(ສພຊ) ຕອນບ່າຍຂອງວັນພຸດ, ວັນທີ 21 ກຸມພາ 2024 ທີ່ສະໂມສອນພະແນກສຶກສາທິການ ແລະ ກິລາແຂວງ, ສະພາປະຊາຊົນແຂວງໄຊຍະບູລີ ໄດ້ຈັດກອງປະຊຸມເຜີຍແຜ່ຄຳແນະນຳຂອງຄະນະປະຈຳສະພາແຫ່ງຊາດ (ຄປຈສພຊ) ແລະ ຄະນະປະຈໍາສະພາປະຊາຊົນແຂວງ (ຄປຈສພຂ) ພາຍໃຕ້ການເປັນປະທານຂອງທ່ານ ເພັງນິລັນ ຄຳພັນເພັງ ປະທານຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງທີ 7 ໂດຍມີທ່ານ ພົທ. ສຸວອນ ເລືອງບຸນມີ ຮອງປະທານສະພາແຫ່ງຊາດ, ບັນດາທ່ານສະມາຊິກສະພາແຫ່ງຊາດ (ສສຊ) ປະຈຳເຂດເລືອກຕັ້ງ, ຄະນະປະຈຳພັກແຂວງ, ຮອງເຈົ້າແຂວງ, ຄປຈສພຂ, ເຈົ້າເມືອງ, ຫົວໜ້າພະແນກການ, ອົງການ, ກົມກອງ ພ້ອມດ້ວຍບັນດາທ່ານຫົວໜ້າຫ້ອງການອ້ອມຂ້າງຂອງເມືອງໄຊຍະບູລີ ແລະ ແຂກຖືກເຊີນເຂົ້າຮ່ວມ.

ກອງປະຊຸມໄດ້ຮັບຟັງການເຜີຍແຜ່ຄຳແນະນຳຂອງຄະນະປະຈຳສະພາແຫ່ງຊາດ ສະບັບເລກທີ 01/ຄປຈ, ລົງວັນທີ 03 ມັງກອນ 2024 ວ່າດ້ວຍການສະຫຼຸບຕີລາຄາການໂຄສະນາເຜີຍແຜ່ກົດໝາຍ ແລະ ສະບັບເລກທີ 03/ຄປຈ, ລົງວັນທີ 05 ມັງກອນ 2024 ວ່າດ້ວຍການສ້າງແຜນການສ້າງ ແລະ ປັບປຸງກົດໝາຍ ໄລຍະ 2026-2030; ຄຳແນະ ນຳຂອງຄະນະປະຈຳສະພາປະຊາຊົນແຂວງໄຊຍະບູລີ ກ່ຽວກັບການສ້າງ ແລະ ປັບປຸງນິຕິກຳໃຕ້ກົດໝາຍ ສະບັບເລກທີ 102/ຄປຈ.ສພຂ, ລົງວັນທີ 25 ສິງຫາ 2023. ຈາກນັ້ນ, ບັນດາທ່ານຜູ້ເຂົ້າຮ່ວມໄດ້ພ້ອມກັນມີຄຳເຫັນຕາມຄຳຖາມເຈາະຈີ້ມຂອງປະທານກອງປະຊຸມ.

ໂອກາດດັ່ງກ່າວ, ທ່ານຮອງປະທານສະພາແຫ່ງຊາດ ໄດ້ມີຄຳເຫັນໂອ້ລົມໂດຍຍົກໃຫ້ເຫັນຜົນງານອັນພົ້ນເດັ່ນຂອງສະພາແຫ່ງຊາດ ເປັນຕົ້ນແມ່ນການສ້າງ ແລະ ປັບປຸງກົດໝາຍ; ການປະຕິບັດພາລະບົດບາດ, ສິດ ແລະ ໜ້າທີ່ຂອງ ສະພາແຫ່ງຊາດ ແລະ ຍົກໃຫ້ເຫັນຄວາມໝາຍຄວາມສໍາຄັນຄໍາແນະນໍາຂອງຄະນະປະຈຳສະພາແຫ່ງຊາດ 2 ສະບັບດັ່ງ ກ່າວ ພ້ອມທັງເນັ້ນໜັກໃຫ້ເອົາໃຈໃສ່ບາງບັນສຳຄັນດັ່ງນີ້: ຊີ້ນຳນໍາພາຢ່າງໃກ້ຊິດຕໍ່ການປະຕິບັດ ແລະ ເຜີຍແຜ່ລັດຖະທໍາມະນູນ ແລະ ກົດໝາຍ; ຈັດຕັ້ງເຊື່ອມຊຶມລະບຽບ, ກົດໝາຍໃຫ້ເລິກເຊິ່ງກວ້າງຂວາງ ແລະ ເລີ່ມເຂົ້າຮ່ວມວາງແຜນຈັດຕັ້ງປະຕິບັດ; ຍົກສູງຄວາມຮັບຜິດຊອບຂອງການຈັດຕັ້ງທຸກຂັ້ນ, ຂອງສະມາຊິກພັກທຸກສະຫາຍ ໃຫ້ຖືເປັນການແຂ່ງຂັນອັນໜຶ່ງ; ມີແຜນການລະອຽດ ສາມາດປະຕິບັດໄດ້ ແລະ ສະຫຼຸບຕີລາຄາໃນການຈັດຕັ້ງປະຕິບັດໃຫ້ຈະແຈ້ງເປັນລະບົບ.

ໃນຕອນເຊົ້າຂອງວັນດຽວກັນທີ່ຫ້ອງປະຊຸມ ສພຂ ໄຊຍະບູລີ, ຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງທີ 7 ກໍໄດ້ຈັດກອງປະຊຸມຖອດຖອນບົດຮຽນການເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ IX ທີ່ໄດ້ລົງເຄື່ອນໄຫວເຜີຍແຜ່ຢູ່ເມືອງຕ່າງໆພາຍໃນແຂວງເມື່ອເດືອນມັງກອນຜ່ານມາ.