ຕອນບ່າຍຂອງວັນທີ 25 ມີນາ 2024 ນີ້, ຢູ່ທີ່ຫ້ອງປະຊຸມສະພາປະຊາຊົນແຂວງສາລະວັນ ໄດ້ເປີດກອງປະຊຸມ ສອງວາລະຄື ກອງປະຊຸມ ສະຫຼຸບການເຄື່ອນໄຫວວຽກງານຂອງຄະນະປະຈໍາ ສະພາປະຊາຊົນແຂວງສາລະວັນ ປະຈໍາເດືອນ ມີນາ 2024 ແລະ ວາງທິດທາງແຜນການ ປະຈໍາເດືອນ ເມສາ 2024 ແລະ ກອງປະຊຸມ ສະຫຼຸບການເຄື່ອນໄຫວວຽກງານຂອງຄະນະສະມາຊິກສະພາແຫ່ງຊາດ ເຂດເລືອກຕັ້ງ 14 ປະຈໍາເດືອນ ມີນາ 2024 ແລະ ວາງທິດທາງແຜນການ ປະຈໍາເດືອນ ເມສາ 2024; ໂດຍການເປັນປະທານຂອງທ່ານ ສີເຮັງ ຫອມສົມບັດ ຮອງເລຂາພັກແຂວງ ປະທານຄະນະປະຈໍາສະພາປະຊາຊົນແຂວງສາລະວັນ, ປະທານຄະນະສະມາຊິກສະພາແຫ່ງຊາດ ເຂດເລືອກຕັ້ງ 14; ເຂົ້າຮ່ວມມີ ທ່ານ ຂັນໄຊ ລັດຖະເຮົ້າ ຄະນະປະຈໍາພັກແຂວງ ຮອງປະທານຄະນະປະຈໍາສະພາປະຊາຊົນແຂວງສາລະວັນ, ຮອງປະທານຄະນະສະມາຊິກສະພາແຫ່ງຊາດ ເຂດເລືອກຕັ້ງ 14; ມີບັນດາທ່ານຄະນະປະຈໍາສະພາປະຊາຊົນແຂວງ, ຄະນະສະມາຊິກສະພາແຫ່ງຊາດ, ຮອງປະທານຄະນະກຳມະການ, ຄະນະເລຂາທິການ, ຫົວໜ້າ-ຮອງຫົວໜ້າຂະແໜງ ເຂົ້າຮ່ວມ;
ໃນທີ່ປະຊຸມ ທ່ານ ບຸນໂຮມ ບົວວິໄລ ຮອງເລຂາທິການ ສະພາປະຊາຊົນແຂວງ ໄດ້ຜ່ານສອງເອກະສານຄື: ຮ່າງບົດສະຫຼຸບການເຄື່ອນໄຫວວຽກງານຂອງຄະນະປະຈໍາ ສະພາປະຊາຊົນແຂວງສາລະວັນ ປະຈໍາເດືອນ ມີນາ 2024 ແລະ ວາງທິດທາງແຜນການ ປະຈໍາເດືອນ ເມສາ 2024 ແລະ ຮ່າງບົດສະຫຼຸບການເຄື່ອນໄຫວວຽກງານຂອງຄະນະສະມາຊິກສະພາແຫ່ງຊາດ ເຂດເລືອກຕັ້ງ 14 ປະຈໍາເດືອນ ມີນາ 2024 ແລະ ວາງທິດທາງແຜນການ ປະຈໍາເດືອນ ເມສາ 2024 ໂດຍລວມ ໃນໄລຍະໜຶ່ງເດືອນຜ່ານມາ ໄດ້ເອົາໃຈໃສ່ຊີ້ນໍາ-ນໍາພາ ການເຄື່ອນໄຫວປະຕິບັດໜ້າທີ່ວຽກງານຂອງຕົນດ້ວຍຄວາມຮັບຜິດຊອບສູງຕາມ 3 ພາລະບົດບາດ ແລະ ມີຜົນສຳເລັດໃນຫຼາຍດ້ານ ຍ້ອນໄດ້ຮັບການຊີ້ນໍາ-ນໍາພາຢ່າງໃກ້ຊິດ ຈາກຄະນະປະຈໍາສະພາແຫ່ງຊາດ ແລະ ຄະນະປະຈໍາພັກແຂວງ; ມີການກໍານົດແຜນການເຄື່ອນໄຫວວຽກງານຂອງຕົນ ຢ່າງເປັນລະບົບຕໍ່ເນື່ອງ ໃນແຕ່ລະເດືອນ ມີລະບອບການສ່ອງແສງລາຍງານຢ່າງເປັນປົກກະຕິ; ໄດ້ຮັບການຮ່ວມມືສະໜັບສະໜູນຈາກສະພາແຫ່ງຊາດ ແລະ ອໍານາດການປົກຄອງຂັ້ນຕ່າງໆຂອງແຂວງ ເພື່ອສ້າງສິ່ງເອື້ອອໍານວຍຄວາມສະດວກໃນການເຄື່ອນໄຫວປະຕິບັດໜ້າທີ່ວຽກງານ; ຈາກນັ້ນ, ໃນທີ່ປະຊຸມກໍ່ໄດ້ປຶກສາຫາລື ແລະ ເອກະພາບກັນ ກຳນົດແຜນວຽກສືບຕໍ່ຈຳນວນໜຶ່ງ ປະຈໍາເດືອນ ເມສາ 2024 ເປັນຕົ້ນ: ສືບຕໍ່ຊຸກຍູ້ອົງການປົກຄອງແຂວງ ໃນການປັບປຸງເນື້ອໃນ ຮ່າງນິຕິກໍາສໍາຄັນຂອງແຂວງ ທີ່ຈະນໍາເຂົ້າພີຈາລະນາ, ຮັບຮອງໃນກອງປະຊຸມສະໄໝສາມັນ ເທື່ອທີ 07 ຂອງສະພາປະຊາຊົນແຂວງ ຊຸດທີ II, ກະກຽມການສ້າງແຜນການສ້າງ ແລະ ປັບປຸງນິຕິກໍາໃຕ້ກົດໝາຍໄລຍະຫ້າປີ (2026-2030); ປະສານສົມທົບ ຊຸກຍູ້ອົງການປົກຄອງ ກໍຄືບັນດາພະແນກການ ແລະ ອົງການປົກຄອງເມືອງ ເພື່ອຜັນຂະຫຍາຍບັນດາມະຕິ ແຍກບັນດາຄາດໝາຍໃຫ້ເປັນອັນສະເພາະໃນແຕ່ລະຂົງເຂດວຽກງານ ເພື່ອສະດວກໃນການຈັດ ຕັ້ງປະຕິບັດ ແລະ ຕິດຕາມກວດກາບັນດາຄາດໝາຍຕ່າງໆ; ເອົາໃຈໃສ່ຕິດຕາມກວດກາຊຸກຍູ້ພາກສ່ວນທີ່ກ່ຽວຂ້ອງໃນການຄົ້ນຄ້ວາພິຈາລະນາແກ້ໄຂຄໍາຮ້ອງຂໍຄວາມເປັນທໍາ, ຄໍາສະເໜີ ແລະ ຄໍາຮ້ອງຟ້ອງຂອງປະຊາຊົນໃຫ້ໄດ້ຮັບການແກ້ໄຂ, ກະກຽມເດີນທາງໄປພົບປະແລກປ່ຽນບົດຮຽນ ຢູ່ທີ່ສະພາປະຊາຊົນແຂວງຫຼວງນ້ຳທາ;
ພາບ-ຂ່າວ: ດີລຳພົນ ພົມມະຈັນ