ວັນທີ 27-29 ມີນາ 2024 ທີ່ສະໂມສອນເມືອງບຸນໃຕ້, ສະພາປະຊາຊົນແຂວງຜົ້ງສາລີ ຈັດກອງປະຊຸມຝືກອົບຮົມໃຫ້ແກ່ ສສຊ ປະຈໍາເຂດເລືອກຕັ້ງ 2, ສສຂ, ບັນດາພະແນການ, ອົງການອ້ອມຂ້າງແຂວງ, ອ້ອມຂ້າງເມືອງ ແລະ ພາກສ່ວນທີ່ກ່ຽວຂ້ອງ ໂດຍການເປັນປະທານ ຂອງທ່ານ ທອງສີ ເສົາສຸລິພົມ ຮອງເລຂາພັກແຂວງ, ປະທານຄະນະປະຈໍາສະພາປະຊາຊົນແຂວງ, ມີວິທະຍາກອນ ຈາກ ສພຂ ແຂວງຜົ້ງສາລີ, ສະພາແຫ່ງຊາດ (ສພຊ) ແລະ ນັກສໍາມະນາກອນຈາກ ພາກສ່ວນກ່ຽວຂ້ອງ ເຂົ້າຮ່ວມ.

ກອງປະຊຸມຄັ້ງນີ້ ຈັດຂຶ້ນເພື່ອສ້າງຮັບຮູ້ເຂົ້າໃຈ ກ່ຽວກັບພາລະບົດບາດ, ສິດ ແລະ ໜ້າທີ່ ຂອງສະພາປະຊາຊົນຂັ້ນແຂວງ, ກົງຈັກພາຍໃນສະພາປະຊາຊົນແຂວງ ໃຫ້ແກ່ບັນດາທ່ານ ສສຊ ປະຈໍາເຂດເລືອກຕັ້ງ, ສສຂ ຊຸດທີ II, ອົງການຈັດຕັ້ງມະຫາຊົນ, ບັນດາພະແນກການ, ອົງການອ້ອມຂ້າງແຂວງ, ພະນັກງານຊ່ວຍວຽກ ສສຂ ປະຈໍາເມືອງ ແລະ ພະນັກງານ-ລັດຖະກອນ ສພຂ ແລະ ສ້າງຄວາມເຂັ້ມແຂງ ໃນການລົງເຄື່ອນໄຫວຕິດຕາມ ກວດກາ ການເຄົາລົບ ແລະ ປະຕິບັດລັດຖະທໍາມະນຸນ, ກົດໝາຍ, ນິຕິກໍາໃຕ້ກົດໝາຍ, ມະຕິກອງປະຊຸມຂອງສະພາປະຊາຊົນແຂວງ, ມະຕິກອງປະຊຸມຂອງຄະນະປະຈໍາສະພາປະຊາຊົນແຂວງ, ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ຂອງອົງການບໍລິຫານລັດ, ອົງການໄອຍະການປະຊາຊົນ, ສານປະຊາຊົນ, ອົງການກວດສອບແຫ່ງລັດ; ທັງເປັນການສ້າງເງື່ອນໄຂໃຫ້ ສພຂ ແຂວງຜົ້ງສາລີ ໃນການປະຕິບັດພາລະບົດ, ສິດ ແລະ ໜ້າທີ່ຂອງຕົນ ໃນການເພີ່ມທະວີຄວາມສັກສິດ ແຫ່ງການຄຸ້ມຄອງເສດຖະກິດ-ສັງຄົມ, ການສືບຕໍ່ສ້າງ ແລະ ປັບປຸອໍານາດລັດຂອງແຂວງຜົ້ງສາລີໃຫ້ມີຄວາມເຂັ້ມແຂງ

ທີ່ປະຊຸມ ຫຼັງຈາກ ທ່ານ ນາງ ຈັນສະຫວັນ ແກ້ວກອງຕັນ ຮອງເລຂາທິການສະພາປະຊາຊົນແຂວງ, ຫົວໜ້າກອງເລຂາກອງປະຊຸມ ສະເໜີຈຸດປະສົງ ແລະ ຜ່ານມະຕິຕົກລົງ ວ່າດ້ວຍການດໍາເນີນກອງປະຊຸມຝຶກອົບຮົມແລ້ວ, ໄດ້ຮັບຟັງທ່ານ ສົມຈິດ ຫັບລະກອນ ຮອງປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 2, ຮອງປະທານຄະນະປະຈໍາສະພາປະຊາຊົນແຂວງ ຂຶ້ນນໍາສະເໜີ ພາລະບົດບາດ ສິດ ແລະ ໜ້າທີ່ ຂອງຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 2; ຮັບຟັງທ່ານ ຫຸມເພັງ ຈອມວິສານ ຮອງປະທານ ຄປຈຂ ຂຶ້ນ ນໍາສະເໜີ ພາລະບົດບາດ ສິດ ແລະ ໜ້າທີ ຂອງສະພາປະຊາຊົນແຂວງ, ພາລະບົດບາດ ສິດ ແລະ ໜ້າທີ່ ຂອງຄະນະປະຈໍາສະພາປະຊາຊົນແຂວງ ແລະ ຂອງຄະນະສະມາຊິກສະພາປະຊາຊົນແຂວງ ປະຈໍາເມືອງ; ຮັບຟັງທ່ານ ພັທ ຄໍາດາ ໂສລະພົມ ປະທານ ຄະນະກໍາມະການຍຸຕິທໍາ ແລະ ປກຊ-ປກສ (ຄຍປປ)  ຂຶ້ນນໍາສະເໜີ ພາລະບົດບາດ ສິດ ແລະ ໜ້າທີ່ ຂອງຄະນະກໍາມະການ ຍຸຕິທໍາ ແລະ ປກຊ-ປກສ; ຮັບຟັງທ່ານ ສຸວັນຟູ ລາວລີ ຮອງປະທານຄະນະກໍາມະການເສດຖະກິດ, ແຜນການ ແລະ ການເງິນ ຂຶ້ນນໍາສະເໜີ ພາລະບົດບາດ ສິດ ແລະ ໜ້າທີ່ ຂອງຄະນະກໍາມະການ ເສດຖະກິດ,ແຜນການ ແລະ ການເງິນ; ທ່ານ ສົມຈິດ ລາວຈູງ ປະທານຄະນະກໍາມະການວັດທະນະທໍາ-ສັງຄົມ ແລະ ບັດເຜົ່າ ຂຶ້ນ ນໍາສະເໜີ ພາລະບົດບາດ ສິດ ແລະ ໜ້າທີ່ ຂອງຄະນະກໍາມະການ ວັດທະນະທໍາ-ສັງຄົມ ແລະ ບັນດາເຜົ່າ;

ຮັບຟັງທ່ານ ນາງ ພອນສະຫວັນ ສັກຕິຄຸນ ເລຂາທິການ ສພຂ ຂຶ້ນນໍາສະເໜີ ພາລະບົດບາດ ສິດ ແລະ ໜ້າທີ່ ຂອງຄະນະເລຂາທິການສະພາປະຊາຊົນຂັ້ນແຂວງ ແລະ ການຍົກສູງຄວາມຮູ້, ຄວາມສາມາດ ໃນການເປັນເສນາທິການທີ່ດີທາງດ້ານ ເນື້ອໃນ ແລະ  ການບໍລິຫານ ໃຫ້ແກ່ຄະນະປະຈໍາສະພາປະຊາຊົນແຂວງ; ຮັບຟັງ ທ່ານ ປອ ສາຍທອງ ພົມມະວົງ ຫົວໜ້າກົມແຜນການ ແລະ ການລົງທຶນ, ກໍາມາທິການແຜນການ, ການເງິນ ແລະ ການກວດສອບ ສພຊ ຂຶ້ນນໍາສະເໜີ ການພິຈາລະນາ ຂອງສະພາແຫ່ງຊາດ ແລະ ສະພາປະຊາຊົນແຂວງ ກ່ຽວກັບໂຄງການລົງທຶນຂອງລັດໃນແຕ່ລະປີ ແລະ ການຕິດຕາມກວດກາ ການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ, ການຕິດຕາມກວດກາ ການຈັດຕັ້ງປະຕິບັດ ແຜນງົບປະມານ.

ຈາກນັ້ນ, ຜູ້ແທນກອງປະຊຸມກໍໄດ້ແລກປ່ຽນແລກບົດຮຽນ, ປະກອບຄໍາຄິດຄໍາເຫັນຕໍ່ກັບບັນດາເນື້ອໃນທີ່ນໍາສະເໜີ ດ້ວຍຄວາມຮັບຜິດຊອບສູງ, ກົງໄປກົງມາ ແລະ ດ້ວຍບັນຍາກາດສ້າງສັນ.

ມາໃນຕອນທ້າຍຂອງກອງປະຊຸມ ທ່ານ ທອງສີ ເສົາສຸລິພົມ ໄດ້ສັງລວມຄືນຜົນກອງປະຊຸມຝືກອົບໃນຄັ້ງນີ້. ຊິ່ງສັງເກດເຫັນໄດ້ວ່າ ຫຼາຍພາກສ່ວນມີຄວາມຮັບຮູ້, ເຂົ້າໃຈ ແລະ ໃຫ້ຄວາມສົນໃຈຕໍ່ບັນດາເນື້ອໃນດັ່ງເປັນຢ່າງດີ, ສະແດງອອກ ຈາກການປະກອບຄວາມຄິດຄວາມເຫັນຂອງຜູ້ເຂົ້າຮ່ວມ ແລະ ພາກສ່ວນກ່ຽວຂ້ອງ.

ກອງປະຊຸມຝືກອົບຮົມໃຫ້ແກ່ ສສຊ ປະຈໍາເຂດເລືອກຕັ້ງ 2, ສສຂ, ບັນດາພະແນການ, ອົງການອ້ອມຂ້າງແຂວງ ແລະ ພາກສ່ວນທີ່ກ່ຽວຂ້ອງ ແມ່ນໄດ້ຮັບການສະໜັບສະໜູນຈາກ ໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ (STEPs).

ພາບ-ຂ່າວ: ສູນທອງ