(ສພຂ) ວັນທີ 17 ກັນຍາ 2021 ທີ່ຫ້ອງປະຊຸມສະພາປະຊາຊົນແຂວງ (ສພຂ) ຜົ້ງສາລີ ໄດ້ມີພິທີປະກາດການປັບປຸງກົງຈັກເສນາທິການຂອງ ສພຂ ໂດຍການເປັນປະທານຂອງທ່ານ ທອງສີ ເສົາສຸລິພົມ ປະທານ ສພຂ; ມີບັນດາທ່ານຄະນະປະຈໍາ, ຮອງປະທານຄະນະກໍາມະການ ສພຂ, ຮອງເລຂາທິການ ສພຂ ພ້ອມດ້ວຍພະນັກງານ-ລັດຖະກອນພາຍໃນ ສພຂ ເຂົ້າຮ່ວມຢ່າງພ້ອມພຽງ.

ໃນພິທີໄດ້ຮັບຟັງທ່ານ ນາງ ພອນສະຫັວນ ສັກຕິຄຸນ ເລຂາທິການ ສພຂ ຂຶ້ນຜ່ານມະຕິວ່າດ້ວຍການປັບປຸງກົງຈັກເສນາທິການ ຂອງສະພາປະຊາຊົນຂັ້ນແຂວງ ສະບັບເລກທີ 110/ຄປຈຂ, ລົງວັນທີ 8 ກັນຍາ 2021; ຂໍ້ຕົກລົງ ວ່າດ້ວຍການແຕ່ງຕັ້ງດໍາລົງຕໍາແໜ່ງ ບໍລິຫານປະເພດ 5 ແລະ ປະເພດ 6 ຂອງສະພາປະຊາຊົນແຂວງ ສະບັບເລກທີ 114/ຄປຈຂ, ລົງວັນທີ 13 ກັນຍາ 2021; ຂໍ້ຕົກລົງ ວ່າດ້ວຍການບັນຈຸສັບຊ້ອນພະນັກງານ-ລັດຖະກອນ ເຂົ້າໃນແຕ່ລະຂະແໜງການຊ່ວຍວຽກ ຂອງສະພາປະຊາຊົນແຂວງ ສະບັບເລກທີ 115 ຄປຈຂ, ລົງວັນທີ 13 ກັນຍາ 2021.

ຈາກນັ້ນ, ທ່ານ ທອງສີ ເສົາສຸລິພົມ ຍັງໄດ້ໂອ້ລົມຕໍ່ພິທີ ເຊິ່ງກ່ອນອື່ນທ່ານໄດ້ກ່າວສະແດງຄວາມຊົມເຊີຍ ແລະ ຂອບໃຈຕໍ່ການຫ້າງຫາກະກຽມຈາກຂະແໜງການທີ່ກ່ຽວຂ້ອງ. ພາຍຫລັງໄດ້ສໍາເລັດການກໍານົດພະນັກງານນໍາພາ-ຄຸ້ມຄອງແລ້ວ ທາງຄະນະປະຈໍາ ສພຂ ໄດ້ມີການປຶກສາຫາລື ແລະ ແຕ່ງຕັ້ງບັນດາທ່ານຂຶ້ນເປັນຫົວໜ້າຂະແໜງ, ຮອງຂະແໜງ. ພ້ອມກັນນັ້ນ, ກໍ່ໄດ້ມີການຄົ້ນຄວ້າປັບປຸງ, ບັນຈຸ ແລະ ສັບຊ້ອນພະນັກງານ-ລັດຖະກອນ ເຂົ້າໃນຂະ ແໜງການຊ່ວຍວຽກ ສພຂ ຄືນໃໝ່; ເພື່ອໃຫ້ໄດ້ຜູ້ບໍລິຫານ ແລະ ນັກວິຊາການທີ່ເປັນມືອາຊີບ, ມີວິຊາຄວາມຮູ້, ຄວາມສາມາດ ທາງດ້ານການບໍລິຫານອົງການ, ມີປະສົບການ ເພື່ອຊີ້ນໍາ-ນໍາພາໃຫ້ບັນລຸຈຸດປະສົງ ແລະ ເປົ້າໝາຍທີ່ກໍານົດໄວ້ ໂດຍອາໄສປັດໃຈການບໍລິຫານຄົນ; ສະເໜີໃຫ້ຄະນະປະຈໍາ ສພຂ, ຄະນະກຳມະການ ແລະ ຄະນະເລຂາທິການ ສພຂ ຕ້ອງເພີ່ມທະວີຄວາມຮັບຜິດຊອບຂອງຕົນເອງດ້ວຍຄວາມສາມາດ, ຄວາມຮູ້ ແລະ ຄຸນສົມບັດ ສິນທໍາປະຕິວັດ ສົມທົບກັນປັບປຸງແບບແຜນນໍາພາ ແລະ ແບບແຜນວິທີເຮັດວຽກ ໃຫ້ມີຄວາມຄ່ອງຕົວ ແລະ ຫັນໄປຕາມຍຸກ, ໄປຕາມຄວາມຮຽກຮ້ອງຕ້ອງການ ຂອງໜ້າທີ່ວຽກງານທີ່ພັກ-ລັດໄດ້ມອບໝາຍ; ພ້ອມກັນນັ້ນ, ຍັງໄດ້ຮຽກຮ້ອງມາຍັງ ບັນດາ ຄະນະປະຈໍາ ສພຂ, ຄະນະກຳມະການ, ຄະນະເລຂາທິການ ຈົ່ງເພີ່ມທະວີເຕົ້າໂຮມຄວາມສາມັກຄີພາຍໃນ ໃຫ້ແໜ້ນແຟ້ນ ແລະ ບັນດາທ່ານທີ່ໄດ້ຮັບໜ້າທີ່ໃໝ່ ແລະ ຜູ້ເກົ່າ, ພ້ອມທັງວິຊາການ ຈົ່ງເຊີດຊູຄວາມຮັບຜິດຊອບຂອງຕົນໃຫ້ມີຜົນສໍາເລັດຍິ່ງໃຫຍ່ກວ່າເກົ່າ.

(ນາງ ສຸກສົມພອນ ແກ້ວແສງພະຈັນ)