(ສພຊ) ພາຍຫຼັງດຳເນີນມາເປັນເວລາ 5 ວັນ, ທີ່ເມືອງວັງວຽງ ແຂວງວຽງຈັນ; ກອງປະຊຸມເຝິກອົບຮົມຍົກລະ ດັບຄວາມຮູ້ວຽກງານການຄົ້ນຄວ້າ, ວິເຄາະ ແລະ ສົມທຽບບາງມາດຕາຂອງກົດໝາຍ ໄດ້ສຳເລັດໃນວັນທີ 9 ກຸມພາ 2024 ໂດຍການເປັນປະທານກ່າວປິດຂອງທ່ານ ບໍ ຫານປະເສີດ ຫົວໜ້າສູນຄົ້ນຄວ້າວິທະຍາສາດ ແລະ ນິຕິກຳ, ສະຖາບັນຄົ້ນຄວ້ານິຕິກຳສະພາແຫ່ງຊາດ (ສນສ). ເຂົ້າຮ່ວມມີວິທະຍາກອນຊ່ຽວຊານວຽກງານລັດຖະສະພາປະຈຳອົງ ການສະຫະປະຊາຊາດເພື່ອການພັດທະນາ ພ້ອມດ້ວຍສຳມະນາກອນຈາກ ສນສ; ກົມກົດໝາຍ; ກົມຕິດຕາມກວດກາ, ໂຄສະນາ ແລະ ຕີຄວາມໝາຍກົດໝາຍ; ກົມຄຳຮ້ອງຂໍຄວາມເປັນທຳ ແລະ ກົມຄຸ້ມຄອງສະມາຊິກສະພາແຫ່ງຊາດ ເຊິ່ງກອງປະຊຸມຄັ້ງນີ້ ໄດ້ຮັບການສະໜັບສະໜູນຊ່ວຍເຫຼືອທາງດ້ານງົບປະມານສົມທົບຈາກໂຄງການສ້າງຄວາມເຂັ້ມ ແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຫຼື ສະ​ເຕັບສ໌ (STEPs) ໂດຍຜ່ານກອງເລຂາຄຸ້ມຄອງແຫຼ່ງທຶນຊ່ວຍເຫຼືອລ້າໃຫ້ແກ່ສະພາແຫ່ງຊາດ.
ບັນດາຜູ້ເຂົ້າຮ່ວມໄດ້ຮຽນຮູ້ກ່ຽວກັບ 6 ຫົວຂໍ້ຄື: ຄວາມຮູ້ພື້ນຖານຂອງການຄົ້ນຄວ້າລັດຖະສະພາ; ການສົ່ງ ເສີມການບໍລິຫານຜົນງານການຄົ້ນຄວ້າຂອງສະຖາບັນ; ການໄດ້ມາຂອງຂໍ້ມູນ, ການວິເຄາະນະໂຍບາຍ ແລະ ກົດໝາຍ; ການວິເຄາະ ແລະ ການສົມທຽບບາງມາດຕາຂອງຮ່າງກົດໝາຍ; ທັກສະການຂຽນທີ່ມີປະສິດທິພາບ; ການກວດສອບຄຸນນະພາບຂອງບົດ. ການເຝິກອົບຮົມ ໄດ້ຈັດແບ່ງກັນເປັນກຸ່ມໃນການຄົ້ນຄວ້າ, ວິເຄາະ, ສົນທະນາແລກປ່ຽນບົດ ຮຽນ ແລະ ປະສົບການ, ແກ້ຂໍ້ຂ້ອງໃຈ, ແລະ ຂຶ້ນສະເໜີບົດທີ່ກຸ່ມໄດ້ຄົ້ນຄວ້າໃນແຕ່ລະຫົວຂໍ້ທີ່ໄດ້ຍົກຂຶ້ນມາ; ພ້ອມນັ້ນ, ຍັງໄດ້ມີພິທີມອບ-ຮັບໃບຢັ້ງຢືນຕື່ມອີກ.
ໃນຕອນທ້າຍ, ທ່ານ ບໍ ຫານປະເສີດ ໄດ້ມີຄຳເຫັນກ່າວປິດກອງປະຊຸມວ່າ: ການເຝິກອົບຮົມໃນຄັ້ງນີ້ ສະ ແດງໃຫ້ເຫັນເຖິງຄວາມເປັນເອກະພາບ ແລະ ຄວາມຮັບຜິດຊອບສູງຂອງບັນດາທ່ານທີ່ໄດ້ມີຄວາມເອົາໃຈໃສ່ຮັບຟັງ, ສົນທະນາ, ປຶກສາຫາລືແລກປ່ຽນຄຳຄິດຄຳເຫັນ, ເຝິກປະຕິບັດຕົວຈິງ ແລະ ມີການທົດສອບຄວາມຮັບຮູ້ທີ່ໄດ້ເຝິກ ອົບຮົມ; ວິທະຍາກອນ ກໍໄດ້ນໍາສະເໜີບົດຮຽນທີ່ດີຈາກການປະຕິບັດຕົວຈິງຢູ່ໃນລັດຖະສະພາຫຼາຍປະເທດ ເຊັ່ນ: ລັດ ຖະສະພາເວວ, ອົດສະຕຣາລີ, ຟີຈິ,… ເຮັດໃຫ້ຜູ້ເຂົ້າຮ່ວມໄດ້ຮັບຮັບຮູ້ ແລະ ເຂົ້າໃຈຫຼັກການ, ວິທີການ ແລະ ຮູບແບບການດໍາເນີນການຄົ້ນຄວ້າລັດຖະສະພາ ແລະ ການວິເຄາະກົດໝາຍ ໄດ້ຢ່າງເລິກເຊິ່ງຂຶ້ນຕື່ມ. ເພື່ອສືບຕໍ່ຜັນຂະ ຫຍາຍຜົນສໍາເລັດກອງປະຊຸມ, ຮຽກຮ້ອງມາຍັງບັນດາທ່ານທີ່ເຂົ້າຮ່ວມການເຝິກອົບຮົມ ຈົ່ງນໍາເອົາບົດຮຽນທີ່ໄດ້ຮຽນຮູ້ໃນເທື່ອນີ້ ໄປໝູນໃຊ້ເຂົ້າໃນພາກປະຕິບັດຕົວຈິງໃຫ້ປາກົດຜົນເປັນຈິງ.
(ພາບ ແລະ ຂ່າວ: ນາງ ສຸພາວັນ ຫອມສະນິດ)