ໃນລະຫວ່າງ ວັນທີ 1 – 4 ເມສາ 2024 ຜ່ານມານີ້ ທ່ານ ສະແຫວງ ນັນທະວົງ ຄະນະປະຈໍາສະພາປະຊາຊົນແຂວງ ປະທານຄະນະກໍາມະການຍຸຕິທໍາ ແລະ ປກຊ-ປກສ ທັງເປັນສະມາຊິກສະພາແຫ່ງຊາດ ນໍາພາທີມງານຄະນະກໍາມະການ ຊຶງປະກອບມີ: ທ່ານ ພັທ. ແສງກາ ສຸວັນນະຄົງ, ທ່ານ ພັທ. ຄູນສະໄໝ ລິນສັນຍາ ຮອງປະທານຄະນະກໍາມະການ ທັງເປັນສະມາຊິກສະພາແຫ່ງຊາດ, ທ່ານ ຂັນທອງ ຄົມທິລາດ ຮອງເລຂາທິການ, ຫົວໜ້າຂະແໜງ ຍຸຕິທໍາ, ຫົວໜ້າຂະແໜງ ປກຊ-ປກສ ແລະ ວິຊາການຈໍານວນໜຶ່ງ.

 

      ການເຄື່ອນໄຫວໃນຄັ້ງນີ້ໄດ້ເຄື່ອນໄຫວຢູ່ເຂດເລືອກຕັ້ງເມືອງເຊໂປນ, ເມືອງພີນ, ນະຄອນໄກສອນພົມວິຫານ, ອົງການໄອຍະການປະຊາຊົນແຂວງ, ສານປະຊາຊົນແຂວງ ແລະ ນອກຈາກນີ້ທາງຄະນະທີມງານກໍ່ໄດ້ລົງຢ້ຽມຢາມຄ້າຍຄຸມຂັງແກ້ງຄັນເມືອງເຊໂປຕື່ມອີກ, ການເຄື່ອນໄຫວໃນແຕ່ລະຈຸດມີ ສສຂ ປະຈໍາເຂດເລືອກຕັ້ງເມືອງ, ນະຄອນ ແລະ ຫ້ອງການກ່ຽວຂ້ອງໃນຂົງເຂດວຽກງານຍຸຕິທໍາ ແລະ ຫົວໜ້າກອງບັນຊາການທະຫານເມືອງ, ນະຄອນ, ຫົວໜ້າກອງບັນຊາການ ປກສ ເມືອງ, ນະຄອນ ໂດຍມີຜູ້ເຂົ້າຮ່ວມທັງໝົດ 68 ທ່ານ, ຍິງ 20 ທ່ານ.

ຈຸດປະສົງໃນການເຄື່ອນໄຫວຕິດຕາມກວດກາວຽກງານຂົງເຂດຍຸຕິທໍາໃນຄັ້ງນີ້ແມ່ນລົງເກັບກໍາຂໍ້ມູນ ເພື່ອເປັນເນື້ອໃນພື້ນຖານໃຫ້ແກ່ກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ເປັນຕົ້ນແມ່ນສະຖິຕິຄໍາຕັດສິນຂອງສານທີ່ໃຊ້ໄດ້ຢ່າງເດັດຂາດ, ການປະຕິບັດໜ້າທີ່ໃນການຖະແຫຼງຂອງເຈົ້າໜ້າທີ່ອົງການໄອຍະການ, ການດໍາເນີນຄະດີຢູ່ສານຂັ້ນຕົ້ນ ແລະ ຂັ້ນອຸທອນ, ການປະສານງານຢູ່ຄ້າຍຄຸມຂັງຕາມສາຍຕັ້ງ-ສາຍຂວາງ, ການຄຸ້ມຄອງ, ການປົກປັກຮັກສາຂອງກາງຄະດີ, ການລັກລອບນໍາເຂົ້າສິນຄ້າເຖື່ອນ ຕາມບໍລິເວນຊາຍແດນ.

ໃນການລົງແຕ່ລະຈຸດຕາງໜ້າຫ້ອງການ, ກົມກອງ ກໍ່ໄດ້ລາຍງານສະພາບການຈັດຕັ້ງປະຕິບັດໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ, ຈາກນັ້ນ ບັນດາທ່ານ ສະມາຊິກສະພາແຫ່ງຊາດ ກໍ່ຄືຄະນະຕິດຕາມ ໄດ້ຕັ້ງຄໍາຖາມເຈາະຊິ້ມ ແລະ ແຕ່ລະພາກກ່ຽວຂ້ອງກໍ່ໄດ້ໃຫ້ຂໍ້ມູນ; ແລະ ນອກຈາກນີ້ ທ່ານ ສະແຫວງ ນັນທະວົງ ປະທານຄະນະກໍາມະການ ຍຸຕິທໍາ ແລະ ປກຊ-ປກສ ກໍ່ໄດ້ມີຄໍາເຫັນໂອ້ລົມຕໍ່ການນໍາເມືອງ, ນະຄອນ, ຄະນະພັກ, ຄະນະບັນຊາ ເພື່ອໃຫ້ສືບຕໍ່ໃນການນໍາພາ-ຊີ້ນໍາວຽກງານການຈັດຕັ້ງປະຕິບັດລັດຖະທໍາມະນູນ, ກົດໝາຍ, ມະຕິກອງປະຊຸມສະພາແຫ່ງຊາດ, ມະຕິກອງປະຊຸມສະພາປະຊາຊົນແຂວງ ອີກດ້ວຍ.