(ສພຊ) ກອງປະຊຸມເຝິກອົບຮົມການນໍາໃຊ້ຖານຂໍ້ມູນຄຸ້ມຄອງວຽກງານຄໍາຮ້ອງຂໍຄວາມເປັນທໍາຂອງຄະນະປະຈໍາສະພາແຫ່ງຊາດ ໄດ້ຈັດຂຶ້ນໃນວັນທີ 25 ມີນາ 2024 ຢູ່ໂຮງແຮມແລນມາກ, ນະຄອນຫຼວງວຽງຈັນ ໂດຍການເປັນປະທານຂອງທ່ານ ສີສູນທອນ ສ.ຜາບມີໄຊຍ໌ ຮອງປະທານກຳມາທິການຍຸຕິທຳ; ເຂົ້າຮ່ວມມີບັນດາທ່ານຄະນະກົມ, ຄະນະພະແນກ, ວິຊາການຂອງກຳມາທິການຍຸຕິທຳ ແລະ ພະນັກງານຂາເຂົ້າ-ຂາອອກຂອງບັນດາກຳມາທິການ ແລະ ຄະນະເລຂາທິການ ພາຍໃນສະພາແຫ່ງຊາດ ພ້ອມດ້ວຍພາກສ່ວນກ່ຽວຂ້ອງ. ທັງນີ້, ກໍເພື່ອຮັບປະກັນການປະຕິບັດວຽກງານຂອງພະນັກງານ-ລັດຖະກອນ ທີ່ເຮັດໜ້າທີ່ວຽກງານຄຸ້ມຄອງຂໍ້ມູນກ່ຽວກັບຄໍາຮ້ອງຂໍຄວາມເປັນທໍາ ໃຫ້ມີຄວາມຮັບຮູ້, ເຂົ້າໃຈ ແລະ ເປັນເອກະພາບ ໃນການນໍາໃຊ້ລະບົບການຄຸ້ມຄອງສະຖິຕິຄໍາຮ້ອງຂໍຄວາມເປັນທໍາ.

ທ່ານ ສີສູນທອນ ສ.ຜາບມີໄຊຍ໌ ໄດ້ກ່າວເປີດກອງປະຊຸມ ເຊິ່ງທ່ານໃຫ້ຮູ້ວ່າ: ການສ້າງຖານຂໍ້ມູນ ແມ່ນເພື່ອຄຸ້ມຄອງຂໍ້ມູນກ່ຽວກັບຄໍາຮ້ອງຂໍຄວາມເປັນທໍາຂອງຄະນະປະຈໍາສະພາແຫ່ງຊາດ ທີ່ເຂົ້າມາໃນສະພາແຫ່ງຊາດ ໂດຍສະ ເພາະການຄຸ້ມຄອງວຽກງານສະຖິຕິຄໍາຮ້ອງຂໍຄວາມເປັນທໍາ ດ້ວຍຮູບແບບເອເລັກໂຕຼນິກທີ່ເປັນລະບົບທັນສະໄໝ, ສາ ມາດຕິດຕາມກວດກາການຈໍລະຈອນເອກະສານ, ກໍານົດເວລາໃນການພິຈາລະນາ, ການລາຍງານການຕົກລົງຂອງຄະນະປະຈໍາສະພາແຫ່ງຊາດ ແລະ ການລາຍງານຄືນຜົນການແກ້ໄຂຂອງອົງການທີ່ກ່ຽວຂ້ອງ ກ່ຽວກັບຄໍາຮ້ອງຂໍຄວາມເປັນ ທໍາ ໃຫ້ມີຄວາມສະດວກ, ວ່ອງໄວ ແລະ ຮັບປະກັນຄວາມຖືກຕ້ອງ.

ໃນວາລະກອງປະຊຸມ, ໄດ້ຮັບຟັງການນຳສະເໜີກ່ຽວກັບຖານຂໍ້ມູນຄຸ້ມຄອງວຽກງານຄໍາຮ້ອງຂໍຄວາມເປັນທໍາຂອງຄະນະປະຈໍາສະພາແຫ່ງຊາດ ໂດຍທ່ານ ທິນນະກອນ ບົວສະຫວັນ ວິທະຍາກອນຈາກບໍລິສັດ MTS; ພ້ອມນັ້ນ, ສຳມະນາກອນທັງໝົດໄດ້ທົດລອງນຳໃຊ້ການປ້ອນຂໍ້ມູນຄຳຮ້ອງເຂົ້າລະບົບດັ່ງກ່າວ ທັງໄດ້ແລກປ່ຽນຄຳຄິດຄຳເຫັນ, ຖອດຖອນບົດຮຽນຮ່ວມກັນຢ່າງກົງໄປກົງມາ ລະຫວ່າງວິທະຍາກອນ ກັບ ສຳມະນາກອນ ເພື່ອໃຫ້ຜູ້ທີ່ຈະນຳໃຊ້ຕົວຈິງມີຄວາມເຂົ້າໃຈໃນການນຳໃຊ້ ແລະ ເພື່ອເຮັດໃຫ້ຖານຂໍ້ມູນມີຄວາມສົມບູນ, ສາມາດນໍາໃຊ້ເຂົ້າໃນການປະຕິບັດວຽກງານຕົວຈິງໃນຕໍ່ໜ້າຢ່າງມີປະສິດທິພາບ ແລະ ປະສິດທິຜົນ.

ກອງປະຊຸມຄັ້ງນີ້ ໄດ້ຮັບການສະໜັບສະໜູນທາງດ້ານງົບປະມານຈາກມູນນິທິ ເວສທ໌ມິນສ໌ເທີ ເພື່ອປະຊາທິ ປະໄຕ (Westminster Foundation for Democracy-WFD).

(ຂ່າວ ແລະ ພາບ: ນາງ ປາກາລັກ ພົມມີໄຊ)