(ສພຊ) ໜ່ວຍພັກຮາກຖານກຳມາທິການບັນດາເຜົ່າ, ສະພາແຫ່ງຊາດ ໄດ້ຈັດກອງປະຊຸມສະຫຼຸບການເຄື່ອນ ໄຫວວຽກງານປະຈຳປີ 2023 ເມື່ອວັນທີ 20 ທັນວາຜ່ານມາ ພາຍໃຕ້ການເປັນປະທານຂອງສະຫາຍ ຄຳຈັນ ໂສຕາປະ ເສີດ ເລຂາໜ່ວຍພັກຮາກຖານກຳມາທິການບັນດາເຜົ່າ ໂດຍການເຂົ້າຮ່ວມຂອງສະຫາຍ ພົທ. ສຸວອນ ເລືອງບຸນມີ ກຳ ມະການສູນກາງພັກ, ຮອງປະທານສະພາແຫ່ງຊາດ ທັງເປັນຜູ້ຊີ້ນຳກຳມາທິການບັນດາເຜົ່າ; ມີສະຫາຍຮອງເລຂາໜ່ວຍພັກຮາກຖານ, ຄະນະໜ່ວຍພັກ, ປະທານກວດກາໜ່ວຍພັກ ແລະ ສະມາຊິກພັກພາຍໃນກຳມາທິການບັນດາເຜົ່າເຂົ້າຮ່ວມ.

ໃນກອງປະຊຸມໄດ້ຮັບຟັງບົດສະຫຼຸບການເຄື່ອນໄຫວວຽກງານປະຈຳປີ 2023 ແລະ ທິດທາງແຜນການເຄື່ອນ ໄຫວນຳພາວຽກງານຮອບດ້ານປະຈຳປີ 2024 ຂອງໜ່ວຍພັກຮາກຖານກຳມາທິການບັນດາເຜົ່າ ຈາກສະຫາຍ ແກ້ວຈະ ເລີນ ເຊ່ຍຢິ່ງຢ່າງ ຮອງເລຂາໜ່ວຍພັກ ເຊິ່ງໜ່ວຍພັກຮາກຖານກຳມາທິການບັນດາເຜົ່າ ມີສະມາຊິກພັກທັງໝົດ 23 ສະ ຫາຍ (ຍິງ 12), ໃນນີ້ ມີເລຂາໜ່ວຍພັກ 1 ສະຫາຍ, ຮອງເລຂາໜ່ວຍພັກ 1 ສະຫາຍ ແລະ ຄະນະໜ່ວຍພັກ 3 ສະຫາຍ (ຍິງ 2), ສະມາຊິກພັກປະຈໍາການ 18 ສະຫາຍ (ຍິງ 9 ສະຫາຍ), ສະມາຊິກພັກທີ່ເປັນພະນັກງານມີບໍານານ 5 ສະຫາຍ (ຍິງ 3) ແລະ ສະມາຊິກພັກສໍາຮອງ 1 ສະຫາຍ (ຍິງ; ຫຼັງຈາກນັ້ນ, ສະຫາຍ ພົທ. ສຸວອນ ເລືອງບຸນມີ ໄດ້ມີຄໍາເຫັນໂອ້ລົມ ແລະ ໃຫ້ທິດຊີ້ນຳຕໍ່ກອງປະຊຸມດັ່ງກ່າວ. ສະຫາຍ ຄຳຈັນ ໂສຕາປະເສີດ ໄດ້ກ່າວຮັບຄຳໂອວາດວ່າ: ຈະສືບຕໍ່ເຄື່ອນໄຫວວຽກງານຂອງໜ່ວຍພັກ ດ້ວຍຄຸນນະພາບໃໝ່, ຮັກສາໄດ້ນາມມະຍົດໜ່ວຍພັກປອດໃສ, ເຂັ້ມແຂງ, ໜັກແໜ້ນ (ໜ່ວຍພັກແຂງ); ຈະຈັດຕັ້ງຜັນຂະຫຍາຍຜົນສໍາເລັດຂອງກອງປະຊຸມຄົບຄະນະກໍາມາທິການບັນດາເຜົ່າ ປະຈໍາປີ 2023 ໃຫ້ເກີດດອກອອກຜົນ; ຈະປະສານສົມທົບກັບກໍາມາທິການທີ່ກ່ຽວຂ້ອງພາຍໃນສະພາແຫ່ງຊາດ ແລະ ພາກ ສ່ວນ-ຂະແໜງການພາຍນອກ ດໍາເນີນການຕິດຕາມກວດກາການຈັດຕັ້ງປະຕິບັດມະຕິ 82/ສພຊ.

(ພາບ ແລະ ຂ່າວ: ນາງ ສຸພາວັນ ຫອມສະນິດ)