ໃນຕອນເຊົ້າຂອງວັນທີ 25 ມີນາ 2024 ນີ້,ສະພາປະຊາຊົນແຂວງວຽງຈັນ,ໄດ້ຈັດພິທີມອບ-ຮັບລົດຮັບສົ່ງຄົນເຈັບຈຳນວນ 10 ຄັນລະຫວ່າງສະພາປະຊາຊົນແຂວງກິຢອງຊັງນຳ-ໂດ ສ.ເກົາຫລີ ແລະ ສະພາປະຊາຊົນແຂວງວຽງຈັນ ສປປ ລາວ. ຢູ່ທີ່ຫ້ອງປະຊຸມຊັ້ນ 2 ຂອງຫ້ອງວ່າການແຂວງວຽງຈັນ,ໂດຍເປັນກຽດເຂົ້າຮ່ວມຂອງ ທ່ານ ຄຳພັນ ສິດທິດຳພາ ເຈົ້າແຂວງວຽງຈັນ, ທ່ານ ປາກ ແຮຢັງ ປະທານຄະນະກຳມະການ ກໍ່ສ້າງ ແລະ ປ້ອງກັນອັກຄີໄພ ສະພາປະຊາຊົນແຂວງ ກີຢອງຊັງນໍາ-ໂດ ສ.ເກົາຫຼີ, ພ້ອມດ້ວຍຄະນະ, ມີບັນດາທ່ານຄະນະປະຈໍາພັກແຂວງ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງ, ຄະນະກຳມະການພັກແຂວງ, ຄະນະເລຂາທິການ ແລະ ພະນັກງານວິຊາການເຂົ້າຮ່ວມ.
ທ່ານ ບຸນສອນ ເພັດລາວັນ ປະທານສະພາປະຊາຊົນແຂວງວຽງຈັນກ່າວ ເນື່ອງໃນໂອກາດທີ່ ຄະນະຜູ້ແທນສະພາປະຊາຊົນແຂວງ ກີຢອງຊັງນໍາ-ໂດ ສ ເກົາຫຼີ ມາຢ້ຽມຢາມ ແລະ ມອບລົດໃຫ້ ສະພາປະຊາຊົນແຂວງວຽງຈັນ ຄັ້ງນີ້ວ່າ: ຂ້າພະເຈົ້າຮູ້ສຶກພາກພູມໃຈເປັນຢ່າງຍິ່ງ ທີ່ໄດ້ຕາງໜ້າຄະນະປະຈໍາສະພາປະຊາຊົນແຂວງວຽງຈັນ ຕ້ອນຮັບຄະນະຜູ້ແທນສະພາປະຊາຊົນແຂວງ ກີຢອງຊັງນໍາ-ໂດ ສ ເກົາຫຼີ ທີ່ມາຢ້ຽມຢາມ ແລະ ມອບລົດ ອາບູລັງ ໃຫ້ແກ່ສະພາປະຊາຊົນແຂວງວຽງຈັນ, ເຊິ່ງນຳພາໂດຍ ທ່ານ ປາກ ແຮຢັງ ປະທານຄະນະກຳມະການ ກໍ່ສ້າງ ແລະ ປ້ອງກັນອັກຄີໄພ ສະພາປະຊາຊົນແຂວງ ກີຢອງຊັງນໍາ-ໂດ ສ.ເກົາຫຼີ ຖືໄດ້ວ່າເປັນຄັ້ງທີ 3 ທີ່ຄະນະຜູ້ແທນຂອງແຂວງ ກີຢອງຊັງນໍາ ສ ເກົາຫຼີ ໄດ້ມາຢ້ຽມຢາມ ສະພາປະຊາຊົນແຂວງວຽງຈັນ,ໃນໄລຜ່ານມາກໍ່ໄດ້ຮັບການຊ່ວຍເຫຼືອ ຈາກ ສ.ເກົາຫຼີ ມາໂດຍດີຕະຫຼອດໃນນັ້ນກໍ່ມີ:ມູນນິທິ ໂຣຕາຣີ ສ.ເກົາຫຼີ ໄດ້ຊ່ວຍສ້ອມແປງ ໂຮງຮຽນ ອານຸບານ-ຫໍພັກຄູ 187 ລ້ານກີບ, ຊ່ວຍ ສຸກສາລາ 2 ແຫ່ງ 127 ລ້ານກີບ, ໂຮງຮຽນສາທາລະນະສຸກ 60 ລ້ານກີບ ແລະ ອຸປະກອນການສຶກສາໃຫ້ໂຮງຮຽນຕ່າງໆ, ຊ່ວຍໂນດບຸກ 20 ໜ່ວຍໃຫ້ພະແນກສາທາ,ມູນນິທິ ໂກຼບອນໄລ້ແຊຣີງ ໄດ້ຊ່ວຍຢາປິ່ນປົວພະຍາດໃຫ້ສາທາແຂວງ ຊຸດທີ 1 ເພື່ອຈັດສັນໃຫ້ ໂຮງໝໍແຂວງ, ໂຮງໜໍ 11 ເມືອງ ແລະ ສຸກສາລາ 50 ແຫ່ງມູນຄ່າ 17 ຕື້ກວ່າກີບ ຊຸດທີ 2 ມູນຄ່າ 2,9 ຕື້ກວ່າກີບ ແລະ ໃນມື້ນີ້ ຂ້າພະເຈົ້າ ຕາງໜ້າຄະນະປະຈໍາສະພາປະຊາຊົນແຂວງ ຂໍສະແດງຄວາມຂອບ ອົກຂອບໃຈຢ່າງສູງ ມາຍັງທ່ານ ປາກ ແຮຢັງ ປະທານຄະນະກຳມະການ ກໍ່ສ້າງ ແລະ ປ້ອງກັນອັກຄີໄພ ສະພາປະຊາຊົນແຂວງ ກີຢອງຊັງນໍາ-ໂດ ສ.ເກົາຫຼີ ທີ່ໄດ້ໃຫ້ການຊ່ວຍເຫຼືອ ມອບລົດ ອາບູລັງ ຈໍານວນ 10 ຄັນ, ລວມມູນຄ່າ 200,000 ໂດລາ ເພື່ອນໍາໃຊ້ເຂົ້າໃນວຽກງານສາທາລະນະສຸກແຂວງ ໂດຍຈະໄດ້ມອບ ໃຫ້ສຸກສາລາ ແລະ ອົງການ ທີ່ມີຄວາມຈໍາເປັນຈະໄດ້ນໍາໃຊ້ເຂົ້າໃນການນຳສົ່ງຄົນເຈັບໄປຫາບ່ອນມີເງື່ອນໄຂ ໂດຍສະເພາະຜູ້ເປັນແມ່ມານ ແລະ ເດັກເກີດ ໃໝ່ ເພື່ອເປັນການຫຼຸດຜ່ອນອັດຕາການເສຍຊີວິດລົງເທື່ອລະກ້າວ.
ໃນຕອນທ້າຍຍັງໄດ້ມີການມອບ-ຮັບລົດອາບູລັງຈຳນວນ 10 ຄັນ, ກ່າວມອບໂດຍ ທ່ານ ປາກ ແຮຢັງ ປະທານຄະນະກຳມະການ ກໍ່ສ້າງ ແລະ ປ້ອງກັນອັກຄີໄພ ສະພາປະຊາຊົນແຂວງ ກີຢອງຊັງນໍາ-ໂດ ສ.ເກົາຫຼີ ແລະ ຮັບໂດຍ ທ່ານ ບຸນສອນ ເພັດລາວັນ ປະທານສະພາປະຊາຊົນແຂວງວຽງຈັນ,ເຂົ້າຮ່ວມເປັນສັກຂີພິຍານຂອງທ່ານ ຄຳພັນ ສິດທິດຳພາ ເຈົ້າແຂວງວຽງຈັນ ພ້ອມກັບມອບໃບຍ້ອງຍໍໃຫ້ແກ່ສະພາປະຊາຊົນແຂວງ ກີຢອງຊັງນໍາ-ໂດ ສ.ເກົາຫຼີອີກດ້ວຍ.
ພາບ-ຂ່າວ ບູລາຕີ ແສນທະວົງ