(ສພຊ) ກອງປະຊຸມໃຫຍ່ຄັ້ງທີ II ຂອງໜ່ວຍຊາວໜຸ່ມຮາກຖານກຳມາ​ທິການ​ບັນດາ​ເຜົ່າ (ກບຜ) ໄດ້​ຈັດຂຶ້ນໃນຕອນເຊົ້າຂອງວັນທີ 16 ກຸມພາ 2024 ທີ່ສະພາແຫ່ງຊາດ ໂດຍການເປັນປະທານຮ່ວມຂອງສະຫາຍ ຄຳຈັນ ໂສຕາປະ ເສີດ ກຳມະການຄະນະບໍລິຫານງານພັກສະພາແຫ່ງຊາດ, ເລຂາໜ່ວຍພັກຮາກຖານ ກບຜ, ສະຫາຍ ພອນແກ້ວ ຕົ້ນວໍລະຈິດ ກຳມະການຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ເລຂາຄະນະບໍລິຫານງານຊາວໜຸ່ມສະພາແຫ່ງຊາດ ແລະ ສະຫາຍ ສຸລິຈັນ ເພັດມະນີ ເລຂາໜ່ວຍຊາວໜຸ່ມຮາກຖານ ກບຜ (ຜູ້ເກົ່າ); ມີບັນດາສະຫາຍຕາງໜ້າຈາກອົງການກຳມະບານ, ແມ່ຍິງ ໜ່ວຍຮາກຖານ ກບຜ, ກົມວຽກງານຊົນເຜົ່າ, ກົມວຽກງານສາສະໜາ, ໜ່ວຍຊາວໜຸ່ມຮາກຖານພາຍໃນສະພາແຫ່ງຊາດ ແລະ ສະມາຊິກຊາວໜຸ່ມຮາກຖານ ກບຜ ລວມຜູ້ເຂົ້າຮ່ວມທັງໝົດ 34 ສະຫາຍ, ຍິງ 16 ສະຫາຍ.

ກອງປະຊຸມໄດ້ຮັບຟັງການຜ່ານບົດລາຍງານການເມືອງ ແລະ ບົດສຳຫຼວດການນຳພາຂອງໜ່ວຍຊາວໜຸ່ມຮາກຖານກຳມາທິການບັນດາເຜົ່າ ຊຸດທີ I; ຈາກນັ້ນ, ໄດ້ເປັນເອກະພາບ ພິຈາລະນາ, ຮັບຮອງເອົາບັນດາເນື້ອໃນສຳຄັນຄື: ພິຈາລະນາ ແລະ ຮັບຮອງເອົາບົດລາຍງານການເມືອງຂອງໜ່ວຍຊາວໜຸ່ມຮາກຖານ ກບຜ ເຊິ່ງປະກອບມີ 2 ພາກຄື: ພາກທີ 1 ຕີລາຄາສະພາບການເຄື່ອນໄຫວໄລຍະຜ່ານມາ ແຕ່ປີ 2020-2024 ໃນນັ້ນ ໄດ້ຍົກໃຫ້ເຫັນດ້ານດີຜົນງານຕ່າງໆທີ່ຍາດມາໄດ້ ພ້ອມທັງຍົກໃຫ້ເຫັນດ້ານອ່ອນຂໍ້ຄົງຄ້າງ ແລະ ບັນດາສາເຫດທີ່ຕ້ອງໄດ້ປັບປຸງແກ້ໄຂ ເພື່ອຮັບປະ ກັນໃຫ້ການເຄື່ອນໄຫວວຽກງານຂອງໜ່ວຍຊາວໜຸ່ມຮາກຖານ ກບຜ ດີຂຶ້ນກວ່າເກົ່າ ແລະ ພາກທີ 2 ກຳນົດທິດທາງການເຄື່ອນໄຫວວຽກງານໄລຍະ 5 ປີ (2024-2028) ໃນນັ້ນ, ຕົ້ນຕໍແມ່ນເພີ່ມທະວີສຶກສາອົບຮົມການເມືອງແນວຄິດ, ການພັດທະນາວຽກງານຊາວໜຸ່ມ ຕິດພັນກັບການເປັນເສນາທິການໃຫ້ແກ່ໜ່ວຍພັກຮາກຖານ ກບຜ ໄປພ້ອມກັບການຈັດຕັ້ງປະຕິບັດຂໍ້ແຂ່ງຂັນ 4 ບຸກ ແລະ ແຜນການທີ່ວາງໄວ້ ໃຫ້ມີປະສິດທິພາບ ແລະ ປະສິດທິຜົນສູງຂຶ້ນກວ່າເກົ່າ. ຫຼັງຈາກນັ້ນ, ກອງປະຊຸມໄດ້ເສີມຂະຫຍາຍປະຊາທິປະໄຕ ເລືອກຕັ້ງເອົາຄະນະໜ່ວຍຊາວໜຸ່ມຮາກຖານກຳມາ​ທິການ​ບັນດາ​ເຜົ່າຊຸດໃໝ່ໂດຍການປ່ອນບັດ ເຊິ່ງຜົນຂອງການເລືອກຕັ້ງແມ່ນເຫັນດີເລືອກເອົາສະຫາຍ ນາງ ໃຈດາວັນ ວົງໄຊ ເປັນເລຂາຄະນະໜ່ວຍຊາວໜຸ່ມຮາກຖານ, ສະຫາຍ ນາງ ພອນທິດາ ລັດຕະນະວົງ ເປັນຮອງເລຂາໜ່ວຍຊາວໜຸ່ມຮາກຖານ ທັງເປັນປະທານກວດກາ ແລະ ສະຫາຍ ແສງ ແກ້ວອຸດົມ ເປັນກຳມະການ.

ໃນໂອກາດນີ້, ສະຫາຍ ຄຳຈັນ ໂສຕາປະເສີດ ໄດ້ມີຄຳເຫັນໂອ້ລົມຕໍ່ກອງປະຊຸມ ໂດຍໄດ້ເນັ້ນໃຫ້ຄະນະໜ່ວຍຊາວໜຸ່ມຮາກຖານຊຸດໃໝ່ ພ້ອມສະມາຊິກຊາວໜຸ່ມພາຍໃນໜ່ວຍທັງໝົດ ເອົາໃຈໃສ່ບາງບັນຫາທີ່ສຳຄັນ ເປັນຕົ້ນຕັ້ງໜ້າສຶກສາອົບຮົມສະມາຊິກຊາວໜຸ່ມໃຫ້ມີຄວາມໜັກແໜ້ນ, ເຂັ້ມແຂງທາງດ້ານການເມືອງ-ແນວຄິດ; ມີຄຸນສົມບັດສິນທຳປະຕິວັດ; ຮັກຊາດ, ຮັກລະບອບປະຊາທິປະໄຕ ເປັນແບບຢ່າງໃນການເຄື່ອນໄຫວປະຕິບັດໜ້າທີ່ວຽກງານ ແລະ ການດຳລົງຊີວິດ; ສືບຕໍ່ປັບປຸງກົງຈັກ ແລະ ພະນັກງານ, ສະມາຊິກຊາວໜຸ່ມ ໃຫ້ເຂັ້ມແຂງຮອບດ້ານ ແລະ ປະຕິບັດຫຼັກການລວມສູນປະຊາທິປະໄຕຢ່າງເຂັ້ມງວດ ສາມາດຮັບປະກັນໄດ້ທາງດ້ານປະລິມານ ແລະ ຄຸນນະພາບ; ສືບຕໍ່ຮັກ ສາມູນເຊື້ອຄວາມສາມັກຄີ, ມີທັດສະນະມະຫາຊົນ, ມີຄວາມດຸໝັ່ນອົດທົນ, ຄົ້ນຄວ້າສຶກສາຮ່ຳຮຽນຍົກລະດັບຄວາມຮູ້-ຄວາມສາມາດ ໃນການປະຕິບັດວຽກງານໃຫ້ສູງຂຶ້ນເລື້ອຍໆ; ສ້າງ ແລະ ເຂົ້າຮ່ວມຂະບວນການເຄື່ອນໄຫວວຽກງານຊາວໜຸ່ມໃຫ້ຫຼາຍ, ມີບັນຍາກາດຟົດຟື້ນ, ຫ້າວຫັນ ໂດຍມີເນື້ອໃນຕິດພັນກັບການສຶກສາອົບຮົມໄປພ້ອມໆກັນ ແລະ ຍົກສູງສະຕິໃນການບໍລິໂພກຂ່າວສານ ໂດຍມີການກັ່ນຕອງເລືອກເຟັ້ນເອົາສິ່ງທີ່ດີ, ຖືກຕ້ອງ ແລະ ສາມາດໝູນໃຊ້ເຂົ້າໃນການປະຕິບັດໜ້າທີ່ວຽກງານຢ່າງມີປະສິດທິຜົນ.
(ພາບ ແລະ ຂ່າວ: ນາງ ສຸພາວັນ ຫອມສະນິດ)