(ສພຊ) ຕອນເຊົ້າຂອງວັນທີ 13 ມີນາ 2024 ທີ່ຫ້ອງຮັບແຂກສະພາແຫ່ງຊາດ, ທ່ານ ປອ. ນາງ ສູນທອນ ໄຊ ຍະຈັກ ຮອງປະທານສະພາແຫ່ງຊາດ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ເຢັບເກນີ ເຊດສະຕາກົບ (Evgeny SHESTAKOV) ຮອງລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ເບລາຣຸດຊີ ພ້ອມດ້ວຍຄະນະ ໃນໂອກາດມາຢ້ຽມຢາມ ແລະ ເຮັດວຽກ ຢູ່ ສປປລາວ.
ທ່ານຮອງປະທານສະພາແຫ່ງຊາດ ໄດ້ສະແດງຄວາມຕ້ອນຮັບຢ່າງອົບອຸ່ນ ພ້ອມທັງຕີລາຄາສູງຕໍ່ການມາຢ້ຽມ ຢາມ ແລະ ເຮັດວຽກຂອງທ່ານຮອງລັດຖະມົນຕີ ແລະ ຄະນະ ໃນຄັ້ງນີ້ ເຊິ່ງເປັນການປະກອບສ່ວນອັນສໍາຄັນໃນການ ຊຸກຍູ້ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມລະຫວ່າງ ສປປລາວ ແລະ ສ.ເບລາຣຸດ ຊີ ກໍຄືລະຫວ່າງສອງກະຊວງການຕ່າງປະເທດລາວ-ເບລາຣຸດຊີ ໃຫ້ໄດ້ຮັບການເສີມຂະຫຍາຍຍິ່ງໆຂຶ້ນ. ທ່ານຮອງປະ ທານສະພາແຫ່ງຊາດ ຍັງໄດ້ຕີລາຄາສະພາບການພົວພັນລະຫວ່າງສະພາແຫ່ງຊາດລາວ ແລະ ລັດຖະສະພາເບລາຣຸດຊີ ທີ່ໄດ້ມີມູນເຊື້ອແຫ່ງການພົວພັນອັນດີນໍາກັນ, ໂດຍໄດ້ເຊັນຂໍ້ຕົກລົງວ່າດ້ວຍການຮ່ວມມືລະຫວ່າງສະພາແຫ່ງຊາດລາວ ແລະ ສະພາແຫ່ງຊາດເບລາຣຸດຊີ ໃນປີ 2014, ໄດ້ມີການແລກປ່ຽນຄະນະຜູ້ແທນຂັ້ນສູງໃນເດືອນສິງຫາ 2022 ແລະ ຂັ້ນຕ່າງໆນໍາກັນ, ຮ່ວມມື ແລະ ສະໜັບສະໜູນເຊິ່ງກັນ ແລະກັນ ໃນເວທີລັດຖະສະພາພາກພື້ນ ແລະ ສາກົນ. ພິເສດ, ທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດລາວ ພົບປະທາງໄກກັບທ່ານ ວະລາດິເມຍ ອັງເດຣເຊນ ໂກ (Vladimir Andreichenko) ປະທານສະພາຜູ້ແທນປະຊາຊົນເບລາຣຸດຊີ ເຊິ່ງສອງຝ່າຍໄດ້ເປັນເອກະພາບທີ່ຈະ ສືບຕໍ່ເສີມຂະຫຍາຍສາຍພົວພັນລະຫວ່າງ 2 ອົງການນິຕິບັນຍັດໃຫ້ນັບມື້ນັບມີປະສິດທິຜົນ.
ທ່ານ ປອ. ນາງ ສູນທອນ ໄຊຍະຈັກ ຍັງສະແດງຄວາມຊົມເຊີຍຕໍ່ຜົນສໍາເລັດຢ່າງຈົບງາມໃນການເລືອກຕັ້ງສະ ມາຊິກສະພາຜູ້ແທນປະຊາຊົນ ແຫ່ງ ສ.ເບລາຣຸດຊີ ເມື່ອວັນທີ 25 ກຸມພາຜ່ານມາ, ແຈ້ງໃຫ້ຊາບວ່າ ໃນປີ 2024 ສປປລາວ ເປັນປະທານອາຊຽນ ແລະ ສະພາແຫ່ງຊາດ ກໍຈະເປັນປະທານອົງການສະມັດຊາລັດຖະສະພາລະ ຫວ່າງ ຊາດອາຊຽນ ຫຼື ໄອປາ ຄັ້ງທີ 45.
ທ່ານ ເຢັບເກນີ ເຊດສະຕາກົບ ໄດ້ສະແດງຄວາມຂອບໃຈຕໍ່ທ່ານຮອງປະທານສະພາແຫ່ງຊາດ ທີ່ໃຫ້ການ ຕ້ອນຮັບຢ່າງອົບອຸ່ນ ແລະ ໃຫ້ຄຳໝັ້ນວ່າຈະສືບຕໍ່ຊຸກຍູ້, ສົ່ງເສີມສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງສອງປະເທດ ພ້ອມທັງແຈ້ງໃຫ້ຊາບກ່ຽວກັບຈຸດປະສົງຂອງການມາຢ້ຽມຢາມ ແລະ ເຮັດວຽກຢູ່ ສປປລາວ ໃນຄັ້ງນີ້ ແມ່ນເພື່ອເຂົ້າຮ່ວມກອງປະຊຸມປຶກສາຫາລືດ້ານການເມືອງ ລາວ-ເບລາຣຸດຊີ ຄັ້ງທີ 3 ແລະ ຮ່ວມເປັນເຈົ້າ ພາບຈັດພິທີສະເຫຼີມສະຫຼອງຄົບຮອບ 30 ປີ ແຫ່ງການສ້າງຕັ້ງສາຍພົວພັນການທູດ ລາວ-ເບລາຣຸດຊີ.
(ຂ່າວ-ພາບ: ນາງ ກຸກກິກ ບຸດດາໄຊ)