ໃນວັນທີ 23 ເມສາ 2024. ທີ່ຫ້ອງປະຊຸມສະພາປະຊາຊົນແຂວງ (ສພຂ) ໄດ້ມີກອງປະຊຸມຕິດຕາມກວດກາການຈັດຕັ້ງປະຕິບັດວຽກງານໂຄສະນາ ເຜີຍແຜ່ ລັດຖະທໍາມະນູນ ແລະ ກົດໝາຍ ໂດຍການເປັນປະທານຂອງທ່ານ ສຈ. ປອ. ຈະເລີນ ເຢຍປາວເຮີ ຮອງປະທານສະພາແຫ່ງຊາດ ປະທານກໍາມາທິການກົດໝາຍ ເຂົ້າຮ່ວມມີທ່ານ ສຸກສໍາລານ ໄຊຍະແສງ ຮອງປະທານ ສພຂ, ບັນດາທ່ານຄະນະປະຈໍາ ສພຂ, ຮອງປະທານກໍາມາທິການກົດໝາຍ, ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 17, ຄະນະກໍາມະການ, ຄະນະເລຂາທິການ, ຕາງໜ້າພະແນກການ, ອົງການທຽບເທົ່າພະແນກ, ກອງບັນຊາການ ປກສ ຕະຫຼອດຮອດພະນັກງານ-ວີຊາການ.
ໃນກອງປະຊຸມ ທ່ານ ສຈ. ປອ. ຈະເລີນ ເຢຍປາວເຮີ ໄດ້ກ່າວວ່າ: ການໂຄສະນາເຜີຍແຜ່ ລັດຖະທໍາມະນູນ ແລະ ກົດໝາຍ ແມ່ນວຽກທີ່ສໍາຄັນອັນໜຶ່ງໃນວຽກງານການສ້າງລັດທີ່ປົກຄອງດ້ວຍກົດໝາຍ ເຊິ່ງພັກເຮົາໄດ້ມີແນວທາງນະໂຍບາຍວ່າດ້ວຍການສ້າງລັດທີ່ປົກຄອງດ້ວຍກົດໝາຍ ມາແຕ່ກອງປະຊຸມໃຫຍ່ຄັ້ງທີ VIII ເປັນຕົ້ນມາ, ລັດກໍ່ໄດ້ມີແຜນແມ່ບົດ ຫລືແຜນຍຸດທະສາດວ່າດ້ວຍການສ້າງລັດທີ່ປົກຄອງດ້ວຍກົດໝາຍ ນັບແຕ່ປີ 2010 ແລະ ໄດ້ສ້າງໃຫ້ມີກົດໝາຍທີ່ເປັນລະບົບຄົບຊຸດ ຮັດກຸມ ສອດຄ່ອງແທດເໝາະກັບໜ້າທີ່ການເມືອງຂອງພັກ, ສະພາບການຕົວຈິງພາຍໃນປະເທດ ແລະ ສາກົນ ໃນແຕ່ລະໄລຍະ ມາຮອດປະຈຸບັດລັດໄດ້ປະກາດໃຊ້ກົດໝາຍທັງໝົດ 167 ສະບັບ. ສະນັ້ນວຽກງານ ໂຄສະນາເຜີຍລັດຖະທໍາມະນູນ ແລະ ກົດໝາຍ ເພື່ອສ້າງຄວາມຮັບຮູ້ ແລະ ສະຕິເຄົາລົບ ແລະ ປະຕິບັດກົດໝາຍໃນທົ່ວສັງຄົມໃຫ້ສູງຂື້ນ, ຈັດຕັ້ງປະຕິບັດກົດໝາຍ ຫລື ບັງຄັບປະຕິບັດກົດໝາຍຂອງລັດ, ຂອງລະບອບການເມືອງ ໃຫ້ສັກສິດ ແລະ ເຂັ້ມງວດ.
ກອງປະຊຸມ ໄດ້ຮັບຟັງການລາຍງານຂອງພະແນກຍຸຕິທໍາ ກ່ຽວກັບການຈັດຕັ້ງປະຕິບັດວຽກງານການໂຄສະນາເຜີຍແຜ່ ລັດຖະທໍາມະນູນ ແລະ ກົດໝາຍ ຢຸ່ແຂວງອັດຕະປື ແລະ ໄດ້ພ້ອມກັນຄົ້ນຄວ້າ ປະກອບຄວາມຄິດຄວາມເຫັນ ແລະ ແລກປ່ຽນບົດຮຽນເຊິ່ງກັນ ແລະ ກັນ ຢ່າງກົງໄປກົງມາ ມີເຫດມີຜົນ, ພາວະວິໄສ ແລະ ແທດກັບສະພາບການຕົວຈິງໃນການຂະຫຍາຍຕົວຂອງສະພາບເສດຖະກິດ-ສັງຄົມໃນປະຈຸບັນ ເພື່ອຈະໄດ້ພ້ອມກັນຕັ້ງໜ້າຈັດຕັ້ງປະຕິບັດວຽກງານດັ່ງກ່າວ ໃຫ້ມີປະສິດທິພາບ ແລະ ປະສິດທິຜົນດີຂື້ນກວ່າເກົ່າ ເພື່ອເປັນການຜັນຂະຫຍາຍແນວທາງນະໂຍບາຍຂອງພັກ ໃນການສ້າງລັດທີ່ປົກຄອງດ້ວຍກົດໝາຍ ໃຫ້ເປັນຮູບປະທໍາຂື້ນເທື່ອລະກ້າວ. ນອກຈາກນີ້ຍັງໄດ້ຮັບຟັງການເຜີຍແຜ່ຄໍາແນະນໍາຂອງຄະນະປະຈໍາສະພາແຫ່ງຊາດ ວ່າດ້ວຍການສະຫລຸບຕິລາຄາການໂຄສະນາເຜີຍແຜ່ກົດໝາຍໃນທົ່ວປະເທດ.
ໂອກາດນີ້, ທ່ານ ສຈ. ປອ. ຈະເລີນ ເຢຍປາວເຮີ ໄດ້ມີຄໍາເຫັນ ແລະ ສະເໜີເນັ້ນຕື່ມບາງບັນຫາເປັນຕົ້ນ: ສະເໜີໃຫ້ຄະນະປະຈໍາສະພາປະຊາຊົນແຂວງ, ອົງການປົກຄອງແຂວງ ແລະ ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ 17 ເອົາໃຈໃສ່ຊີ້ນໍາບັນດາຂະແໜງການ ເພີ່ມທະວີການໂຄສະນາເຜີຍແຜ່ລັດຖະທໍາມະນູນ ແລະ ບັນດາກົດໝາຍທີ່ໄດ້ປະກາດໃຊ້ແລ້ວ ໃຫ້ມີຄວາມວ່ອງໄວຕໍ່ເນື່ອງ ທັນກໍານົດເວລາ, ກວ້າງຂວາງ ແລະ ເຂົ້າເຖິງທຸກເປົ້າໝາຍທັງພາກລັດ, ເອກະຊົນ, ປະຊາຊົນລາວບັນດາເຜົ່າ ດ້ວຍຫລາຍຮູບການ, ຫລາຍວິທີການ, ພິຈາລະນາຈັດສັນງົບປະມານ, ພາຫະນະ ສະໜອງໃຫ້ແກ່ວຽກງານດັ່ງກ່າວຕາມຄວາມສາມາດ, ສືບຕໍ່ຊີ້ນໍາການຜັນຂະຫຍາຍ ຄໍາແນະນໍາ ຂອງຄະນະປະຈໍາສະພາແຫ້ງຊາດ ສະບັບເລກທີ 01/ຄປຈ ລົງວັນທີ 3 ມັງກອນ 2024ວ່າດ້ວຍການສະຫລຸບຕິລາຄາການໂຄສະນາເຜີຍແຜ່ກົດໝາຍຢູ່ແຂວງອັດຕະປື, ສືບຕໍ່ຈັດຕັ້ງປະຕິບັດມະຕິຂອງຄະນະປະຈໍາສະພາແຫ່ງຊາດສະບັບເລກທີ 29/ຄປຈ ລົງວັນທີ 7 ກຸມພາ 2022 ແລະ ນິຕິກໍາຂອງລັດຖະບານ ກ່ຽວກັບການໂຄສະນາເຜີຍແຜ່ລັດຖະທໍາມະນູນ, ກົດໝາຍ ແລະ ນິຕິກໍາໃຕ້ກົດໝາຍ, ຕິດຕາມກວດກາການຈັດຕັ້ງປະຕິບັດວຽກງານໂຄສະນາເຜີຍແຜ່ລັດຖະທໍາມະນູນ ແລະ ກົດໝາຍ ກໍ່ຄືນິຕິກໍາໃຕ້ກົດໝາຍ ລວມທັງນິຕິກໍາໃຕ້ກົດໝາຍຂອງແຂວງ ໃຫ້ແທດເຖິງຕົວ ໂດຍສະເພາະນິຕິກໍາທີ່ຕິດພັນກັບການອະນຸຍາດບັນດາໂຄງການຕ່າງໆ.
ຈາກນັ້ນ, ໃນຕອນບ່າຍຂອງວັນດ່ຽວກັນ ທ່ານ ສຈ. ປອ. ຈະເລີນ ເຢຍປາວເຮີ ແລະ ທ່ານ ສຸກສໍາລານ ໄຊຍະແສງ ພ້ອມດ້ວຍຄະນະ ແລະ ພາກສ່ວນຂະແໜງການທີ່ກ່ຽວຂ້ອງ ໄດ້ເຄື່ອນໄຫວຢ້ຽມຢາມ ບໍລິສັດ ທາໂກ ອາກຣິ ຕັ້ງຢູ່ບ້ານຫາດຊັນ ເມືອງໄຊເສດຖາ ແຂວງອັດຕະປື ເພື່ອຢ້ຽມຢາມ ແລະ ຮັບຟັງການລາຍງານການຈັດຕັ້ງປະຕິບັດຂອງໂຄງການ ເຊິ່ງເປັນບໍລິສັດໃຫ່ຍ ມີການລົງທຶນຫຼາຍໃນຂະແໜງກະສີກໍາ ປູກຢາງພາລາ, ປູກກ້ວຍ ແລະ ລ້ຽງງົວພັນຊີ້ນ.
(ພາບ-ຂ່າວ:ວິນັດ ສີສຸລາດ)