(ສປ ນວ) ກອງປະຊຸມປະຈຳປີ 2023 ຂອງສະມາຊິກສະພາປະຊາຊົນ ນະຄອນຫຼວງວຽງຈັນ ຊຸດທີ II ປະຈຳເຂດເລືອກຕັ້ງເມືອງສັງທອງ ໄດ້ດຳເນີນຂຶ້ນໃນວັນທີ 15 ມີນາ 2024 ທີ່ຫ້ອງປະຊຸມສະໂມສອນ ເມືອງສັງທອງ ໂດຍການເປັນປະທານຂອງ ທ່ານ ຄຳສວຍ ອຸ່ນດາລາ, ຫົວໜ້າຄະນະສະມາຊິກ ສະພາປະຊາຊົນ ນວ, ຮອງເຈົ້າເມືອງ ສັງທອງ. ເຂົ້າຮ່ວມໂດຍ ທ່ານ ນາງ ລຳພອຍ ສີອັກຄະຈັນ ຮອງປະທານສະພາປະຊາຊົນ ນວ, ມີບັນດາທ່ານ ຄະນະປະຈຳສະພາປະຊາຊົນ ນວ, ທ່ານເຈົ້າເມືອງ, ຮອງເຈົ້າເມືອງ, ບັນດາທ່ານສະມາຊິກສະພາປະຊາຊົນ ນວ ປະຈຳເຂດເລືອກຕັ້ງເມືອງ, ພະນັກງານຫຼັກແຫຼ່ງອ້ອມຂ້າງເມືອງ ແລະ ຕາງໜ້າອົງການຈັດຕັ້ງຂັ້ນບ້ານພາຍໃນເມືອງ ເຂົ້າຮ່ວມຢ່າງພ້ອມພຽງ.

ໂອກາດດັ່ງກ່າວ, ໄດ້ຮັບຟັງການລາຍງານສະຫຼຸບການເຄື່ອນໄຫວວຽກງານ ປະຈຳປີ 2023 ແລະ ທິດທາງແຜນ ການ ປີ 2024 ຂອງຄະນະສະມາຊິກ ສະພາປະຊາຊົນ ປະຈຳເຂດເລືອກຕັ້ງເມືອງສັງທອງ; ໃນນີ້, ໄດ້ຕົກລົງບັນຫາສຳຄັນພື້ນຖານຂອງເມືອງ ເປັນຕົ້ນ ດຳເນີນກອງປະຊຸມຮ່ວມກັບຂະແໜງການ ເພື່ອແກ້ໄຂບັນຫາຜົນກະທົບຂອງໂຮງງານມັນ ຕົ້ນ ທີ່ສົ່ງຜົນກະທົບຕໍ່ສິ່ງແວດລ້ອມ ແລະ ແກ້ໄຂບັນຫາການເກັບຊື້ມັນຕົ້ນຂອງພໍ່ຄ້າຄົນກາງທີ່ບໍ່ມີຄວາມຍຸຕິທຳຕໍ່ປະຊາ ຊົນ; ຄົ້ນຄວ້າຄໍາຮ້ອງ ຄຳສະເໜີຂອງປະຊາຊົນ ຈໍານວນ 06 ເລື່ອງ; ລົງແກ້ໄຂບັນຫາທີ່ດິນບ້ານຫ້ວຍຄໍາ, ບ້ານຄົກເພີງ ຈຳນວນ 07 ຕອນ. ນອກຈາກນີ້, ຍັງໄດ້ຕິດຕາມກວດກາບັນຫາພົ້ນເດັ່ນຂອງເມືອງ ເປັນຕົ້ນ: ແຜນພັດທະນາເສດຖະ ກິດ-ສັງຄົມຂອງເມືອງ; ຕິດຕາມການຂຸດຄົ້ນແຮ່ຄໍາຕົກຂ້ອນ ແລະ ອື່ນໆ; ເຊິ່ງຕິດພັນກັບການເຄື່ອນ ໄຫວໄລຍະຜ່ານມາ ເຫັນວ່າຍັງມີຂໍ້ຄົງຄ້າງຈຳນວນໜຶ່ງ ເປັນຕົ້ນ: ການຕົກລົງບັນຫາພື້ນຖານສຳຄັນ ບາງບັນຫາຍັງພົບຄວາມຫຍຸ້ງຍາກ ເນື່ອງຈາກຕິດພັນກັບຫຼາຍພາກສ່ວນ, ການສະໜອງຂໍ້ມູນຍັງຊັກຊ້າ ແລະ ບໍ່ທັນກັບສະພາບຕົວຈິງ; ການແກ້ໄຂບັນຫາຂອງຂະແໜງການຕ່າງໆຂອງເມືອງ ຍັງຊັກຊ້າ ໂດຍສະເພາະ ບັນຫາການເກັບຊື້ໄມ້ຕິ້ວ, ໄມ້ປ່ອງ, ການບຸກລຸກປ່າສະຫງວນ, ປ່າປ້ອງກັນ ຍັງແກ້ໄຂບໍ່ໄດ້ຂາດຕົວ. ຄຽງຄູ່ກັນນັ້ນ, ກອງປະຊຸມ ຍັງໄດ້ຮັບຟັງການລາຍງານຂອງ ທ່ານ ເຈົ້າເມືອງ, ບັນ ຫາຫ້ອງການ ກ່ຽວກັບແຜນພັດທະນາເສດຖະກິດ-ສັງຄົມ ແລະ ຂົງເຂດວຽກງານຕ່າງໆ.

          ພາຍຫຼັງທີ່ໄດ້ຮັບຟັງການລາຍງານຈາກແຕ່ລະພາກສ່ວນ, ບັນດາທ່ານຜູ້ເຂົ້າຮ່ວມກອງປະຊຸມ ໄດ້ມີຄຳເຫັນແລກ ປ່ຽນຕໍ່ກັບການປະຕິບັດວຽກງານໄລຍະຜ່ານມາ ໂດຍສະເພາະ ບັນດາໜ້າວຽກທີ່ຍັງເປັນຂໍ້ຄົງຄ້າງ ເພື່ອປຶກສາຫາທິດທາງການແກ້ໄຂໃນຕໍ່ໜ້າ ແລະ ໃນຕອນທ້າຍ, ທ່ານ ນາງ ລຳພອຍ ສີອັກຄະຈັນ ກໍໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳ ເລັດໃນວຽກງານຕ່າງໆ ທີ່ທາງເມືອງສັງທອງ ກໍຄື ຄະນະສະມາຊິກສະພາປະຊາຊົນ ປະຈຳເຂດເລືອກຕັ້ງເມືອງສັງທອງ ຍາດມາໄດ້. ພ້ອມດຽວກັນນີ້, ຍັງໄດ້ເຜີຍແຜ່ພາລະບົດບາດຂອງຄະນະສະມາຊິກສະພາປະຊາຊົນ ປະຈຳເຂດເລືອກຕັ້ງເມືອງ, ສິດ ແລະ ໜ້າທີ່ຂອງສະມາຊິກສະພາ ໃຫ້ບັນດາຫ້ອງການ, ອົງການຈັດຕັ້ງຂັ້ນບ້ານ ໄດ້ຮັບຮູ້ ແລະ ເຂົ້າໃຈເພິ່ມຕື່ມ ພ້ອມທັງ ຊຸກຍູ້ຫ້ອງການກ່ຽວຂ້ອງໃນການຕິດຕາມກວດກາ ແລະ ແກ້ໄຂບັນຫາຕ່າງໆ ທີ່ປະຊາຊົນໄດ້ສະເໜີໃນບັ້ນລົງພົບປະຜູ້ມີສິດເລືອກຕັ້ງ ໃນໄລຍະຜ່ານມານັ້ນ ແລະ ໄດ້ມີທິດຊີ້ນຳໃນບາງຂົງເຂດວຽກງານ ເພື່ອໃຫ້ອົງການປົກຄອງເມືອງ ກໍຄືບັນດາຫ້ອງການພາຍໃນເມືອງ ໄດ້ສືບຕໍ່ຈັດຕັ້ງປະຕິບັດວຽກງານທີ່ຍັງເປັນຂໍ້ຄົງຂ້າງ ໃຫ້ສຳເລັດ ແລະ ບັນລຸຕາມຄາດໝາຍທີ່ໄດ້ກຳນົດໄວ້.