ໃນວັນທີ 10 ມັງກອນ 2024 ນີ້, ທ່ານ ຄອນປະພັນ ເລືອງສີຈັນທອງ ຄະນະປະຈຳພັກແຂວງ, ຮອງປະທານຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 8, ຮອງປະທານ ສະພາປະຊາຊົນ ແຂວງຫົວພັນ ພ້ອມດ້ວຍທີມງານ ໄດ້ລົງເຄື່ອນໄຫວໄປຊຸກຍູ້, ຕິດຕາມ, ກວດກາ ໂຄງການຂຸດຄົ້ນແຮ່ ຂອງບໍລິສັດ ອີທີຊີ ຈຳກັດ ຢູ່ເຂດບ້ານ ນາເຊັງ ເມືອງຊຳເໜືອ ແຂວງຫົວພັນ.

               ຈຸດປະສົງຂອງການລົງເຄື່ອນໄຫວຊຸກຍູ້, ຕິດຕາມ, ກວດກາຄັ້ງນີ້ ເພື່ອເປັນການເກັບກຳສະພາບການ, ຮັບຟັງຄຳຄິດ, ຄຳເຫັນ, ຄຳສະເໜີ ຂອງບໍລິສັດ ໃນການຈັດຕັ້ງປະຕິບັດໂຄງການໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ, ພ້ອມທັງໄດ້ຮັບຟັງການລາຍງານ ຂໍ້ສະດວກ, ຂໍ້ຫຍຸ້ງຍາກ ໃນການຈັດຕັ້ງປະຕິບັດໂຄງການດັ່ງກ່າວ ເພື່ອພ້ອມກັນປັບປຸງ ແລະ ເປັນທິດໃນການປະຕິບັດໂຄງການໃຫ້ມີຜົນສຳເລັດຕາມແຜນການທີ່ວາງໄວ້.

                ໂອກາດດຽວກັນນິ້, ທ່ານ ຄອນປະພັນ ເລືອງສີຈັນທອງ ກໍ່ໄດ້ຍ້ອງຍໍຊົມເຊີຍ ຕໍ່ບໍລິສັດທີ່ໄດ້ທຸມເທເຫື່ອແຮງ, ວັດຖຸ, ງົບປະມານ ໃນການບຸກເບີກສະຖານທີ່, ກໍ່ສ້າງເສັ້ນທາງ, ຂົ້ວຂ້າມນ້ຳ ໃຫ້ແກ່ 2 ບ້ານຄື: ບ້ານນາເຊັງ, ບ້ານ ນ້ຳກຸບ ໄດ້ໄປມາສະດວກສະບາຍຍິ່ງຂຶ້ນ ແລະ ຍັງໄດ້ສ້າງວຽກເຮັດງານທຳໃຫ້ແກ່ປະຊາຊົນຂອບເຂດບ້ານດັ່ງກ່າວໄດ້ມີວຽກເຮັດງານທຳຕື່ມອີກ. ນອກນັ້ນ, ບໍລິສັດກໍຍັງໄດ້ເສຍພັນທະ, ອາກອນໃຫ້ແກ່ລັດ, ກໍ່ຄືແຂວງຫົວພັນ ຕາມລະບຽບກົດໝາຍທີ່ວາງໄວ້ອີກດ້ວຍ.

ພາບ ແລະ ຂ່າວໂດຍ ນັກຂ່າວ ສພຂ.