(ສພຊ) ໃນວັນທີ 17 ພະຈິກຜ່ານມາ, ພາຍຫລັງສຳເລັດການດຳເນີນກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ ຊຸດທີ IX ແລ້ວ, ຄະນະຜູ້ແທນກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ ຊຸດ ທີ IX ນຳໂດຍທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ແລະ ບັນດາສະມາຊິກສະພາແຫ່ງຊາດ ປະຈຳ 18 ເຂດເລືອກຕັ້ງ ໄດ້ເດີນທາງຢ້ຽມຢາມໂຄງການທາງລົດໄຟລາວ-ຈີນ ແລະ ທົດລອງຂີ່ລົດໄຟຂະບວນລ້ານ ຊ້າງ ຈາກສະຖານີນະຄອນຫລວງວຽງຈັນ ເຖິງສະຖານີວັງວຽງ ແຂວງວຽງຈັນ ໂດຍການຕ້ອນຮັບຂອງທ່ານ ຄໍາພັນ ສິດທິດໍາພາ ເຈົ້າແຂວງ ແຂວງວຽງຈັນ ພ້ອມດ້ວຍຄະນະ.

ທາງລົດໄຟ ລາວ-ຈີນ ຖືກອອກແບບໃຫ້ມີຄວາມໄວ 160 ກິໂລແມັດຕໍ່ຊົ່ວໂມງ, ສະເພາະໄລຍະເວລາການ ກວດກາເຕັກນິກເຄື່ອນທີ່ນັ້ນ, ລົດໄຟຈະເລີ່ມທົດລອງແລ່ນໃນຄວາມໄວ 80 ກິໂລ ແມັດຕໍ່ຊົ່ວໂມງ ແລະ ຄ່ອຍຍົກ ລະດັບຄວາມໄວຂຶ້ນຕາມການອອກແບບ ຈົນຮອດຄວາມໄວສູງສຸດ 176 ກິໂລແມັດຕໍ່ຊົ່ວໂມງ. ສະເພາະລົດໄຟຂະ ບວນລ້ານຊ້າງ, ມີທັງໝົດ 9 ຕູ້, ເຊິ່ງລວມມີ: ຕູ້ລົດໄຟທີ່ຂັບເຄື່ອນໄດ້ເອງ 1 ຕູ້, ຕູ້ລົດໂດຍສານຊັ້ນ 1 ແລະ ຕູ້ຫ້ອງ ອາຫານ 1 ຕູ້, ຕູ້ລົດໂດຍສານຊັ້ນສອງ 6 ຕູ້, ທັງໝົດສາມາດບັນຈຸໄດ້ 720 ຄົນ ແລະ ສາມາດເຊື່ອມຕໍ່ສອງຂະບວນ ລົດໄຟໄດ້ໃນເວລາທີ່ຕ້ອງການ.

ໂຄງການກໍ່ສ້າງທາງລົດໄຟ ລາວ-ຈີນ ມີສະຖານີລົດໄຟທັງໝົດ 33 ສະຖານີ. ໃນນີ້, ມີສະຖານີໂດຍສານ ແລະ ສິນຄ້າລວມຢູ່ນຳກັນ 11 ແຫ່ງ, ສະຖານີສິນຄ້າສະເພາະ 1 ແຫ່ງ ຢູ່ນະຄອນຫລວງວຽງຈັນ, ມີຈຸດສະຫລັບ ລາງ ແລະ ຈຸດຫລີກ ທັງໝົດ 284 ຈຸດ.

ໃນໂອກາດຢ້ຽມຢາມໂຄງການທາງລົດໄຟລາວ-ຈີນຄັ້ງນີ້ ສະມາຊິກສະພາແຫ່ງຊາດ ບາງເຂດເລືອກຕັ້ງ ໄດ້ໃຫ້ສຳພາດວ່າ: ມີຄວາມພາກພູມໃຈ ແລະ ດີໃຈຫລາຍ ທີ່ໄດ້ມີໂອກາດມາຂີ່ລົດໄຟໃນຄັ້ງນີ້, ເຊິ່ງເປັນຂະບວນລົດ ໄຟທໍາອິດ ຂອງ ສປປລາວ, ຖືເປັນຄັ້ງປະຫວັດສາດ. ພາຍຫລັງເປີດນໍາໃຊ້ຢ່າງເປັນທາງການແລ້ວ, ຈະເປັນຜົນດີ ຫລາຍຢ່າງໃຫ້ແກ່ສັງຄົມ ກໍຄື ປະຊາຊົນລາວບັນດາເຜົ່າ ໄດ້ໄປມາຫາສູ່ເຊິ່ງກັນ ແລະ ກັນ ຢ່າງສະດວກສະບາຍ ແລະ ປະຢັດເວລາ, ທັງເປັນຜົນດີຕໍ່ການພັດທະນາເສດຖະກິດ-ສັງຄົມ ຂອງ ສປປລາວ, ເຊິ່ງຈະເປັນຂົວຕໍ່ໃນການ ດຶງດູດເອົານັກທ່ອງທ່ຽວຕ່າງປະເທດ ເຂົ້າມາທ່ອງທ່ຽວ ສປປລາວ ຫລາຍຂຶ້ນ, ທັງດຶງດູດເອົານັກລົງທຶນ ເຂົ້າມາ ລົງທຶນໃນຂະແໜງການຕ່າງໆເພີ່ມຂຶ້ນ, ລວມເຖິງການນຳເຂົ້າ ແລະ ສົ່ງອອກສິນຄ້າ ຈາກແຂວງ-ແຂວງ, ເມືອງ-ເມືອງ, ຈາກລາວ ໄປຈີນ ໄດ້ຢ່າງສະດວກສະບາຍ, ວ່ອງໄວ ແລະ ປະຢັດເວລາ.

(ສອນສັກ ວັນວິໄຊ)