ໃນລະຫວ່າງວັນທີ 16-17 ມັງກອນ 2024 ທ່ານ ຮສ. ປອ. ລິນຄຳ ດວງສະຫວັນ ກຳມະການສຳຮອງສູນກາງພັກ, ກຳມະການຄະນະປະຈຳ, ປະທານກຳມາທິການເສດຖະກິດ ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ ພ້ອມດ້ວຍຄະນະ ໄດ້ເຄື່ອນໄຫວຕິດຕາມກວດກາ ແລະ ຊຸກຍູ້ວຽກງານການຄົ້ນ ແລະ ປຸງແຕ່ງແຮ່ທາດ ແບບທົດລອງຢູ່ແຂວງຄໍາມ່ວນ ໂດຍການເຂົ້າຮ່ວມມີ ທ່ານ ບຸນມີ ພິມມະສອນ ປະທານຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 12 ແຂວງຄໍາມ່ວນ,​ ທ່ານ ບົວພັນ ແສງຈັນ ຮອງປະທານ ສະພາປະຊາຊົນແຂວງ, ມີສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 12 ແຂວງຄໍາມ່ວນ, ສະມາຊິກສະພາປະຊາຊົນແຂວງ ແລະ ບັນດາພະແນກການທີ່ກ່ຽວຂ້ອງຂອງແຂວງເຂົ້າຮ່ວມ.

ຄະນະໄດ້ຮັບຟັງການລາຍງານຂອງບັນດາພະແນກຄື: ພະແນກແຜນການ ແລະ ການລົງທຶນ, ພະແນກພະລັງງານ ແລະ ບໍ່ແຮ່, ພະແນກກະສິກຳ ແລະ ປ່າໄມ້ແຂວງ, ພະແນກຊັບພະຍາກອນທຳມະຊາດ ແລະ ສິ່ງແວດລ້ອມ, ພະແນກອຸດສາຫະກຳ ແລະ ການຄ້າ, ພະແນກການເງິນແຂວງ; ກ່ຽວກັບການລົງທຶນດ້ານພະລັງງານ ແລະບໍ່ແຮ່, ການຈັດຕັ້ງປະຕິບັດວຽກງານພັດທະນາແຮ່ທາດ ແລະ ໂຄງການທົດລອງຂຸດຄົ້ນແຮ່ທາດ, ການຫັນປ່ຽນທີ່ດິນປ່າໄມ້, ການຟຶ້ນຟູຟ່າໄມ້ ແລະ ປູກປ່າທົດແທນຄືນພື້ນທີ່ປ່າໄມ້ທຳມະຊາດ ຂອງໂຄງການພັດທະນາໄຟຟ້າ, ໂຄງການຂຸດຄົ້ນບໍ່ແຮ່, ການຂຶ້ນທະບຽນອອກໃບຕາດິນ,​ ຜົນກະທົບຕໍ່ສິ່ງແວດລ້ອມ, ການຟຶ້ນຟູຊີວິດການເປັນຢູ່, ການຊົດເຊີຍຜົນກະທົບໃຫ້ແກ່ປະຊາຊົນທີ່ຖືກຜົນກະທົບ, ການຈັດຕັ້ງປະຕິບັດການປຸງແຕ່ງແຮ່ທາດ ແລະ ການເກັບລາຍຮັບຈາກໂຄງການໄຟຟ້າ ແລະ ລາຍຮັບຈາກການທົດລອງຂຸດຄົ້ນເເຮ່ທາດ; ເຊິ່ງໄດ້ຍົກໃຫ້ເຫັນມີຄວາມເໝາະສົມ, ຂໍ້ສະດວກ ແລະ ຂໍ້ຫຍຸ້ງຍາກໃນການສ້າງ ແລະ ການຈັດຕັ້ງປະຕິບັດວຽກງານດັ່ງກ່າວພາຍຫລັງໄດ້ຮັບຟັງການລາຍງານແລ້ວ ທ່ານປະທານ ກສຕສ ພ້ອມດ້ວຍຄະນະ ກໍໄດ້ແລກປ່ຽນຄໍາຄິດ-ຄໍາເຫັນ ແລະ ມີບາງຄໍາຖາມເຈາະຈີ້ມຕໍ່ພະແນກການດັ່ງກ່າວທີ່ເຂົ້າຮ່ວມຢ່າງກົງໄປ-ກົງມາເພື່ອເປັນຂໍ້ມູນອັນຄົບຖ້ວນຮອບດ້ານດ້ວຍພາວະວິໃສ;

ຈາກນັ້ນ ຄະນະກໍ່ໄດ້ເຄື່ອນໄຫວໄປຢ້ຽມຢາມ ບໍລິສັດ ຊີໂນ-ອາກຣີ ໂປຕາສ ຈໍາກັດ,  ຢູ່ທີ່ບ້ານດົງໃຕ້ ເມືອງທ່າແຂກ ເຊິ່ງ ເປັນບໍລິສັດລະດັບສາກົນທີ່ດໍາເນີນການຂຸດຄົ້ນແຮ່ເກືອໂປຕາສ, ຜະລິດເກືອໂປຕາສ (ປຸ໋ຍໂປຕາສ) ແລະ ຈໍາໜ່າຍເກືອໂປຕາສ. ໃນທ້າຍປີ 2021 ສໍາເລັດການກໍ່ສ້າງ ແລະ ທົດລອງຜະລິດໂຄງການເກືອໂປຕາສ 1 ລ້ານໂຕນ ແລະ ໄດ້ກາຍເປັນໂຄງການເກືອໂປຕາສ ລະດັບ 1 ລ້ານໂຕນທໍາອິດ ໃນຂົງເຂດໃໝ່ຂອງການຜະລິດເກືອໂປຕາສໃນໂລກ, ຜະລິດຕະພັນເກືອໂປຕາສຂອງບໍລິສັດ ໄດ້ສົ່ງອອກຈໍາໜ່າຍຢູ່ຫຼາຍປະເທດໃນພາກພື້ນອາຊີ ເຊິ່ງໄດ້ສ້າງອິດທິພົນທີ່ພົ້ນເດັ່ນໃນຕະຫຼາດສາກົນ ໂດຍສະເພາະແມ່ນໃນຕະຫຼາດຂົງເຂດອາຊີຕາເວັນອອກສ່ຽງໃຕ້. ປັດຈຸບັນແມ່ນບັນລຸກໍາລັງການຜະລິດ 2 ລ້ານໂຕນ/ປີ ໃນທ້າຍປີ 2023 ຄາດວ່າໃນປີ 2024 ຈະບັນລຸກຳລັງການຜະລິດ 3 ລ້ານໂຕນ/ປີ ແລະ ປີ 2025 ຫາ 2026 ຈະບັນລຸກໍາລັງການຜະລິດ 5 ລ້ານໂຕນ/ປີ, ໃນອະນາຄົດອີງຕາມຄວາມຕ້ອງການຂອງຕະຫຼາດຍັງສາມາດຂະຫຍາຍ ການຜະລິດເຖິງ 7 ຫາ 10 ລ້ານໂຕນ/ປີ, ເພື່ອຕອບສະໜອງການບໍລິການຜະລິດຕະພັນທີ່ມີຄຸນນະພາບສູງໃຫ້ແກ່ອາຊີ ແລະ ທົ່ວໂລກ. ບໍລິສັດຍັງໄດ້ຈັດຕັ້ງດຳເນີນຫລາກຫລາຍກິດຈະກຳ ວິສາຫະກິດ ເພື່ອເສີມສ້າງທີມງານທີ່ສາມັກຄີກົມກຽວ ເພື່ອພ້ອມກັນພະຍາຍາມສູ້ຊົນໃຫ້ບັນລຸຄາດໝາຍ ໂຄງການປອດໄພ, ສີຂຽວ, ເປັນມິດກັບສິ່ງແວດລ້ອມ ແລະ ພັດທະນາແບບຍືນຍົງ. ໃນເຂດດັ່ງກ່າວຍັງຈະໄດ້ສ້າງເປັນສວນອຸດສາຫະກຳໝູນວຽນອັດສະລິຍະ ອາຊີໂປຕາສ ສາກົນ ໂດຍຈະແບ່ງອອກເປັນ 3 ພາກສ່ວນໃຫຍ່ຄື: ສວນອຸດສາຫະກຳໂປຕາສ, ສວນອຸດສາຫະກຳອະໂປຕາສ ແລະ ເມືອງອັດສະລິຍະມີເນື້ອທີ່ລວມປະມານ 2.000 ເຮັກຕາ, ຄາດຄະເນການລົງທຶນທັງໝົດ 4,31 ຕື້ໂດລາສະຫະລັດ.

ໂອກາດດຽວກັນ ຄະນະດັ່ງກ່າວຍັງໄດ້ໄຫວຢ້ຽມຢາມ ບໍລິສັດ ລາວຄາຍຢວນ ບໍ່ແຮ່ຈໍາກັດ ທີ່ ບ້ານ ລຳມະລາດ ເມືອງ ທ່າແຂກ, ເຊິ່ງບໍລິສັດດັ່ງກ່າວໄດ້ເຊັນສັນຍາວ່າດ້ວຍການຊອກຄົ້ນ ແລະ ສໍາຫຼວດແຮ່ເກືອໂປຕາສ ຢູ່ ແຂວງຄໍາມ່ວນ ໃນເດືອນ ຕຸລາ ປີ 2008 ເປັນຕົ້ນມາ, ໂດຍສະເພາະໂຄງການໄລຍະທີ 1 ເຊິ່ງໄດ້ເຊັນສັນຍາວ່າດ້ວຍການຂຸດຄົ້ນ ແລະ ປຸງແຕ່ງເກືອໂປຕາສ ຢູ່ເມືອງທ່າແຂກ ໃນເດືອນ ເມສາ ປີ 2011, ມີເຂດສໍາປະທານຕັ້ງຢູ່ ບ້ານ ລໍາມະລາດມີເນື້ອທີ່ ຈໍານວນ 41,69 ກິໂລຕາແມັດ, ປະລິມານສະສົມຂອງເກືອກາລີ ທີ່ໄດ້ຊອກຄົ້ນປະມານ 218 ລ້ານໂຕນ ແລະ ສ້າງຕັ້ງໂຮງງານປຸງແຕ່ງຂື້ນ, ສໍາລັບປີ 2022 ເລີ່ມແຕ່ເດືອນ ມັງກອນ ຫາ ເດືອນ ສິງຫາ ຍອດຜະລິດຕະພັນທີ່ສາມາດຜະລິດໄດ້ ຈໍານວນທັງໝົດ 323.064 ໂຕນ, ເທົ່າກັບ 58,74% ຂອງແຜນຈໍາໜ່າຍປະຈໍາປີ 2022, ໃນນັ້ນໄດ້ສົ່ງອອກສູ່ຕ່າງປະເທດທັງໝົດ 294.830 ໂຕນ ແລະ ຈໍາໜ່າຍພາຍໃນ 10.155 ໂຕນ, ແຮ່ດິບທີ່ໄດ້ຂຸດຄົ້ນອອກມາແມ່ນ 1.892.831 ໂຕນ, ສໍາລັບຄວາມຄືບໜ້າຂອງໂຄງການໄລຍະທີ 2, ເຂດສໍາປະທານໂຄງການຢູ່ ບ້ານລໍາມະລາດ, ເມືອງທ່າແຂກ, ເມືອງເຊບັ້ງໄຟ ແຂວງຄໍາມ່ວນ ແລະ ເມືອງໄຊບູລີ ແຂວງ ສະຫວັນນະເຂດ ທີ່ມີເນື້ອທີ່ສໍາປະທານທັງໝົດ 92,24 ກິໂລຕາແມັດ. ຕະຫຼອດເຖິງເປົ້າໝາຍການພັດທະນາຂອງບໍລິສັດ ໃນອະນາ ຄົດ ທີ່ຈະພະຍາຍາມກາຍເປັນວິສາຫະກິດຜະລິດໂປຕາສ ທີ່ໃຫຍ່ທີ່ສຸດ ໃນອາຊີຕາເວັນອອກສ່ຽງໃຕ້ ໃຫ້ກາຍເປັນໂຮງງານຕົວແບບ ພ້ອມທັງຂັບເຄື່ອນ ແລະ ປັບປຸງດ້ານການຮັກສາອະນາໄມ, ດ້ານການສຶກສາ, ດ້ານວຽກເຮັດງານທໍາ, ດ້ານການດໍາລົງຊີວິດຂອງປະຊາຊົນ.

ທ່ານ ຮສ. ປອ. ລິນຄຳ ດວງສະຫວັນ ກຳມະການສຳຮອງສູນກາງພັກ, ກຳມະການຄະນະປະຈຳ, ປະທານກຳມາທິການເສດຖະກິດ ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ ໄດ້ມີຄໍາເຫັນໂອ້ລົມ ແລະ ກ່າວສະແດງຄວາມຊົມເຊີຍຕໍ່ຂະແໜງການທີ່ກ່ຽວຂ້ອງຂອງແຂວງ ແລະ ບໍລິສັດທີ່ໄດ້ສະໜອງຂໍ້ມູນຮອບດ້ານ ໃຫ້ຄະນະທິມງານທີ່ມາເຄື່ອນໄຫວຕິດຕາມກວດກາໃນຄັ້ງນີ້ເພື່ອເປັນຂໍ້ມູນພື້ນຖານ, ບ່ອນອີງໃນການສ້າງແຜນ ແລະ ປັບປຸງກົດໝາຍ ວ່າດ້ວຍແຮ່ທາດ ສະບັບປັບປຸງທີ່ຈະທີ່ຈະນຳໄປສະເໜີ ຕໍ່ຄະນະປະຈໍາສະພາແຫ່ງຊາດ ແລະ ຂອງກອງປະຊຸມສະໄໝສາມັນເທື່ອທີ 7 ສະພາແຫ່ງຊາດ ຊຸດທີ IX, ໃນຕໍ່ໜ້າໃຫ້ຮັບປະກັນຄວາມຖືກຕ້ອງ ແລະ ສອດຄ່ອງຕາມລະບຽບກົດໝາຍ.

ນອກນັ້ນ, ທ່ານ ຮສ. ປອ. ລິນຄໍາ ດວງສະຫວັນ ກໍໄດ້ມອບຄອມພິວເຕີຕັ້ງໂຕະ1ຊຸດໃຫ້ສະພາປະຊາຊົນແຂວງເພື່ອນຳໃຊ້ເຂົ້າໃນການຈັດຕັ້ງປະຕິບັດໜ້າທີ່ວຽກງານ, ໜ້າຕາງຮັບໂດຍທ່ານ ບຸນມີ ພິມມະສອນ ປະທານຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 12 ແຂວງຄໍາມ່ວນ.

ໂດຍ: ເອື້ອ ມະໂນສິງ