ວັນທີ 18 ມີນາ 2024 ທີ່ຫ້ອງປະຊຸມສະພາປະຊາຊົນ ແຂວງຫຼວງພະບາງ ທ່ານ ພົທ ສຸວອນ ເລືອງບຸນມີ ຮອງປະທານສະພາແຫ່ງຊາດພ້ອມດ້ວຍຄະນະ ແລະ ກົມກ່ຽວຂ້ອງຈາກສູນກາງໄດ້ເຄື່ອນໄຫວຕິດຕາມການ ປະຕິບັດ ຄໍາຕັດສິນຂອງສານ ປະຊາຊົນ ຢູ່ແຂວງໂດຍມີທ່ານ ວົງສະຫວັນ ເທບພະຈັນ ປະທານສະພາປະຊາຊົນແຂວງ ພ້ອມດ້ວຍຄະນະ,ຄະນະປະຈໍາພັກແຂວງ,ພະແນກການທີ່ກ່ຽວຂ້ອງຂອງແຂວງ ແລະພະນັກງານວິຊາການ ເຂົ້າຮ່ວມ.

ກອງປະຊຸມຄັ້ງນີ້ ກໍໄດ້ຮັບຟັງການລາຍງານ ການຈັດຕັ້ງຜັນຂະຫຍາຍກົດໝາຍ ວ່າດ້ວຍ ການປະຕິບັດຄໍາຕັດສິນຂອງສານ ສະບັບປັບປຸງ ປີ 2021; ພ້ອມດຽວກັນນີ້ ບັນດາຜູ້ເຂົ້າຮ່ວມ ກໍໄດ້ມີຄໍາຖານເຈາະຈີ້ມ ເພື່ອຕິດຕາມ–ກວດກາ ການປະຕິບັດຄໍາຕັດສີນຂອງສານ ແຕ່ລະຂັ້ນ ທີ່ມີຄວາມຫຍຸ້ງຍາກ, ສາຍເຫດທີ່ພາໃຫ້ການປະຕິບັດແກ່ຍາວ, ບໍ່ສາມາດປະຕິບັດໄດ້ ເປັນຕົ້ນ ການເກັບເງິນຄ່າທຳນຽມ, ອາກອນ ແລະ ຄ່າປັບໃໝ ໃນຄະດີອາຍາ ແລະ ຄະດີແພ່ງ ເພື່ອມອບເຂົ້າງົບປະມານຂອງລັດໃຫ້ຄົບຖ້ວນ ແລະຖືກຕ້ອງຕາມກົດໝາຍ; ການຈັດຕັ້ງປະຕິບັດ ດຳລັດຂອງນາຍົກລັດຖະມົນຕີ ວ່າດ້ວຍຊັບສິນທີ່ຖືກ ຍືດ, ອາຍັດ ແລະ ຮິບເປັນຂອງລັດ ສະບັບເລກທີ 280/ນຍ, ລົງວັນທີ 09 ສິງຫາ 2022.

ທ່ານ ພົທ ສຸວອນ ເລືອງບຸນມີ ຮອງປະທານສະພາແຫ່ງຊາດ ກ່າວວ່າ: ເພື່ອເປັນການຈັດຕັ້ງປະຕິບັດພາລະບົດບາດຕິດຕາມ–ກວດກາ ຂອງຄະນະປະຈຳສະພາແຫ່ງຊາດ ຕາມສິດ ແລະ ໜ້າທີ່ທີ່ໄດ້ກຳນົດໄວ້ໃນກົດໝາຍແລະຮັບປະກັນໃຫ້ແກ່ການເຄື່ອນໄຫວຕິດຕາມ–ກວດກາ ໄດ້ຮັບຜົນສຳເລັດຕາມລະດັບຄາດໝາຍ ຄະນະປະຈຳສະພາແຫ່ງຊາດ ໄດ້ສ້າງແຜນການເຄື່ອນໄຫວຕິດຕາມ–ກວດກາ ໂດຍກຳນົດ ຈຸດປະສົງ,ເນື້ອໃນ, ເປົ້າໝາຍ, ວິທີການຕິດຕາມ–ກວດກາ, ການປະກອບຄະນະ, ກຳນົດໄລຍະເວລາ ແລະງົບປະມານ ເພື່ອເປັນບ່ອນອີງໃນການຈັດຕັ້ງປະຕິບັດ ກົດໝາຍໂດຍສະເພາະ ການປະຕິບັດຄໍາຕັດສິນຂອງສານ ຢູ່ຂັ້ນທ້ອງຖິ່ນ ໃຫ້ໄດ້ຮັບຜົນດີ ໂດຍສອດຄ່ອງກັບສະພາບຕົວຈິງຂອງແຕ່ລະທ້ອງຖິ່ນ ຢ່າງມີຄວາມໂປ່ງໃສ ແລະຍຸດຕິທໍາແກ່ຜູ້ນໍາໃຊ້ກົດໝາຍ,ເພື່ອເປັນຂໍ້ມູນພື້ນຖານກະກຽມລາຍງານຕໍ່ກອງປະຊຸມຄະນະປະຈຳສະພາແຫ່ງຊາດ ກໍຄື ກອງປະຊຸມສະໄໝສາມັນ ເທື່ອທີ 7 ສະພາແຫ່ງຊາດ ຊຸດທີ IX ແລະ ເປັນບ່ອນອີງໃນການປຶກສາຫາລື ແລະ ສະເໜີພາກສ່ວນກ່ຽວຂ້ອງ ໃນການຄົ້ນຄວ້າມາດຕະການແກ້ໄຂ.

ພາບ ແລະ ຂ່າວ ວິລິຍະ ວັນນະສີ