ດັ້ນກີບເມກ

ອາຫານທະເລຈານໂປດ ອາດມີໂທດແຝງຢູ່ ພາໃຫ້ສຸຂະພາບເສື່ອມໂຊມຕາຍໄວ ເພາະມີສານເຄມີແຊ່ໄວ້ ເພື່ອຮັກສາອາຫານໃຫ້ໄດ້ຂາຍໄດ້ດົນນານ ບໍ່ໄດ້ຄຳນຶງວ່າ: ຜູ້ກິນຈະເປັນແນວໃດ? ຂໍແຕ່ເປັນຜູ້ຂາຍໄດ້ກຳໄລກໍພໍ, ສານປົນເປື້ອນໃນອາຫານ (Contaminants) ທີ່ຕິດມາໃນອາຫານ ໃນຂັ້ນຕອນການຜະລິດ-ຂົນສົ່ງ ຫຼື ເກັບຮັກສາຍາວນານ ຢ່າລືມວ່າ ບາງຊະນິດ ບໍລິໂພກໃນປະລິມານຫຼາຍ ກໍຕາຍໄດ້ທັນທີ, ຜູ້ຂຽນໄດ້ຍິນໝູ່ເພື່ອນເລົ່າສູ່ຟັງ ມີຫຼາຍກໍລະນີໄດ້ຫາມຂຶ້ນລົດ ສົ່ງໂຮງໝໍຍ້ອນກິນອາຫານມີພິດ.

ອາຫານມີພິດ ເວົ້າສະເພາະອາຫານທະເລ ທີ່ປົນເປື້ອນສານເຄມີເຊັ່ນ: ສານຟອກໃຫ້ຂາວ, ສານເຄມີຟໍມາລີນ ເຮັດໃຫ້ຊີ້ນຮັດ-ຜັກສີຂຽວສົດໃສງາມ ຖ້າໃຜບໍລິໂພກຫຼາຍ ພາໃຫ້ເກີດພິດຕໍ່ຮ່າງກາຍ-ລະບົບທາງເດີນອາຫານ ສົ່ງຜົນໃຫ້ເຈັບຫົວປວດຮາກ-ວຽນຫົວ, ສານຕົກຄ້າງຢາຂ້າແມງໄມ້-ປາບສັດຕູພືດປົນເປື້ອນ ມານຳຜັກ ກໍອັນຕະລາຍ ກ່ອນຊື້ມາບໍລິໂພກຕ້ອງຄິດ-ເລືອກໃຫ້ດີ ທຸກມື້ນີ້ ອັນຕະລາຍອ້ອມໂຕ ບາງເທື່ອບໍ່ປອດໄພທາງຊັບສິນເງິນຄຳ; ບໍ່ປອດໄພທາງອາຫານ, ບໍ່ປອດໄພທາງທຸລະກິດວຽກງານຄິດບໍ່ທັນໝູ່ ເຂົາກໍສໍ້ໂກງໄປກິນ, ຜູ້ມີປາລະມີເໜືອກວ່າ ກໍກຽມແຕ່ຊິລັງແກຜູ້ອ່ອນກວ່າ ຍ້ອນຄວາມໂລບເຂົ້າສິງ ຍ້ອນກະແສວັດຖຸນິຍົມ-ບໍລິໂພກນິຍົມ ກວມຄວາມຄິດ ຈຶ່ງບໍ່ຄິດອັນຖືກອັນຄວນ ເຫັນແກ່ໄດ້ຝ່າຍດຽວ, ສານພິດ-ສານເຄມີ ໃນພືດຜັກ-ອາຫານ ຊີ້ນ, ອາຫານທະເລ, ສານນໍແຣັກ ເຮັດໃຫ້ຊີ້ນໝູ-ງົວ-ປາມີສີສັນສວຍງາມ ລົດຊາດດີ-ເກັບໄວ້ໄດ້ດົນ ເຊິ່ງຢ່າລືມວ່າສານນີ້ ກໍ່ໃຫ້ເກີດມະເຮັງ ປັດຈຸບັນບ້ານເຮົາ ມີຮ້ານອາຫານ ປະເພດຈຸ່ມ-ປີ້ງຫຼາຍ ໂຄສະນາກິນຈຸໃຈ, ກິນແຊບກິນຫຼາຍຈ່າຍໜ້ອຍ ແຕ່ຖ້າອາຫານບໍ່ຖືກສຸຂະອະນາໄມ ລະວັງຈະໄດ້ຈ່າຍຫຼາຍຕື່ມຢູ່ໂຮງໝໍ.

ສັງລວມວ່າ ຜູ້ຂຽນພຽງຢາກໃຫ້ໝູ່ເຮົາ ບໍລິໂພກຢ່າງມີສະຕິ ບໍ່ແມ່ນວ່າມັນລາຄາຖືກ-ມັນແຊບ ແລ້ວໂມ່ມໃສ່ທ້ອງຢ່າງດຽວ ເພາະວ່າຜູ້ຂາຍເຂົາມຸ່ງແຕ່ກຳໄລ ເຂົາບໍ່ໄດ້ຕິດຕາມຜົນຜູ້ກິນຈະເປັນແນວໃດ-ຄັນມີກວດກາເຄັ່ງຄັດຄືຊິດີນໍ!