(ສພຊ) ພິທີໂຮມຊຸມນຸມສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວຄົບຮອບ 75 ປີ ຢູ່ແຂວງໄຊຍະບູລີ ໄດ້ຈັດຂຶ້ນໃນວັນທີ 19 ມັງກອນ 2024 ທີ່ຫໍປະຊຸມໃຫຍ່ຂອງແຂວງ ເຊິ່ງໄດ້ເລີ່ມຕົ້ນດ້ວຍການສະແດງສິລະປະ, ເຄົາລົບທຸງຊາດ, ອ່ານສານອວຍພອນ ໂດຍການເຂົ້າຮ່ວມຂອງສະຫາຍ ພົທ. ສຸວອນ ເລືອງບຸນມີ ກໍາມະການສູນກາງພັກ, ຮອງປະທານສະພາແຫ່ງຊາດ, ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 7; ສະຫາຍ ພົງສະຫວັນ ສິດທະວົງ ກຳມະການສູນກາງພັກ, ເລຂາພັກແຂວງ, ເຈົ້າແຂວງໆໄຊຍະບູລີ; ສະຫາຍ ພົຈວ. ກູດ ພົມມາ ຫົວໜ້າການທະຫານກອງບັນຊາການທະຫານແຂວງໄຊຍະບູລີ ພ້ອມດ້ວຍບັນດາສະຫາຍຄະນະປະຈຳ-ກຳມະການພັກແຂວງ, ເຈົ້າເມືອງ, ຫົວໜ້າພະແນກການອ້ອມຂ້າງແຂວງ, ບັນດາສະຫາຍໃນຄະນະພັກ-ຄະນະບັນຊາກອງບັນຊາການທະຫານແຂວງ, ກອງພົນທີ 2, ກອງບັນຊາການ ປກສ ແຂວງ, ອະດີດການນຳຂອງແຂວງ, ພະນັກງານ, ທະຫານ-ຕຳຫຼວດ, ພະນັກງານປະຕິວັດອາວຸໂສບຳນານ, ວິລະຊົນແຫ່ງຊາດ, ນັກຮົບແຂ່ງຂັນ ຕະຫຼອດຮອດພາກສ່ວນຕ່າງໆພາຍໃນແຂວງເຂົ້າຮ່ວມຢ່າງຫຼວງຫຼາຍ.
ໃນພິທີ, ສະຫາຍ ພົຈວ. ກູດ ພົນມາ ໄດ້ຂຶ້ນອ່ານຄຳສັ່ງປະຈຳວັນຂອງກະຊວງປ້ອງກັນປະເທດ ຫຼັງຈາກນັ້ນ ສະຫາຍ ພົງສະຫວັນ ສິດທະວົງ ກໍໄດ້ຂຶ້ນກ່າວປາໄສ ໂດຍໄດ້ເລົ່າຄືນເຖິງມູນເຊື້ອຕົ້ນກຳເນີດ, ການເຕີບໃຫຍ່ຂະຫຍາຍ ຕົວຂອງກອງທັບປະຊາຊົນລາວ ກໍຄືປະຫວັດມູນເຊື້ອແຫ່ງການເຕີບໃຫຍ່ຂອງກຳລັງປະກອບອາວຸດກອງທັບ ທີ່ໄດ້ພ້ອມກັບປະຊາຊົນລາວບັນດາເຜົ່າ ຕໍ່ສູ້ກູ້ຊາດໃນເມື່ອກ່ອນ ກໍຄືການປະຕິບັດ 2 ໜ້າທີ່ຍຸດທະສາດ ປົກປັກຮັກສາ ແລະ ສ້າງ ສາພັດທະນາປະເທດຊາດ ຢ່າງສົມກຽດ ແລະ ມີໄຊຕະຫຼອດ 75 ປີຜ່ານມາ, ໄດ້ຕັ້ງໜ້າເສີມຂະຫຍາຍມູນເຊື້ອອັນສະ ຫງ່າງາມອົງອາດກ້າຫານຂອງກອງທັບປະຊາຊົນລາວຕາມຄໍາຂວັນທີ່ວ່າ: ບໍລິສຸດຕໍ່ຊາດ, ຮັບໃຊ້ປະຊາຊົນຢ່າງສຸດໃຈ, ເສີມຂະຫຍາຍທາດແທ້ມູນເຊື້ອປະຕິວັດ, ເຮັດສຳເລັດທຸກໜ້າທີ່ຂອງກອງທັບເຮົາ. ຕະຫຼອດ 75 ປີ ກອງທັບໄດ້ອອກ ແຮງປັບປຸງກໍ່ສ້າງກຳລັງປະກອບອາວຸດຂອງຕົນໃຫ້ເຕີບໃຫຍ່ເຂັ້ມແຂງ ແລະ ກ້າວຂຶ້ນເປັນກອງທັບທີ່ມີແບບແຜນທັນສະ ໄໝ, ເປັນເຈົ້າການແກ້ໄຂທຸກສະພາບການອັນບໍ່ດີທີ່ເກີດຂຶ້ນ ເພື່ອເຮັດໃຫ້ປະເທດຊາດມີຄວາມສະຫງົບ, ສັງຄົມມີຄວາມເປັນລະບຽບຮຽບຮ້ອຍໂດຍພື້ນຖານ; ພາຍຫຼັງປະເທດຊາດໄດ້ຮັບການປົດປ່ອຍຢ່າງສົມບູນໃນວັນທີ 2 ທັນວາ 1975 ກອງທັບປະຊາຊົນລາວໄດ້ເອົາໃຈໃສ່ຈັດຕັ້ງພະນັກງານຫັນລົງເຮັດວຽກກໍ່ສ້າງຮາກຖານການເມືອງ, ຊຸກຍູ້ປຸກລະ ດົມໃຫ້ປະຊາຊົນເຂົ້າຮ່ວມວຽກງານປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານຂອງພັກ ຕິດພັນກັບການພັດທະນາເສດຖະກິດ-ສັງຄົມ ເຮັດໃຫ້ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ; ເພີ່ມທະວີການນຳ ພາຂອງພັກໃຫ້ເປັນແກນນຳທຸກຂົງເຂດວຽກງານ, ສຶກສາອົບຮົມການເມືອງແນວຄິດໃຫ້ໜັກແໜ້ນ ເຂັ້ມແຂງ ເລິກເຊິ່ງ; ສຸມໃສ່ຈັດຕັ້ງບຳລຸງ ແລະ ກໍ່ສ້າງພະນັກງານຂັ້ນນຳພາ-ບັນຊາ ແລະ ພະນັກງານວິຊາການຕ່າງໆໃນແຕ່ລະຂັ້ນແຕ່ລະກົມກອງ ໃຫ້ມີຄວາມຮູ້, ຄວາມສາມາດ, ມີຫົວຄິດປະດິດສ້າງ ໃຫ້ສົມຄູ່ກັບຄວາມຮຽກຮ້ອງຕ້ອງການ ໂດຍຕິດພັນກັບໜ້າທີ່ການເມືອງຂອງກອງທັບ ໄປພ້ອມກັບການປັບປຸງກໍ່ສ້າງກົມກອງໃຫ້ປອດໃສ ເຂັ້ມແຂງ ແລະ ໜັກແໜ້ນ, ເອົາໃຈໃສ່ນຳພາ-ຊີ້ນຳກົມກອງຂຸດຄົ້ນທ່າແຮງບົ່ມຊ້ອນຂອງຕົນ ເພື່ອຊອກຫາແຫຼ່ງລາຍຮັບໃຫ້ກົມກອງ; ພ້ອມກັນນັ້ນ, ກໍເປັນການກໍ່ສ້າງພື້ນຖານໂຄງລ່າງທາງດ້ານເສດຖະກິດ-ສັງຄົມຢ່າງມີຈຸດສຸມ ເພື່ອເປັນກຳລັງແຮງຊຸກດັນໃນການພັດທະນາກອງທັບ ແລະ ປະເທດຊາດ.
(ພາບ ແລະ ຂ່າວ: ນາງ ກຸກກິກ ບຸດດາໄຊ)