ເພື່ອສະຫຼຸບຕີລາຄາການຈັດຕັ້ງປະຕິບັດໜ້າທີ່ວຽກງານ, ໃຫ້ເຫັນດ້ານດີ, ດ້ານອອ່ນຂໍ້ຄົງຄ້າງ ຕະຫຼອດໄລຍະໜື່ງປີຜ່ານມາ ແລະ ທັງເປັນການກະກຽມເນື້ອໃນໃຫ້ແກ່ກອງປະຊຸມສະໄໝສາມັນສາມັນ ເທື່ອທີ 6 ຂອງສະພາປະຊາ ຊົນແຂວງ. ໃນວັນທີ 19 ທັນວາ 2023 ນີ້, ຄະນະກໍາມະການເສດຖະກິດ, ແຜນການ ແລະ ການເງິນ (ຄສຜງ) ສະພາປະຊາຊົນແຂວງ ໄຊຍະບູລີ ໄດ້ເປີດກອງປະຊຸມຮ່ວມກັບບັນດາພະແຜນການ, ອົງການທີ່ກ່ຽວຂ້ອງຂົງເຂດເສດຖະກິດ ປະຈໍາປີ 2023 ຂື້ນ ໂດຍການເປັນປະທານ ຂອງທ່ານ ຈັດຕະວາ ແກ້ວຄໍາເພັດ ປະທານຄະນະກໍາມະການເສດຖະກິດ, ແຜນການ ແລະ ການເງິນ, ມີບັນດາທ່ານຮອງປະທານຄະນະກໍາມະການ; ສະມາຊິກສະພາປະຊາຊົນແຂວງ, ຫົວໜ້າ-ຮອງຫົວໜ້າພະແນກການ, ອົງການ ທີ່ກ່ຽວຂ້ອງ ພ້ອມດ້ວຍພະນັກງານຫຼັກແຫຼ່ງພາຍໃນສະພາປະຊາຊົນແຂວງເຂົ້າຮ່ວມ.

ກອງປະຊຸມດັ່ງກ່າວໄດ້ຮັບຟັງລາຍງານ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງ ປະຈໍາປີ 2023 ແລະ ທິດທາງແຜນການປີ 2024; ສະຫຼຸບຂາດຕົວການຈັດຕັ້ງປະຕິບັດງົບປະມານແຫ່ງລັດ ປະຈໍາປີ 2022 ແລະ ການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາປີ 2023 ແລະ ທິດທາງແຜນການ ປະຈໍາປີ 2024 ແລະ ການຈັດຕັ້ງປະຕິບັດວຽກງານຄະນະກຳມະການເສດຖະກິດ, ແຜນການ ແລະ ການເງິນ ສະພາປະຊາຊົນແຂວງ ປະຈໍາປີ 2023 ແລະ ທິດທາງແຜນການ ປະຈໍາປີ 2024,

ຜົນການກວດກາ ຕາມຜົນການກວດສອບປະຈໍາປີ 2021, ການຈັດຕັ້ງປະຕິບັດວຽກງານປະຈໍາປີ 2023 ແລະທິດທາງແຜນການ ປະຈໍາປີ 2024 ຂອງອົງການກວດກາລັດແຂວງ. ພ້ອມດຽວກັນນີ້ ບັນດາທ່ານຜູ້ເຂົ້າຮ່ວມໄດ້ພ້ອມ ກັນຄົ້ນຄວ້າ, ປະກອບຄໍາຄິດຄໍາເຫັນຢ່າງກົງໄປ-ກົງມາ ແລະ ຍັງໄດ້ຮັບຟັງການຊີ້ແຈງໃຫ້ຄວາມກະຈ່າງແຈ້ງຂອງຂະແໜງການກ່ຽວຂ້ອງ ຕາມການເຈາະຈີ້ມ, ຊັກຖາມຂອງບັນດາທ່ານສະມາຊິກສະພາປະຊາຊົນແຂວງ ກອງປະຊຸມດັ່ງກ່າວໄດ້ປິດລົງໃນຕອນບ່າຍຂອງວັນດຽວກັນ.

                                                                                                                                                    ໂດຍ: ອິນທີ ຂຽວສີຟ້າ