​(ສພຊ) ໃນຕອນເຊົ້າຂອງວັນທີ 28 ທັນວາ 2023 ທີ່ຫໍສະພາແຫ່ງຊາດ ໄດ້ຈັດກອງປະຊຸມຖອດຖອນບົດຮຽນກ່ຽວກັບການເປັນເຈົ້າພາບຈັດກອງປະຊຸມສຸດຍອດລັດຖະສະພາກຳປູເຈຍ-ລາວ-ຫວຽດນາມ (CLV) ຄັ້ງທີ 1 ແລະ ຕ້ອນຮັບປະທານສະພາແຫ່ງຊາດກໍາປູເຈຍ ແລະ ຫວຽດນາມ ມາຢ້ຽມຢາມລາວ, ໂດຍການເປັນປະທານຂອງທ່ານ ສັນຍາ ປຣະເສີດ ປະທານກຳມາທິການການຕ່າງປະເທດ; ເຂົ້າຮ່ວມມີບັນດາທ່ານປະທານ-ຮອງປະທານກຳມາທິການທີ່ກ່ຽວຂ້ອງ, ຄະນະເລຂາທິການສະພາແຫ່ງຊາດ, ອະນຸກຳມະການຕ່າງໆ, ຄະນະກົມ, ຄະນະພະແນກ ແລະ ພະນັກງານທີ່ກ່ຽວຂ້ອງ.​
ກອງປະຊຸມ ໄດ້ຮັບຟັງການລາຍງານຜົນການດຳເນີນ ແລະ ການຮັບໃຊ້ກອງປະຊຸມສຸດຍອດລັດຖະສະພາ CLV ຄັ້ງທີ 1, ການຕ້ອນຮັບປະທານສະພາແຫ່ງຊາດກໍາປູເຈຍ ແລະ ຫວຽດນາມ ທີ່ໄດ້ເດີນທາງມາຢ້ຽມຢາມ ສປປລາວ, ຂະບວນລົດຖີບມິດຕະພາບ ແລະ ການແຂ່ງຂັນລົດຖີບ; ຈາກນັ້ນ, ບັນດາຜູ້ເຂົ້າຮ່ວມຈາກແຕ່ລະພາກສ່ວນໄດ້ພ້ອມກັນປະກອບຄຳຄິດຄຳເຫັນ, ແລກປ່ຽນ ແລະ ຖອດຖອນບົດຮຽນຮ່ວມກັນ ໂດຍໄດ້ຍົກໃຫ້ເຫັນດ້ານດີທີ່ຄວນສືບຕໍ່ ແລະ ຂໍ້ຄົງຄ້າງໃນດ້ານຕ່າງໆທີ່ຈະໄດ້ປັບປຸງແກ້ໄຂ ເພື່ອເຮັດໃຫ້ການເປັນເຈົ້າພາບໃນຄັ້ງຕໍ່ໆໄປ ຫຼື ການເຮັດກິດຈະກຳອື່ນໆ ມີຄວາມສະດວກ ແລະ ມີຜົນສຳເລັດຕາມລະດັບຄາດໝາຍທີ່ວາງໄວ້.
(ພາບ: ນາງ ກຸກກິກ ບຸດດາໄຊ; ຂ່າວ: ນາງ ສຸພາວັນ ຫອມສະນິດ)