ໃນຕອນເຊົ້າຂອງວັນທີ 13 ມີນາ 2024, ທ່ານ ນາງ ບັງອອນ ໄຊຍະສິດ ຮອງປະທານຄະນະສະຊິກສະພາແຫ່ງຊາດປະຈໍາເຂດເລືອກຕັ້ງທີ 12 ແຂວງຄໍາມ່ວນ ແລະ ທ່ານ ອິນທະວົງ ພົມມະຈັນ ປະທານກວດກາພັກ-ລັດເມືອງ ທັງເປັນຫົວໜ້າຄະນະສະມາຊິກສະພາປະຊາຊົນຂັ້ນແຂວງປະຈໍາເຂດເລືອກຕັ້ງເມືອງມະຫາໄຊ ແຂວງຄໍາມ່ວນ ໄດ້ສືບຕໍ່ເຄື່ອນໄຫວພົບປະຜູ້ມີສິດເລືອກຕັ້ງ ເພື່ອເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງຄໍາມ່ວນ ຊຸດທີ II, ທີ່ ບ້ານ ນາສະຖຸງ ເມືອງມະຫາໄຊ ແຂວງຄໍາມ່ວນ.
ທ່ານ ໂກດ ບຸນເພັງ ຮອງນາຍບ້ານນາສະຖຸງ ເມືອງມະຫາໄຊ ໄດ້ລາຍງານສະພາບຈຸດພິເສດ ແລະ ຜົນງານການຈັດຕັ້ງປະຕິບັດໜ້າທີ່ວຽກງານໃນ 1 ປີຜ່ານມາໂດຍສັງເຂບວ່າ: ບ້ານນາສະຖຸງແມ່ນບ້ານໜຶ່ງທີ່ຂຶ້ນກັບຈຸດສຸມປ່າໜາມ ເມືອງມະຫາໄຊ, ຫ່າງຈາກສຳນັກງານປົກຄອງເມືອງ 27 ກິໂລແມັດ ແລະ ມີເນື້ອໃນທີ່ທັງໝົດ 5000 ເຮັກຕາ, ທີ່ຕັ້ງບ້ານທິດເໝືອຕິດກັບບ້ານນາກວນຫຼວງ, ທິດໃຕ້ຕິດກັບບ້ານນາໝາກບ້າ, ທິດຕາເວັນອອກຕິດກັບບ້ານນາຈະລຸ້ມ ແລະ ທິດຕາເວັນຕົກຕິດກັບບ້ານປ່າໜາມ; ເຊິ່ງມີຈໍານວນຄອບຄົວທັງໝົດມີ 100 ຄອບຄົວ, ມີ 104 ຫຼັງຄາເຮືອນ, ມີພົນລະເມືອງ 404ຄົນ, ຍິງ 201ຄົນ, ມີຊົນເຜົ່າຜູ້ໄທ ແລະ ໝາກກອງ, ມີພຶ້ນຖານໂຄງລ່າງຖະໜົນຫົນທາງທຽວໄດ້ສອງລະດູສະດວກໄດ້ຕະຫຼອດປີ, ປະຊາຊົນສ່ວນໃຫ່ຍຢຶດຖືອາຊີບປູກຟັງ-ລ້ຽງສັດເປັນຕົ້ນຕໍເຊັ່ນ: ປູກເຂົ້າ, ລ້ຽງສັດ, ປູກພືດຜັກ ແລະ ການປູກສວນເພື່ອສ້າງລາຍຮັບເຂົ້າສູ່ຄອບຄົວ; ວຽກງານຜ່ານການຈັດຕັ້ງເຜີຍແຜ່ເຊື່ອມຊຶມ, ຜັນຂະຫຍາຍແນວທາງ, ແຜນນະໂຍບາຍ, ມະຕິ, ຄໍາສັ່ງ, ກົດລະບຽບຂອງພັກ ແລະ ກົດໝາຍຂອງລັດໃນ1 ປີຜ່ານມາ ສາມາດເຫັນໄດ້ຄະນະພັກ, ອຳນາດການປົກຄອງບ້ານຕະຫຼອດຮອດພໍ່ແມ່ປະຊາຊົນ ມີແນວຄິດອຸ່ນອຽນທຸ່ນທ່ຽງເຊື່ອໝັ້ນ ຕໍ່ການຊີ້ນຳໆພາຂອງພັກ ແລະ ການຄຸ້ມຄອງຂອງລັດ, ມີຄວາມສາມັກຄີຊ່ວຍເຫຼືອເຊິ່ງກັນ ແລະ ກັນ, ເຄົາລົບ ແລະ ປະຕິບັດຕາມລະບຽບ ແລະ ກົດໝາຍຕ່າງໆທີ່ຂັ້ນເທິງວາງອອກແຕ່ລະໄລຍະຢ່າງເຂັ້ມງວດ, ປະສ່ວນເຫື່ອແຮງສະຕິປັນຍາເຂົ້າໃນການພັດທະນາບ້ານເມືອງຢ່າງຕັ້ງໜ້າ; ຄະນະພັກ, ອຳນາດການປົກຄອງບ້ານນາສະຖຸງ ຕະຫຼອດຮອດພໍ່ແມ່ປະຊາຊົນໄດ້ມີຄວາມສາມັກຄີເປັນປຶກແຜນ, ນັ້ນແມ່ນຜົນງານຮ່ວມແຮງຮ່ວມໃຈກັນປູກສ້າງສິ່ງອຳນວຍຄວາມສະດວກ ແລະ ສ້ອມແປງເຮືອນທີ່ຢູ່ອາໄສໃຫ້ຄອບຄົວທີ່ມີຄວາມຫຍຸ້ງຍາກສຳເລັດ;
ຈາກນັ້ນ, ສະມາຊິກສະພາ ໄດ້ເຜີຍແຜ່ຜົນສໍາເລັດຂອງກອງປະຊຸມສະໄໝສາມັນເທື່ອທີ 6 ຂອງ ສພຊ ຊຸດທີ IX ແລະ ສະພາປະຊາຊົນແຂວງຄໍາມ່ວນ ຊຸດທີ II, ໃນນັ້ນມີບັນດາມະຕິ, ກົດໝາຍ ແລະ ນິຕິກໍາໃຕ້ກົດໝາຍ, ແລະ ບັນດາເນື້ອໃນເອກະສານບົດລາຍງານຕ່າງໆທີ່ນຳເຂົ້າພິຈາລະນາ ແລະ ຮັບຮອງເອົາຢູ່ໃນກອງປະຊຸມ; ພ້ອມນັ້ນ, ຄະນະຜູ້ແທນໄດ້ຮັບຟັງຄໍາຄິດຄໍາເຫັນ ແລະ ຂໍ້ສະເໜີຕ່າງໆ ຈາກອຳນາດການປົກຄອງບ້ານ ແລະ ພໍ່ແມ່ປະຊາຊົນຂອງບ້ານດັ່ງກ່າວ; ບາງຄໍາເໜີ ຄະນະຜູ້ແທນຍັງໄດ້ຜັດປ່ຽນກັນອະບາຍຊີ້ແຈງບາງບັນຫາ ແລະ ບາງຂໍ້ສະເໜີ ພ້ອມທັງຈະນໍາເອົາບາງຂໍ້ສະເໜີ ໄປສະເໜີຕໍ່ອົງການປົກຄອງແຂວງ ແລະ ພາກສ່ວນທີ່ກ່ຽວຂ້ອງ ເພື່ອແກ້ໄຂຕາມສິດ ແລະ ພາລະບົດບາດຂອງຕົນ.
ໂອກາດດັ່ງກ່າວ, ທ່ານ ນາງ ບັງອອນ ໄຊຍະສິດ ຮອງປະທານ (ຄສຊຂ 12) ແຂວງຄໍາມ່ວນ ໄດ້ໂອ້ລົມ ແລະ ໃຫ້ທິດຊີ້ນຳ ກ່ອນອຶ່ນທ່ານໄດ້ສະແດງຄວາມຍ້ອງຍໍຊົມເຊີຍ ມາຍັງຄະນະພັກເມືອງຜູ້ຊີ້ນຳເຂດ, ອຳນາດການປົກຄອງບ້ານ ຕະຫຼອດຮອດພໍ່ແມ່ປະຊາຊົນບ້ານນາສະຖຸງທີ່ມີຄວາມສາມັນຄີເປັນປຶກແຜນ, ໃນການສ້າງສາພັດທະນາບ້ານ, ທ່ານຍັງໄດ້ເໜັ້ນໜັກໃຫ້ອຳນາດການປົກຄອງພາຍໃນບ້ານຈົ່ງຮັກມູນເຊື່ອວັດທະນະທຳຊົນເຜົ່າ, ພ້ອມທັງເພີ່ມທະວີຄວາມສາມັກຄີໃຫ້ໜັກແໜ້ນ ເປັນແບບຢ່າງໃນການພັດທະນາບ້ານ ເອົາໃຈ ໃສ່ສຶກສາອົບຮົມພໍ່ແມ່ປະຊາຊົນໃຫ້ເຊື່ອມຊືມເຂົ້າໃຈແຈ້ງ ແລະ ກຳແໜ້ນຕໍ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ແລະ ບັນດານິຕິກຳຕ່າງໆໃຫ້ເລິກເຊິ່ງ, ຊຸກຍູ້ສົ່ງເສີມໃຫ້ລູກຫຼານໄດ້ເຂົ້າສຶກສາຮ່ຳຮຽນຢ່າງເປັນປົກກະຕິ, ເພີ່ມທະວີເອົາໃຈໃສ່ຕໍ່ວຽກງານ ປກຊ – ປກສ ໃນທົ່ວບ້ານໃຫ້ຮັບ ປະກັນຄວາມສະຫງົບ ມີຄວາມເປັນລະບຽບຮຽບຮ້ອຍດີຂຶ້ນກວ່າເກົ່າເພື່ອເຮັດໃຫ້ຄອບຄົວ ແລະ ບ້ານມີຄວາມສະຫງົບປອດໄພ.
ຈາກນັ້ນ, ໃນຕອນບ່າຍຂອງວັນດຽວກັນ, ທ່ານ ຮອງປະທານ (ຄສຊຂ 12) ແຂວງຄໍາມ່ວນ ພ້ອມດ້ວຍຄະນະໄດ້ເຄື່ອນໄຫວເຮັດຢູ່ບ້ານໂພນສະໜຶມ ຕື່ມອີກ.
ໂດຍ: ເອື້ອ ມະໂນສິງ