ໃນວັນທີ 19-20 ກຸມພາ 2024. ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 17 (ສສຊ ເຂດ17) ແຂວງອັດຕະປື ນໍາໂດຍ: ທ່ານ ນາງ ມີນາພອນ ໄຊສົມພູ ປະທານສະພາປະຊາຊົນແຂວງ ທັງເປັນປະທານຄະນະ ສສຊ ເຂດ17 ພ້ອມດ້ວຍຄະນະ ສສຊ ເຂດ17, ມີຫົວໜ້າໜ່ວຍສະມາຊິກສະພາປະຊາຊົນແຂວງ ເຂດເລືອກຕັ້ງເມືອງ, ພະແນກການທີ່ກ່ຽວຂ້ອງຂອງແຂວງ, ໄດ້ເຄື່ອນໄຫວພົບປະ ປະຊາຊົນຜູ້ມີສິດເລືອກຕັ້ງຢູ່ບ້ານໜອງໄກ່ໂອກ, ບ້ານວັງຕັດນ້ອຍ ແລະ ບ້ານວັງຕັດໃຫ່ຍ ເມືອງຊານໄຊ, ເຂົ້າຮ່ວມມີອໍານາດການປົກຄອງບ້ານ, ເຈົ້າໜ້າທີ່ປະຈໍາດ່ານປະເພນີອູ່ 1, ທະຫານປະຈໍາເຂດຈຸດສຸມວັງຕັດ ແລະ ພໍ່ແມ່ປະຊາຊົນຜູ້ມີສິດເລືອກຕັ້ງພາຍໃນສາມບ້ານເຂົ້າຮ່ວມຮັບຟັງ 200 ກວ່າຄົນ.
ນາຍບ້ານໜອງໄກ່ໂອກ, ບ້ານວັງຕັດນ້ອຍ ແລະ ບ້ານວັງຕັດໃຫ່ຍໄດ້ລາຍງານສະພາບລວມໂດຍຫຍໍ້ຂອງບ້ານໃຫ້ຊາບວ່າ: ບ້ານໜອງໄກ່ໂອກເປັນບ້ານໜຶ່ງທີ່ຂື້ນກັບເຂດຈຸດສຸມວັງຕັດ ເມືອງຊານໄຊ ແຂວງອັດຕະປື ເຊິ່ງມີໄລຍະຫ່າງຈາກເທດສະບານເມືອງປະມານ 180 ກິໂລແມັດ,ປະກອບມີ 130 ຫຼັງຄາເຮືອນ, ມີ 175 ຄອບຄົວ, ປະຊາກອນ 719 ຄົນ,ຍິງ 351 ຄົນ, ບ້ານວັງຕັດນ້ອຍມີພົນລະເມືອງທັງໝົດ 699 ຄົນ,ມີ 140 ຄອບຄົວ, ປະກອບມີ 111 ຫຼັງຄາເຮືອນ, ສໍາລັບບ້ານວັງຕັດໃຫ່ຍ ມີພົນລະເມືອງ 436 ຄົນ, 99 ຄອບຄົວ, ປະກອບມີ 70 ຫຼັງຄາເຮືອນ, ປະຊາຊົນສອງບ້ານສ່ວນໃຫ່ຍດໍາລົງຊີວິດແມ່ນການຖາງປ່າເຮັດໄຮ່ເປັນລັກ ການປູກຝັງລ່ຽງສັດເປັນສໍາຮອງ ພ້ອມທັງໄດ້ສະເໜີມາຍັງການຈັດຕັ້ງພັກ-ລັດ ເພື່ອຕອບສະໜອງຊີວິການເປັນຢູ່ຂອງປະຊາຊົນ ຜ່ານສະມາຊິກສະພາແຫ່ງຊາດ ໃນຖານະເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນລາວບັນດາເຜົ່າ ເປັນຕົ້ນ: ການພັດທະນາເສັ້ນທາງ, ຕັດຕາຜ້າບ້ານເພື່ອຈັດສັນ ແລະ ຂະຫຍາຍພື້ນທີ່ການປຸກສ້າງເຮືອນຂອງປະຊົນ, ການຈັດສັນເນື້ອທີ່ທໍາການຜະລິດ ແລະ ດີນປຸກສ້າງ, ການສົ່ງເສີມວຽກງານກະສີກໍາປູກຝັງ-ລ່ຽງສັດ,ປັບປຸງສ້ອມແປງໂຮງໝໍນ້ອຍຕອບສະໜອງຢາປີ່ນປົວໃຫ້ພຽງພໍ ດ້ານວຽກງານການສືກສາ ແລະ ບັນຫາອື່ນໆອີກ.
ສສຊ ເຂດ 17 ໄດ້ຍົກເອົາບາງເນື້ອໃນຂອງຜົນສຳເລັດກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ໂດຍສະເພາະແຜນພັດທະນາເສດຖະກິດ-ສັງຄົມ ພ້ອມທັງໄດ້ໂອ້ລົມໃຫ້ອຳນາດການປົກຄອງບ້ານ ແລະ ພໍ່ແມ່ປະຊາຊົນ ສືບຕໍ່ຍຶດໝັ້ນຕໍ່ການນຳພາຂອງພັກ-ລັດ, ຮັກສາມູນເຊື້ອທີ່ຍາດມາໄດ້ໃນທ່າມກາງສະພາບຄວາມຫຍຸ້ງຍາກທາງດ້ານເສດຖະກິດ ໃຫ້ສ້າງເງື່ອນໄຂເສດຖະກິດຄອບຄົວ ປູກຝັງ, ລ່ຽງສັດ ກຸ້ມຕົນເອງ ເປັນເຈົ້າຕົນເອງ ໃຫ້ມີການຜະລິດທີ່ໝັ້ນຄົງ ສາມາດຈໍາໜ່າຍເປັນສີນຄ້າ, ໃຫ້ເອົາໃຈໃສ່ສືກສາອົບຮົມການເມືອງແນວຄິດເຕົ້າໂຮມຄວາມສາມັກຄີປ່ອງດອງເປັນປືກແຜ່ນແໜ້ນໜາ, ຕ້ານ ແລະ ສະກັດກັ້ນປະກົດການຫຍໍ້ທໍ້ຕ່າງໆຢ່າງເປັນເຈົ້າການໃຫ້ມີຄວາມສະເຫງົບປອດໄພສ່ວນຄໍາສະເໜີຂອງອໍານາດການປົກຄອງບ້ານ ແລະ ພໍ່ແມ່ປະຊາຊົນ ບາງບັນຫາຈະນໍາໄປຄົ້ນຄວ້າພິຈະລະນາປະສານສົມທົບກັບພາກສ່ວນທີ່ກ່ຽວຂ້ອງເພື່ອຫາວີທີທາງແກ້ໄຂ.
(ວິນັດ)