(ສພຊ) ໃນລະຫວ່າງວັນທີ 25-29 ກຸມພາ 2024 ຄະນະຜູ້ແທນສະພາແຫ່ງຊາດ ສປປລາວ ນໍາໂດຍທ່ານ ຄໍາຈັນ ໂສຕາປະເສີດ ປະທານກໍາມາທິການບັນດາເຜົ່າ (ກບຜ) ໄດ້ໄປຢ້ຽມຢາມ ແລະ ແລກປ່ຽນບົດຮຽນ ຢູ່ລາຊະອາ ນາຈັກກໍາປູເຈຍ ກັບ ກໍາມາທິການສຶກສາອົບຮົມ, ຊາວໜຸ່ມ, ກິລາ, ສາສະໜາ, ວັດທະນະທໍາ, ສິລະປະ ແລະ ທ່ອງທ່ຽວ ສະພາແຫ່ງຊາດກໍາປູເຈຍ ກ່ຽວກັບການປະຕິບັດພາລະບົດບາດ, ສິດ ແລະ ໜ້າທີ່ຂອງສອງກໍາມາທິການ.
ໃນໂອກາດດັ່ງກ່າວ ຄະນະໄດ້ເຂົ້າຢ້ຽມຂໍ່ານັບທ່ານ ກິດຕິເສດຖາບັນດິດ ຈຽມຢຽບ ຮອງປະທານສະພາແຫ່ງຊາດກໍາປູເຈຍ ຜູ້ທີ 1 ແລະ ພົບປະສອງຝ່າຍກັບທ່ານ ປາ ໂສຈຽດຕິວົງ ປະທານກໍາມາທິການສຶກສາອົບຮົມ, ຊາວໜຸ່ມ, ກິລາ, ສາສະໜາ, ວັດທະນະທໍາ, ສິລະປະ ແລະ ທ່ອງທ່ຽວ; ໃນການພົບປະ, ສອງຝ່າຍໄດ້ແຈ້ງທີ່ຕັ້ງ, ພາລະບົດບາດ, ສິດ ແລະ ໜ້າທີ່ ໃນການຕິດຕາມກວດກາກະຊວງ-ອົງການກ່ຽວຂ້ອງ ໃຫ້ກັນ ແລະກັນ ຊາບ ພ້ອມທັງໄດ້ແລກປ່ຽນບົດ ຮຽນ ແລະ ຮັບຟັງການລາຍງານໂດຍຫຍໍ້ສະພາບພົ້ນເດັ່ນການປະຕິບັດໜ້າທີ່ຂອງສອງອົງການນິຕິບັນຍັດ ແລະ ສອງກໍາມາທິການໃນໄລຍະຜ່ານມາ ເປັນຕົ້ນການສ້າງກົດໝາຍ ແລະ ນິຕິກໍາໃຕ້ກົດໝາຍ, ການພັດທະນາຊົນນະບົດ ແລະ ແກ້ໄຂຄວາມທຸກຍາກຢູ່ເຂດຫ່າງໄກສອກຫຼີກ, ບົດຮຽນການຄຸ້ມຄອງວຽກງານສາສະໜາ, ການປົກປັກຮັກສາວັດທະນະທໍາ, ຮີດຄອງປະເພນີອັນດີງາມຂອງຊົນເຜົ່າ ຕິດພັນກັບການສົ່ງເສີມວຽກງານການທ່ອງທ່ຽວ, ປຶກສາຫາລືການສືບຕໍ່ພົວພັນຮ່ວມມືລະຫວ່າງສອງກໍາມາທິການໃນຕໍ່ໜ້າ.
ນອກຈາກນີ້, ຄະນະຜູ້ແທນ ກບຜ ຍັງໄດ້ລົງເຄື່ອນໄຫວຢ້ຽມຊົມພະລາຊະວັງເຈົ້າຊີວິດ, ວັດພະນົມ, ແຫຼ່ງທ່ອງທ່ຽວທາງດ້ານວັດທະນະທໍາ, ສາສະໜາ ແລະ ພື້ນຖານເສດຖະກິດຈໍານວນໜຶ່ງ ເຊັ່ນ: ທ່າກໍາປັ່ນປົກຄອງຕົນເອງ ສີຫານຸວິນ ແລະ ບໍລິສັດ ອັງກໍເບຍ ຕື່ມອີກ.