ໃນວັນທີ 15 ທັນວາ 2023 ຢູ່ທີ່ຫ້ອງປະຊຸມຂອງສະພາປະຊາຊົນແຂວງຊຽງຂວາງ ໄດ້ເປີດກອງປະຊຸມຄົບຄະນະຂອງຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າ ປະຈຳປີ 2023 ຢ່າງເປັນທາງການ ພາຍໃຕ້ການເປັນປະທານຮ່ວມ ຂອງທ່ານ ນ. ສົມພອນ ໂສພິລາວັນ ຮອງປະທານສະພາປະຊາຊົນແຂວງ ແລະ ທ່ານ ຄຳແພງ ທຳມະວອນ ປະທານຄະນະກຳມະການວັດທະນະທຳ-ສັງ ຄົມ ແລະ ບັນດາເຜົ່າ ມີບັນດາທ່ານສະມາຊິກສະພາປະຊາຊົນແຂວງ ຊຸດທີ II ປະຈຳບັນດາເມືອງ, ຫົວໜ້າ-ຮອງຫົວໜ້າພະແນກການທີ່ກ່ຽວຂ້ອງ, ຕາງໜ້າທະນາຄານ, ອົງການຈັດຕັ້ງມະຫາຊົນ ແລະ ພະ ນັກງານຂອງສະພາປະຊາຊົນແຂວງເຂົ້າຮ່ວມ.

ກອງປະຊຸມໄດ້ຮັບຟັງການສະຫຼຸບ ລາຍງານການເຄື່ອນໄຫວວຽກງານ ຂອງຄະນະກຳມະການວັດທະນະທຳ, ສັງຄົມ ແລະ ບັນດາເຜົ່າໃນໄລຍະ 1 ປີຜ່ານມາ ເຊິ່ງສະແດງໃຫ້ເຫັນຜົນສຳເລັດໃນຫຼາຍດ້ານ ໃນການປະຕິບັດພາລະບົດ, ສິດ ແລະ ໜ້າທີຂອງຕົນ ເປັນຕົ້ນແມ່ນ ການລົງຕິດຕາມກວດກາ ຊູກຍູ້ບັນດາພະແນກການທີ່ກ່ຽວຂ້ອງ ໃນການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງໃນຂົງເຂດວັດທະນະທຳ-ສັງຄົມ, ໄດ້ເອົາໃຈໃສ່ເຂົ້າຮ່ວມກອງປະຊຸມຕ່າງ, ພິຈາລະນາ, ຄົ້ນຄວ້າ ແລະ ປຶກສາຫາລື ຕົກລົງບັນຫາສຳຄັນພື້ນຖານຂອງທ້ອງຖິ່ນ, ໄດ້ມີການປັບປຸງກົນໄກ ແບບແຜນວິທີເຮັດວຽກ ໃນການເຄື່ອນໄຫວວຽກງານໃຫ້ມີຄວາມເຂັ້ມແຂງ ແລະ ວາງທິດທາງແຜນການ ໃນການຈັດຕັ້ງປະຕິບັດວຽກງານ ປະຈຳປີ 2024.

ກອງປະຊຸມຍັງໄດ້ຮັບຟັງການລາຍງານ ຂອງຕາງໜ້າພະແນກຖະແຫຼງຂ່າວ, ວັດທະນະທໍາ ແລະ ທ້ອງທ່ຽວ ກ່ຽວກັບການຈັດຕັ້ງປະຕິບັດ ມະຕິເລກທີ 75/ສພຂ ແລະ ທິດທາງແຜນການ ການກະກຽມຄວາມພ້ອມຕ້ອນຮັບປີທ່ອງທ່ຽວລາວ ປີ 2024 ສະແດງອອກໃນຫຼາຍດ້ານ ທົ່ວແຂວງຊຽງຂວາງໄດ້ຂຶ້ນບັນຊີແຫຼ່ງທ້ອງທ່ຽວທັງໝົດ 145 ແຫ່ງ, ໄດ້ເອົາໃຈໃສ່ ລົງຊຸກຍູ້, ຕິດຕາມກວດກາ ຂະ ແໜງການກ່ຽວຂ້ອງ ເພື່ອສ້າງ, ປັບປຸງແຫຼງທ່ອງທ່ຽວ ແລະ ລົງຊູກຍູ້ຜູ້ປະກອບການທາງດ້ານການບໍລິການ ເພື່ອກຽມຄວາມພ້ອມຕ້ອນຮັບນັກທ່ອງທ່ຽວທີ່ເຂົ້່າມາທ່ຽວຢູ່ພາຍໃນແຂວງ, ພ້ອມທັງຄາດຄະເນຈັດພິທີເປີດປີທ່ອງທ່ຽວລາວ ປີ 2024 ເປັນຕົ້ນແມ່ນ: ງານບຸນພະທາດຫຼວງແປດລ່ຽມມິ່ງຂັວນເມືອງພວນ, ງານບຸນພະເຈົ້າອົງຫຼວງປະທານພອນ ແລະ ງານບຸນປະເພນີອື່ນໆຕື່ມອີກ.

ຈາກນັ້ນຜູ້ເຂົ້າຮ່ວມຍັງໄດ້ມີຄຳຄິດເຫັນປະກອບໃສ່ ໃນການສະຫຼຸບ ການເຄື່ອນໄຫວວຽກງານໃນໄລຍະຜ່ານມາໃຫ້ຄົບຖ້ວນສົມບູນ ແລະ ວາງທິດທາງແຜນການຈັດຕັ້ງປະຕິບັດວຽກງານໃນຕໍ່ໜ້າໃຫ້ມີຄວາມອະອຽດ ສອດຄອງກັບວຽກງານຕົວຈິງ; ຕອນທ້າຍທ່ານ ນ. ສົມພອນ ໂສພິລາວັນ ຍັງໄດ້ໂອ້ລົມຕໍ່ກອງປະຊຸມ ເພື່ອເປັນທິດທາງໃນການຈັດຕັ້ງປະຕິບັດ ທ່ານໄດ້ເນັ້ນໃຫ້ທຸກທະແໜງການທີ່ກ່ຽວຂ້ອງໃຫ້ເອົາໃຈໃສ່ ໃນການປະຕິບັດພາລະບົດບາດ, ສິດ ແລະ ໜ້າທີ່ຂອງຕົນດ້ວຍຄວາມຮັບຜິດຊອບສູງ ໂດຍສະເພາະແມ່ນເປັນເຈົ້າການໃນການ ກະກຽມຄວາມພ້ອມໃນການຕ້ອນຮັບນັກທ່ອງທ່ຽວທີ່ຈະເຂົ້າມາຢ້ຽມຢາມແຂວງຊຽງຂວາງ ໃນປີທ່ອງທ່ຽວລາວ ປີ 2024 ໃກ້ຈະມາເຖິງນີ້.

ສະພາປະຊາຊົນແຂວງຊຽງຂວາງ

ຂ່າວໂດຍ: ບຸນສີ ທິດທິເດດ