ກອງປະຊຸມທາບທາມຄຳຄິດເຫັນໃສ່ຮ່າງປັບປຸງກົດໝາຍ 03 ສະບັບ ໃນຂົງເຂດສະພາແຫ່ງຊາດ ແລະ ສະພາປະຊາຊົນຂັ້ນແຂວງ ໄດ້ດຳເນີນຂຶ້ນໃນລະຫວ່າງ ວັນທີ 25-26 ມີນາ 2024 ຢູ່ນະຄອນຫຼວງວຽງຈັນ, ເຊິ່ງຄະນະປະຈຳ ສະພາປະຊາຊົນ ນະຄອນຫຼວງວຽງຈັນ ນຳໂດຍ ທ່ານ ອານຸພາບ ຕຸນາລົມ ຄະນະປະຈຳ, ປະທານ ຄະນະສະມາຊິກ ສະພາແຫ່ງຊາດ ຊຸດທີ IX ປະຈຳເຂດເລືອກຕັ້ງທີ 1, ປະທານ ສະພາປະຊາຊົນ ນະຄອນຫຼວງ ໄດ້ນຳພາຄະນະ ຕ້ອນຮັບການລົງເຮັດວຽກຂອງ ທ່ານ ສຈ. ປອ. ຈະເລີນ ເຍຍປາວເຮີ ຄະນະປະຈຳ, ຮອງປະທານ ສະພາແຫ່ງຊາດ, ປະທານ ກຳມາທິການກົດໝາຍ ພ້ອມດ້ວຍຄະນະ ທີ່ໄດ້ລົງເຄື່ອນໄຫວດຳເນີນກອງປະຊຸມທາບທາມຄຳຄິດເຫັນໃສ່ຮ່າງປັບປຸງກົດໝາຍ 3 ສະບັບ ຄື: 1) ຮ່າງກົດໝາຍວ່າດ້ວຍສະພາແຫ່ງຊາດ; 2) ຮ່າງກົດໝາຍວ່າດ້ວຍສະພາປະຊາຊົນຂັ້ນແຂວງ; 3) ຮ່າງກົດໝາຍວ່າດ້ວຍການເລືອກຕັ້ງສະມາຊິກ ສະພາແຫ່ງຊາດ ແລະ ສະມາຊິກ ສະພາປະຊາຊົນຂັ້ນແຂວງ. ເຂົ້າຮ່ວມກອງປະຊຸມຄັ້ງນີ້ ມີບັນດາທ່ານ ຮອງປະທານ ຄະນະສະມາຊິກ ສະພາແຫ່ງຊາດ ປະຈຳເຂດເລືອກຕັ້ງທີ 1 ນວ, ບັນດາທ່ານ ຮອງປະທານ ສະພາປະຊາຊົນ ນວ, ສະມາຊິກ ສະພາແຫ່ງຊາດ ປະຈຳເຂດເລືອກຕັ້ງທີ 1 ນວ, ສະມາຊິກ ສະພາປະຊາຊົນ ນວ, ບັນດາທ່ານຫົວໜ້າພະແນກການ ແລະ ອົງການລັດທຽບເທົ່າພະແນກ ອ້ອມຂ້າງນະຄອນຫຼວງ ແລະ ພະນັກງານຫຼັກແຫຼ່ງເຂົ້າຮ່ວມທັງໝົດ 91 ທ່ານ, ຍິງ 27 ທ່ານ.

ກອງປະຊຸມ ໄດ້ຮັບຟັງການສະເໜີ ແລະ ຄົ້ນຄວ້າປະກອບຄຳເຫັນ ຕໍ່ການທາບທາມຮ່າງກົດໝາຍ 03 ສະບັບ. ໂດຍລວມ, ບັນດາທ່ານຜູ້ແທນປະຊາຊົນ ໄດ້ເຫັນດີຕໍ່ການປັບປຸງແຕ່ລະກົດໝາຍ ແລະ ສະເໜີໃຫ້ປັບປຸງຄືນເນື້ອໃນຂອງບາງມາດຕາ ໃຫ້ມີເນື້ອໃນຄົບຖ້ວນ, ຮັດກຸມ, ສອດຄ່ອງກັບສະພາບຄວາມເປັນຈິງ ແລະ ສາມາດຈັດຕັ້ງປະຕິບັດໄດ້. ພ້ອມດຽວກັນນີ້, ບັນດາທ່ານຜູ້ແທນປະຊາຊົນ ກໍໄດ້ປະກອບຄຳຄິດເຫັນ ໃສ່ຄຳຖາມເຈາະຈີ້ມຂອງທ່ານ ປະທານ ກອງປະຊຸມ ໂດຍສະເພາະແມ່ນບັນດາເນື້ອໃນທີ່ໄດ້ປັບປຸງ, ເພີ່ມເຂົ້າ ແລະ ຕັດອອກ ບາງມາດຕາ ເຊັ່ນ: ທີ່ຕັ້ງ, ພາລະບົດບາດ, ສິດ ແລະ ໜ້າທີ່ ຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ; ການອະທິບາຍຄຳສັບ; ການສັງກັດ, ການຄວບຕຳແໜ່ງ ແລະ ການຍົກຍ້າຍ ຂອງສະມາຊິກ ສະພາແຫ່ງຊາດ; ການປະຕິບັດນະໂຍບາຍ ຕໍ່ບັນດາທ່ານຜູ້ແທນ; ການກຳນົດມາດຖານເງື່ອນໄຂ ຂອງຜູ້ທີ່ຈະເປັນຄະນະປະຈຳ ສະພາແຫ່ງຊາດ ເຊິ່ງເປັນມາດຕາທີ່ເພີ່ມເຂົ້າໃໝ່; ການກຳນົດມາດຖານເງື່ອນໄຂ ຂອງຜູ້ທີ່ຈະລົງສະໝັກຮັບເລືອກຕັ້ງ ແລະ ບັນຫາອື່ນໆອີກຈຳນວນໜຶ່ງ.

(ນາງ ພອນທິບ ອິນທິລາດ)