(ສພຊ) ກອງປະຊຸມເຝິກອົບຮົມກ່ຽວກັບກົນໄກການກວດກາ ແລະ ຄົ້ນຄວ້າຄຳຮ້ອງຂໍຄວາມເປັນທຳ ຂອງກຳມາທິການຍຸຕິທຳ (ກມຍທ) ໄດ້ຈັດຂຶ້ນລະຫວ່າງວັນທີ 14-15 ມີນາ 2024 ທີ່ສະພາແຫ່ງຊາດ (ສພຊ), ໂດຍການເປັນປະທານຂອງທ່ານ ຄຳແພງ ວິລະພັນ ປະທານກຳມາທິການຍຸຕິທຳ; ເຂົ້້າຮ່ວມມີບັນດາຫົວໜ້າ-ຮອງ ຫົວໜ້າກົມ, ຫົວໜ້າ-ຮອງຫົວໜ້າພະແນກ ແລະ ລັດຖະກອນວິຊາການ ກມຍທ ແລະ ພະນັກງານພາຍໃນ ສພຊ. ທັງນີ້ ກໍເພື່ອຍົກລະດັບຄວາມຮູ້ໃຫ້ແກ່ພະນັກງານ-ລັດຖະກອນໃນການເປັນເສນາທິການໃຫ້ແກ່ກຳມາທິການຍຸຕິ ທຳ, ຄະນະປະຈຳສະພາແຫ່ງຊາດ ໃຫ້ມີຄວາມເປັນເອກະພາບກັນ ແລະ ເຝິກອົບຮົມການຂີດຂຽນເອກະສານຮັບ ໃຊ້ວຽກງານຂອງ ກມຍທ ຕາມພາລະບົດບາດ, ສິດ ແລະ ໜ້າທີ່ໃນການຕິດຕາມກວດກາ ແລະ ແກ້ໄຂຄຳຮ້ອງຂໍ ຄວາມເປັນທຳ.

ກອງປະຊຸມໄດ້ຮັບຟັງບົດສະເໜີການຄົ້ນຄວ້າວິເຄາະ, ວິໄຈ ຄຳຮ້ອງຂໍຄວາມເປັນທຳຂອງກົມຄຳຮ້ອງຂໍ ຄວາມເປັນທຳ ແລະ ຮ່າງເອກະສານການຄົ້ນຄວ້າຄຳຮ້ອງຂໍຄວາມເປັນທຳ; ເຜີຍແຜ່ກົດໝາຍວ່າດ້ວຍການແກ້ໄຂ ຄຳຮ້ອງທຸກ ສະບັບປັບປຸງປີ 2022; ເຜີຍແຜ່ມະຕິວ່າດ້ວຍການຮັບ ແລະ ພິຈາລະນາຄຳຮ້ອງຂໍຄວາມເປັນທຳ ສະ ບັບເລກທີ 07/ຄປຈ, ລົງວັນທີ 09 ມັງກອນ 2023; ບົດສະເໜີກ່ຽວກັບການຮັບຄຳຮ້ອງຂໍຄວາມເປັນທຳ, ການ ຮັບຕ້ອນ ແລະ ໃຫ້ຄຳປຶກສາຂອງກົມຕິດຕາມກວດກາວຽກງານຍຸຕິທຳ. ຈາກນັ້ນ ບັນດາຜູ້ເຂົ້າຮ່ວມໄດ້ພ້ອມກັນ ປະກອບຄຳຄິດຄຳເຫັນຕໍ່ບັນດາເນື້ອໃນຂອງເອກະສານຢ່າງຟົດຟື້ນ ແລະ ກົງໄປກົງມາ ດ້ວຍຄວາມຮັບຜິດຊອບສູງ ແລະ ມີລັກສະນະຫຼັກການ ເພື່ອໃຫ້ເປັນເອກະພາບກັນພາຍໃນສະພາແຫ່ງຊາດ.

ທ່ານ ຄຳແພງ ວິລະພັນ ໄດ້ສະແດງຄວາມຍ້ອງຍໍຊົມເຊີຍຜູ້ເຂົ້າຮ່ວມ ທີ່ພ້ອມກັນຄົ້ນຄວ້າປະກອບຄຳຄິດ ຄຳເຫັນຢ່າງສ້າງສັນ ແລະ ມີລັກສະນະວິຊາການ ເພື່ອນຳເອົາບົດຮຽນທີ່ໄດ້ຮັບຄັ້ງນີ້ ໄປໝູນໃຊ້ເຂົ້າໃນການປະຕິບັດວຽກງານຕົວຈິງ ແລະ ເປັນເອກະພາບກັນພາຍໃນ ເພື່ອໃຫ້ວຽກງານດັ່ງກ່າວມີປະສິດທິພາບ ແລະ ປະສິດທິຜົນດີ ຂຶ້ນກວ່າເກົ່າ.

(ພາບ-ຂ່າວ: ນາງ ໄຊໂສພາພອນ ມິ່ງມຸງຄຸນ)