ຕອນບ່າຍຂອງວັນທີ 27 ມີນາ 2024 ນີ້, ທ່ານ ຂັນໄຊ ລັດຖະເຮົ້າ ຄະນະປະຈຳພັກແຂວງ ຮອງປະທານສະພາປະຊາຊົນແຂວງສາລະວັນ ຕາງໜ້າຄະນະປະຈໍາສະພາປະຊາຊົນແຂວງ ສົມທົບກັບສະມາຊິກສະພາປະຊາຊົນແຂວງ ປະຈໍາເມືອງເລົ່າງາມ ແລະ ອົງການປົກຄອງເມືອງ ລົງເຄື່ອນໄຫວຢ້ຽມຢາມຕິດຕາມ ຄອບຄົວຂອງ ທ້າວ ຄຳລຽນ ອາຍຸ 70 ປີ ອາຊີບຊາວສວນ ທີ່ປະສົບເຄາະຮ້າຍ ເກີດອັກຄີໄພ ໄຟໄໝ້ເຮືອນໝົດຫຼັງ ຢູ່ທີ່ບ້ານພໍ່ເຂັມ ເມືອງເລົ່າງາມ ແຂວງສາລະວັນ, ອີງຕາມການລາຍງານຂອງທ່ານນາຍບ້ານພໍ່ເຂັມ ໃຫ້ຮູ້ວ່າ: ເຫດການໄຟໄໝ້ ເກີດຂຶ້ນຕອນເວລາ 14:20 ໂມງ, ຂອງວັນທີ 25 ມີນາ 2024 ຈຸດເກີດໄຟໄໝ້ຢູ່ຄົວເຮືອນແຕ່ງກິນ ແລະ ໄຟໄດ້ລຸກລາມ ເຮັດໃຫ້ໄຟໄໝ້ຢ່າງຮຸ່ນແຮງ ບໍ່ສາມາດຄວບຄຸມດັບໄຟໄດ້ທັນ, ເຮັດໃຫ້ໄຟໄໝ້ເຮືອນໄມ້ໝົດຫຼັງ ມີເຄື່ອງໃຊ້ໃນຄົວເຮືອນ, ເຄື່ອງປູກຝັງ, ພາຫະນະ ແລະ ເງິນສົດ ເສຍຫາຍລວມມູນຄ່າ 237 ລ້ານກວ່າກີບ, ແຕ່ໂຊກດີບໍ່ມີຜູ້ບາດເຈັບ ແລະ ບໍ່ມີຜູ້ເສຍຊີວິດ;

ໂອກາດດັ່ງກ່າວ ທ່ານຮອງປະທານສະພາປະຊາຊົນແຂວງ ໄດ້ສະແດງຄວາມເປັນຫ່ວງເປັນໃຍ, ເສຍໃຈຕໍ່ເຫດການທີ່ເກີດຂຶ້ນ ພ້ອມໃຫ້ກໍາລັງໃຈ ຟື້ນຟູຈິດໃຈໃຫ້ເຂົ້າສູ່ປົກກະຕິ, ພ້ອມດຽວກັນກໍ່ໄດ້ມອບເງິນສົດ ຈໍານວນ 5 ແສນກີບ ແລະ ເຄື່ອງໃຊ້ໃນຄົວເຮືອນ ລວມມູນຄ່າ 2 ລ້ານກີບ ມອບໃຫ້ແກ່ຄອບຄົວ ທ້າວ ຄຳລຽນ ເພື່ອເປັນການຊ່ວຍເຫຼືອແບ່ງເບົາບັນເທົາທຸກໃນເບື້ອງຕົ້ນ;

ພາບ-ຂ່າວ: ດີລໍາພົນ ພົມມະຈັນ