(ສພຊ) ເພື່ອຕິດຕາມການຈັດຕັ້ງປະຕິບັດກົດໝາຍວ່າດ້ວຍການປະຕິບັດຄຳຕັດສິນຂອງສານ ສະບັບປັບປຸງປີ 2021 ທັງເປັນການເພີ່ມທະວີການຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດຄຳຕັດສິນຂອງສານ ແນໃສ່ຮັບປະ ກັນເຮັດໃຫ້ຄຳຕັດສິນຂອງສານທີ່ໃຊ້ໄດ້ຢ່າງເດັດຂາດ ໄດ້ຮັບການປະຕິບັດຢ່າງເຂັ້ມງວດ, ຄົບຖ້ວນ, ຖືກຕ້ອງຕາມຄຳຕັດສິນ ແລະ ກົດໝາຍທີ່ກຳນົດໄວ້; ເພື່ອເປັນຂໍ້ມູນພື້ນຖານກະກຽມລາຍງານຕໍ່ກອງປະຊຸມຄະນະປະຈຳສະພາແຫ່ງຊາດ (ຄປຈສພຊ) ກໍຄືກອງປະຊຸມສະໄໝສາມັນເທື່ອທີ 7 ຂອງ ສພຊ ຊຸດທີ IX ແລະ ເປັນບ່ອນອີງໃນການປຶກສາຫາ ລື ແລະ ສະເໜີພາກສ່ວນກ່ຽວຂ້ອງ ໃນການຄົ້ນຄວ້າມາດຕະການແກ້ໄຂ.
ໃນລະຫວ່າງວັນທີ 18-20 ມີນາ 2024 ທ່ານ ພົທ. ສຸວອນ ເລືອງບຸນມີ ຮອງປະທານສະພາແຫ່ງຊາດ ພ້ອມດ້ວຍທ່ານ ຄຳແພງ ວິລະພັນ ປະທານກຳມາທິການຍຸຕິທຳ, ທ່ານ ພົຈວ. ມາລາ ວິລະຈິດ ຮອງປະທານກຳມາທິການປ້ອງກັນຊາດ-ປ້ອງກັນຄວາມສະຫງົບ ແລະ ຄະນະຕິດຕາມ ໄດ້ເຄື່ອນໄຫວເຮັດວຽກຢູ່ເຂດເລືອກຕັ້ງທີ 6 ແຂວງຫຼວງພະບາງ, ເຂດເລືອກຕັ້ງທີ 4 ແຂວງອຸດົມໄຊ ແລະ ເຂດເລືອກຕັ້ງທີ 5 ແຂວງບໍ່ແກ້ວ ຕາມລຳດັບ ເຊິ່ງໄດ້ຈັດກອງປະຊຸມຕິດຕາມກວດກາການຈັດຕັ້ງປະຕິບັດຄຳຕັດສິນຂອງສານ ທີ່ຫ້ອງປະຊຸມສະພາປະຊາຊົນແຂວງ (ສພຂ) ໂດຍການເຂົ້າຮ່ວມຂອງບັນດາທ່ານປະທານສະພາປະຊາຊົນແຂວງ, ເຈົ້າແຂວງ-ຮອງເຈົ້າແຂວງ, ສະມາຊິກສະພາແຫ່ງຊາດ (ສສຊ) ປະຈຳເຂດເລືອກຕັ້ງ, ຕາງໜ້າຈາກສານປະຊາຊົນພາກເໜືອ, ໄອຍະການປະຊາຊົນພາກເໜືອ, ບັນດາພະແນກການ ແລະ ອົງການທີ່ກ່ຽວຂ້ອງຂອງ 3 ແຂວງດັ່ງກ່າວ.
ກອງປະຊຸມໄດ້ຮັບຟັງການລາຍງານຂອງພະແນກຍຸຕິທຳແຂວງ ກ່ຽວກັບການຈັດຕັ້ງຜັນຂະຫຍາຍກົດໝາຍວ່າດ້ວຍການຈັດຕັ້ງປະຕິບັດຄຳຕັດສິນຂອງສານ ສະບັບປັບປຸງປີ 2021 ແລະ ສະພາບການຈັດຕັ້ງປະຕິບັດວຽກງານປະຕິ ບັດຄຳຕັດສິນຂອງສານແຕ່ລະຂັ້ນທີ່ມີຄວາມຫຍຸ້ງຍາກ, ສາເຫດທີ່ເຮັດໃຫ້ມີການແກ່ຍາວ, ບໍ່ສາມາດປະຕິບັດໄດ້; ການລາຍງານຂອງກອງບັນຊາການປ້ອງກັນຄວາມສະຫງົບ (ປກສ) ແຂວງ ກ່ຽວກັບສະພາບການຈັດຕັ້ງປະຕິບັດດຳລັດວ່າດ້ວຍຊັບສິນທີ່ຖືກຍຶດ, ອາຍັດ ແລະ ຮິບເປັນຂອງລັດ ສະບັບເລກທີ 280/ນຍ, ລົງວັນທີ 09/8/2022; ການລາຍງານຂອງຄະນະພັກແຂວງ ກ່ຽວກັບສະພາບການປະຕິບັດວຽກງານປະຕິບັດຄຳຕັດສິນຂອງສານແຕ່ລະຂັ້ນ ແລະ ການຈັດຕັ້ງປະຕິບັດດຳລັດວ່າດ້ວຍຊັບສິນທີ່ຖືກຍຶດ, ອາຍັດ ແລະ ຮິບເປັນຂອງລັດ. ຈາກນັ້ນ, ບັນດາທ່ານຜູ້ເຂົ້າຮ່ວມ ໄດ້ປະກອບຄຳຄິດຄຳເຫັນຕາມຄຳເຈາະຈີ້ມຂອງປະທານກອງປະຊຸມ ແລະ ຮັບຟັງຄຳຊີ້ແຈງຈາກຕາງໜ້າພະແນກຍຸຕິທຳແຂວງ, ກອງບັນຊາການ ປກສ ແຂວງ ແລະ ຮັບຟັງການໂອ້ລົມຊີ້ນຳຕໍ່ກອງປະຊຸມຈາກທ່ານຮອງປະທານສະພາແຫ່ງຊາດ.
ວັນທີ 18 ມີນາ ພາຍຫຼັງປິດກອງປະຊຸມຢູ່ແຂວງຫຼວງພະບາງ, ຄະນະຍັງໄດ້ລົງຕິດຕາມຢ້ຽມຊົມເບິ່ງຊັບສິນທີ່ ຍຶດມາໄດ້ ເປັນຕົ້ນແມ່ນປະເພດພາຫະນະທີ່ຈອດປະໄວ້ເດີ່ນກອງບັນຊາການປ້ອງກັນຄວາມສະຫງົບແຂວງ.
(ຂ່າວ ແລະ ພາບ: ສອນສັກ ວັນວິໄຊ)