ໃນຕອນເຊົ້າຂອງວັນທີ 11 ມັງກອນ 2024 ນີ້ ກອງປະຊຸມຄົບຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ ສະພາປະຊາຊົນແຂວງຈໍາປາສັກ ປະຈໍາປີ 2023 ໄດ້ໄຂຂື້ນຢູ່ທີ່ຫ້ອງປະຊຸມຂອງພະແນກຍຸຕິທໍາແຂວງຈໍາປາສັກ ໂດຍການໃຫ້ກຽດເຂົ້າຮ່ວມເປັນຄະນະປະທານຂອງ ທ່ານ ແກ້ວລັດຕະນະ ສີຫາວົງ ຄະນະປະຈໍາພັກແຂວງ, ຮອງປະທານຄະນະປະຈໍາສະພາປະຊາຊົນແຂວງຈໍາປາສັກ ແລະ ທ່ານ ປອ. ສົມໄຊ ສີຫາຈັກ ຄະນະປະຈໍາສະພາປະຊາຊົນແຂວງ, ປະທານຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ ເຂົ້າຮ່ວມມີບັນດາທ່ານຮອງປະທານຄະນະກໍາມະການ, ສະມາຊິກສະພາປະຊາຊົນແຂວງທີ່ສັງກັດເປັນກໍາມະການຂອງຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ, ບັນດາຫົວໜ້າ, ຮອງຫົວໜ້າພະແນກການທີ່ກ່ຽວຂ້ອງ, ຫົວໜ້າຂະແໜງ, ຮອງຂະແໜງ ແລະ ວິຊາການ ເຂົ້າຮ່ວມຢ່າງພ້ອມພຽງ.

ວາລະດຳເນີນກອງປະຊຸມ, ທ່ານ ປອ. ສົມໄຊ ສີຫາຈັກ ປະທານຄະນະກຳມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ ຄະນະປະທານກອງປະຊຸມໄດ້ມີຄໍາເຫັນສະເໜີຈຸດປະສົ່ງ ແລະ ກ່າວເປີດກອງປະຊຸມ. ຈາກນັ້ນ, ທ່ານ ນາງ ເຂັມຄໍາ ກິດຕີພັນ ຮອງປະທານຄະນະກຳມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ ໄດ້ຂື້ນຜ່ານບົດລາຍງານການເຄື່ອນໄຫວວຽກງານ ປະຈໍາປີ 2023 ແລະ ທິດທາງແຜນການ ປະຈໍາປີ 2024 ຂອງຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ. ທ່ານ ບຸນຄົງ ພັນວົງສາ ຫົວໜ້າພະແນກຍຸຕິທໍາແຂວງຈໍາປາສັກ ລາຍງານກ່ຽວກັບການຈັດຕັ້ງປະຕິບັດຄໍາຕັດສິນຂອງສານ ທີ່ໃຊ້ໄດ້ຢ່າງເດັດຂາດຢູ່ແຂວງຈໍາປາສັກ ປະຈໍາປີ 2023 ເຊິ່ງບັນທ່ານຜູ້ແທນກອງປະຊຸມໄດ້ປະກອບຄໍາຄິດເຫັນຕໍ່ບົດລາຍງານຂອງສອງພາກສ່ວນ ຕາມການເຈາະຈີ້ມຂອງຄະນະປະທານກອງປະຊຸມ ເພື່ອເຮັດໃຫ້ເນື້ອໃນມີຄວາມຄົບຖ້ວນ ແລະ ສາມາດຕິລາຄາໄດ້ດ້ານດີ, ດ້ານອ່ອນ ແລະ ຂໍ້ຄົງຄ້າງ ເພື່ອສືບຕໍ່ຈັດຕັ້ງປະຕິບັດ ແລະ ປັບປຸງແກ້ໄຂໃນຕໍ່ໜ້າ.

ຈາກນັ້ນ, ກອງປະຊຸມໄດ້ສືບຕໍ່ວາລະໃນການຜ່ານ ແລະ ປະກອບຄໍາຄິດເຫັນໃສ່ຕໍ່ຮ່າງມະຕິຂອງກອງປະຊຸມຄົບຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ ວ່າດ້ວຍການຮັບຮອງເອົາບົດລາຍງານການເຄື່ອນໄຫວວຽກງານ ປະຈໍາປີ 2023 ແລະ ທິດທາງແຜນການ ປະຈໍາປີ 2024 ແລະພ້ອມກັນລົງຄະແນນສຽງຮັບຮອງເອົາມະຕິດັ່ງກ່າວ.

ໃນຕອນທ້າຍຂອງກອງປະຊຸມ ທ່ານ ແກ້ວລັດຕະນະ ສີຫາວົງ ຮອງປະທານຄະນະປະຈໍາສະພາປະຊາຊົນແຂວງ, ປະທານກອງປະຊຸມ ໄດ້ມີຄໍາເຫັນໂອ້ລົມຕໍ່ກອງປະຊຸມ ເຊິ່ງທ່ານໄດ້ສະແດງຄວາມຍ້ອງຍໍຊົມເຊີຍຕໍ່ໝາກຜົນຜົນສໍາເລັດທີ່ຄະນະກຳມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບຂອງສະພາປະຊາຊົນແຂວງຈໍາປາສັກ ຍາດໄດ້ ແລະ ເນັ້ນໜັກໃຫ້ຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ ເອົາໃຈໃສ່ເພີ່ມທະວີການຊີ້ນໍາ-ນໍາພາດ້ານການເມືອງແນວຄິດ ກໍ່ຄືການປະຕິບັດພາລະບົດບາດ, ສິດ ແລະໜ້າທີ່ ທີ່ກຳນົດໄວ້ໃນກົດໝາຍ ເພີ່ມທະວີການເຄື່ອນໄຫວຈັດຕັ້ງປະຕິບັດວຽກງານຕ່າງໆ ໃຫ້ບັນລຸຕາມຄາດໝາຍທີ່ວາງໄວ້ ກໍ່ຄືການປະຕິບັດພາລະບົດບາດໃນການເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນບັນດາເຜົ່າ ໃຫ້ມີປະສິດທິພາບສູງ.

(ພາບ-ຂ່າວ:ສົມວິຈິດ)

#ສະພາປະຊາຊົນແຂວງຈໍາປາສັກ

#ສະພາປະຊາຊົນຂັ້ນແຂວງ

#ຜູ້ແທນປະຊາຊົນ