ດັ້ນກີບເມກ

ບຸນປີໃໝ່ລາວກົງກັບເດືອນເມສາ ຄົນລາວນິຍົມ ເຮັດບຸນຖວາຍທານ ແກ່ພະສົງ ອຸທິດສ່ວນບຸນ ໄປຫາຍາດຜູ້ລ່ວງລັບ ແລະ ເຮັດນໍ້າຫອມ ໄປຫົດສົງພຸດທະຮູບ ພະສົງ ແລະ ເຖົ້າແກ່ອາວຸໂສ ເພື່ອອວຍພອນ ສົ່ງຄວາມປາຖະໜາດີຕໍ່ກັນ, ຄົນມັກປ່ອຍສັດເອີ້ນວ່າ ໄຖ່ ຫຼື ໂຜດເອົາຊີວິດຂອງສັດ ເພາະເຊື່ອວ່າການໂຜດສັດ ໄດ້ບຸນ ພາໃຫ້ອາຍຸຍືນຍາວ ແລະ ບໍ່ບຽດບຽນກັນ ນີ້ກໍແມ່ນວັດທະນະທຳທາງຄວາມຄິດ (ນາມມະທຳ) ຂອງຄົນລາວ ທີ່ບໍ່ຄວນຖືເບົາ ເບິ່ງຂ້າມ ຕໍ່ມາຄົນລາວມັກຈັດພິທີບາສີສູ່ຂວັນ ເພື່ອຜູກແຂນອວຍພອນ ປາຖະໜາດີຕໍ່ກັນ.
ການຫຼີ້ນບຸນປີໃໝ່ ສຳລັບຄົນລາວ ນິຍົມນຳເອົາ ນໍ້າທີ່ບໍລິສຸດ ສະອາດຫົດສົງໃສ່ກັນ ທັງອວຍພອນແກ່ກັນ ເພາະປີໜຶ່ງມີຄັ້ງດຽວ ແລະ ສິ່ງໜຶ່ງສຳຄັນທີ່ຄົນລາວປະຕິບັດໃນບຸນປີໃໝ່ ຄືການຕົບພະທາດຊາຍ ເຊິ່ງເລື່ອງນີ້ມີໃນ ປະຫວັດພຸດທະສາສະໜາ, ພະທາດຊາຍ ພາສາປາລີເອີ້ນວ່າ: ວາລຸກະເຈດີ ເພື່ອອຸທິດເປັນພຸດທະບູຊາ-ທຳມະ ແລະ ສັງຄະບູຊາ ເຊິ່ງໄດ້ອານິສົງຄື: ຖ້າເກີດເປັນມະນຸດ ຈະເປັນຜູ້ອຸດົມສົມບູນ ຖ້າຕາຍຈາກໂລກນີ້ ຈະເກີດໃນສະຫວັນ ການຕົບພະຊາຍ ຍັງບົ່ງບອກເຖິງ ຄວາມສາມັກຄີຂອງປະຊາຊົນ ເຖິງແມ່ນວ່າເປັນພຽງເມັດຊາຍ ຖ້າມີສິລະປະ ມີປັນຍາຮູ້ຈັກກໍ່ສ້າງ ກໍສາມາດເຮັດໃຫ້ເປັນພະທາດງົດງາມໄດ້ ຢ່າລືມວ່າປີນີ້ລາວເຮົາ ເປີດເປັນປີທ່ອງທ່ຽວ ຖ້າມີການຈັດປະກວດ ຕົບແຕ່ງທາດຊາຍງາມ ຄົງຈະຄຶກຄື້ນ ເປັນການສະແດງ ເອກະລັກວັດທະນະທຳໃຫ້ຊາວໂລກໄດ້ຮູ້ເຫັນ ປະເພນີບຸນປີໃໝ່ລາວ.

ການປະຕິບັດຕາມຮີດຄອງປະເພນີ ທີ່ອະທິບາຍມາຂ້າງເທິງ ຍັງບໍ່ ພຽງພໍ ປະຊາຊົນລາວຊາວນະຄອນຫຼວງວຽງຈັນ ຕ້ອງເອົາໃຈໃສ່ ຕໍ່ຄຳສັ່ງວ່າດ້ວຍ ການຮັກສາຄວາມສະຫງົບ… ຂອງເຈົ້າຄອງນະຄອນ ຫຼວງວຽງຈັນ ສະບັບເລກທີ 01/ຈນວ, ລົງວັນທີ 25 ມີນາ 2024 ໃນໄລຍະຫຼີ້ນບຸນປີໃໝ່ ວັນທີ 13-16 ຮຽກຮ້ອງບໍ່ໃຫ້ປະຊາຊົນ ຫຼີ້ນນໍ້າເປິເປື້ອນ, ນຸ່ງເຄື່ອງໂປ້ເປືອຍ, ຫ້າມຜູ້ຂັບລົດດື່ມເຄື່ອງມືນເມົາ ຂະນະທີ່ມີຂໍ້ຫ້າມຕ່າງໆ ອີງຕາມຄຳສັ່ງ ຍັງມີມາດຕະການຕໍ່ຜູ້ລະເມີດ ມີການປັບໃໝ ໃສ່ໂທດ ດັ່ງນັ້ນ ຊາວນະຄອນຫຼວງວຽງຈັນ ຕ້ອງເອົາໃຈໃສ່ຕໍ່ລະບຽບ ຂໍ້ຫ້າມ-ຄຳສັ່ງ ຂອງທາງການຢ່າງເຄັ່ງຄັດ ເຊິ່ງສຳຄັນປີນີ້ເປັນປີທ່ອງທ່ຽວ ທຸກຄົນຕ້ອງໄດ້ເຮັດຄວາມສະອາດໜ້າບ້ານເຮືອນຊານ ຮັກສາຄວາມສະຫງົບ ສະແດງຕົນເປັນເຈົ້າບ້ານ ທີ່ດີຕໍ່ແຂກຕ່າງປະເທດ ໃຫ້ເຂົາຮູ້ເຫັນ-ປະທັບໃຈ ໃນຮີດຮອງປະເພນີລາວ ສຳຄັນອີກແມ່ນຫ້າມ ພໍ່ຄ້າ-ແມ່ຄ້າ ສວຍໂອກາດຂຶ້ນລາຄາສິນຄ້າເດັດຂາດ ເຫັນໃຈກັນເນີ.