສັ່ງແນະນໍາຂອງຄະນະເລຂາທິການສູນກາງພັກ ສະບັບເລກທີ 169/ຄລສພ, ລົງວັນທີ 15 ສິງຫາ 2022 ກ່ຽວກັບການເພີ່ມທະວີການນໍາພາ-ຊີ້ນໍາຕໍ່ການ ເຄື່ອນໄຫວວຽກງານກວດກາ ແລະ ແກ້ໄຂຜົນການກວດກາ; ຄໍາແນະນໍາຂອງຄະນະກວດກາສູນກາງພັກ ສະບັບເລກທີ 285/ຄກສພ, ລົງວັນທີ 15 ກັນຍາ 2023 ກ່ຽວກັບການກະກຽມ ແລະ ດໍາເນີນຊີວິດການເມືອງທ້າຍສະໄໝກອງປະ ຊຸມໃຫຍ່ 3 ຂັ້ນຂອງພັກ.
(ຂ່າວ: ນາງ ສຸພາວັນ ຫອມສະນິດ, ພາບ: ສອນສັກ ວັນວິໄຊ;)