(ສພຊ) ຕອນບ່າຍຂອງວັນພຸດທີ 1 ທັນວາ 2021 ຢູ່ທີ່ຫ້ອງປະຊຸມສະພາປະຊາຊົນແຂວງ (ສພຂ) ອຸດົມ​ໄຊ ໄດ້ເປີດກອງປະຊຸມວິສາມັນຄະນະປະຈໍາສະພາປະຊາຊົນແຂວງອຸດົມໄຊ ໂດຍການເປັນປະທານຂອງທ່ານ ຄໍາດີ ວົງລ້ອມ ປະທານຄະນະປະຈໍາສະພາປະຊາຊົນແຂວງ, ປະທານ ສພຂ ອຸດົມໄຊ; ມີບັນດາທ່ານ​ໃນຄະນະປະຈໍາສະພາປະຊາຊົນແຂວງ, ພະແນກຊັບພະຍາກອນທໍາມະຊາດ ແລະ ວິຊາການຂະແໜງກ່ຽວຂ້ອງ ພາຍໃນສະພາປະຊາຊົນແຂວງເຂົ້າຮ່ວມ.

ກອງປະຊຸມໄດ້ຜ່ານມະຕິຂອງຄະນະປະຈໍາສະພາປະຊາຊົນແຂວງ ວ່າດ້ວຍການເປີດກອງປະຊຸມວິສາມັນຄະ ນະປະຈໍາສະພາປະຊາຊົນແຂວງ ສະບັບເລກທີ 1292/ຄປຈ.ສພຂ, ລົງວັນທີ 1 ທັນວາ 2021; ຈາກນັ້ນ, ໄດ້ຮັບຟັງການຜ່ານບົດລາຍງານການຈັດຕັ້ງປະຕິບັດ ຮ່າງຂໍ້ຕົກລົງວ່າດ້ວຍການກຳນົດນະໂຍບາຍ ແລະ ທົນແທນຜົນເສຍຫາຍຂອງປະຊາຊົນເຂດເມືອງງາ, ແຂວງອຸດົມໄຊ ທີ່ໄດ້ຮັບຜົນກະທົບຈາກໂຄງການກໍ່ສ້າງເຄື່ອນໄຟຟ້ານໍ້າຂອງຫລວງພະບາງ. ປະທານກອງປະຊຸມໄດ້ມີຄຳເຫັນຊີ້ນຳ ແລະ ກອງປະຊຸມໄດ້ປະກອບຄຳຄິດຄຳເຫັນໃສ່ຮ່າງຂໍ້ຕົກລົງດັ່ງກ່າວ,  ພະແນກ ການກ່ຽວຂ້ອງກໍໄດ້ຕອບ ແລະ ຊີ້ແຈງຕໍ່ຄຳຊັກຖາມຂອງບັນດາຄະນະປະຈໍາສະພາປະຊາຊົນແຂວງ ເພື່ອເປັນບ່ອນອີງ ແລະ ໃຫ້ຄຳຕອບແກ່ປະຊາຊົນໃນເວລາລົງເຜີຍແຜ່ຜົນສຳເລັດຂອງກອງປະຊຸມສະພາແຫ່ງຊາດ ແລະ ສະພາປະຊາຊົນແຂວງ.

ຈາກນັ້ນ, ກອງປະຊຸມໄດ້ສືບຕໍ່ປະກອບຄໍາຄິດຄໍາເຫັນ ແລະ ປຶກສາຫາລືໃສ່ຮ່າງມະຕິຂອງຄະນະປະຈໍາສະພາປະຊາຊົນແຂວງ ວ່າດ້ວຍການພົບປະປະຊາຊົນຂອງສະມາຊິກສະພາປະຊາຊົນແຂວງ ແລະ ວຽກງານພົ້ນເດັ່ນອີກຈໍານວນໜຶ່ງ.

(ແສງພອນ ອິນນະລົງ)