ໃນວັນ 4 ເມສາ 2024 ຢູ່ທີ່ຫ້ອງປະຊຸມສະພາປະຊາຊົນແຂວງ ໄດ້ຈັດຕັ້ງເຊື່ອມຊືມເອກະສານສໍາຄັນຂອງພັກ-ຂອງຊາດ ໂດຍການເປັນປະທານ ຂອງທ່ານ ວຽງໄຊ ສີວິໄລ ກໍາມະການພັກແຂວງ ຮອງປະທານສະພາປະຊາຊົນແຂວງ, ມີບັນດາທ່ານຄະນະປະຈໍາສະພາປະຊາຊົນແຂວງ, ຄະນະພັກສະ ພາປະຊາຊົນແຂວງ, ປະທານ-ຮອງປະທານຄະນະກຳມະການ, ຄະນະເລຂາທິການ, ຫົວໜ້າ-ຮອງຫົວໜ້າຂະແໜງ ແລະ ພະນັກງານສະພາປະຊາຊົນແຂວງເຂົ້າຮ່ວມ.

ໃນພິທີບັນດາທ່ານຄະນະປະຈໍາສະພາປະຊາຊົນແຂວງ ແລະ ຄະນະພັກສະພາປະຊາຊົນແຂວງ ໄດ້ຜັດປ່ຽນກັນຂຶ້ນບັນລະຍາຍບັນດາເອກະສານທີ່ສໍາຄັນຂອງພັກ-ຂອງຊາດ ເຊິ່ງເນື້ອໃນເອກະສານທີ່ນໍາມາຈັດຕັ້ງເຊື່ອມຊືມໃຫ້ພະນັກງານສະພາປະຊາຊົນແຂວງໄດ້ຮັບຮູ້ ແລະ ເຂົ້າໃຈມີຄື: ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 69 ປີ, ເອກະສານວັນນັກຮົບເສຍອົງຄະ ແລະ ເສຍສະຫຼະຊີວິດເພື່ອປະເທດຊາດ ຄົບຮອບ 78 ປີ ແລະ ເອກະສານວັນສ້າງຕັ້ງກໍາລັງປ້ອງກັນຄວາມສະຫງົບປະຊາຊົນຄົບຮອບ 63 ປີ ເພື່ອໃຫ້ພະນັກງານສະພາປະຊາຊົນແຂວງ ໄດ້ຮັບຮູ້, ເຊື່ອມຊືມ ແລະ ກຳແໜ້ນເນື້ອໃນດັ່ງກ່າວ, ເພື່ອທົບທວນມູນເຊື້ອ ແລະ ໄຊຊະນະອັນຍິ່ງໃຫຍ່ຂອງການປະຕິວັດໂດຍພາຍໃຕ້ການຊີ້ນໍາ-ນໍາພາຂອງພັກປະຊາຊົນປະຕິວັດລາວ ແລະ ລະນຶກວັນນັກຮົບເສຍອົງຄະ ແລະ ເສຍສະຫຼະຊີວິດ ເພື່ອປະເທດຊາດ, ສືບຕໍ່ເສີມຂະຫຍາຍມູນເຊື້ອ ແລະ ທາດແທ້ຂອງພັກເຂົ້າໃນການນໍາພາ-ຊີ້ນໍາ ຈັດຕັ້ງປະຕິບັດພາລະກິດປ່ຽນແປງໃໝ່, ໄດ້ຮັບຮູ້ ແລະ ເຊື່ອມຊືມມູນເຊື້ອປະຫວັດສາດ, ສ້າງຄວາມຮັບຮູ້ຢ່າງເລິກເຊິ່ງເຖິງຄວາມປິຊາສາມາດ ແລະ ຄວາມສະຫຼາດຫຼັກແຫຼມຂອງພັກເຮົາ ໃນຂະບວນການຕໍ່ສູ້ປົດປ່ອຍຊາດ.

ໃນພິທີ ທ່ານ ວຽງໄຊ ສີວິໄລ ໄດ້ມີຄໍາເຫັນໂອ້ລົມຕໍ່ພີທີກໍຄືສະມາຊິກພັກ-ພະນັກງານສະພາປະຊາຊົນແຂວງ ຈົ່ງນໍາເອົາເນື້ອໃນເອກະສານທີ່ໄດ້ເຊື່ອມຊືມນັ້ນໄປຈັດຕັ້ງຜັນຂະຫຍາຍໃຫ້ເປັນແຜນວຽກງານອັນລະອຽດ, ສືບຕໍ່ເນັ້ນໃຫ້ພະນັກງານສະພາປະຊາຊົນແຂວງ ​ໃຫ້ມີຄຸນທາດການເມືອງໜັກແໜ້ນ, ໃຫ້ມີສະຕິຕໍ່ການຈັດຕັ້ງ, ປັບປຸງ​ແບບ​ແຜນ​ວິທີ​ເຮັດ​ວຽກໃຫ້ດີຂຶ້ນກວ່າເກົ່າ.

ສະພາປະຊາຊົນແຂວງຊຽງຂວາງ

ຂ່າວໂດຍ: ນາງ ສຸກສະຫວັນ ອິນທະແສງ