(ສພຊ) ລະຫວ່າງວັນທີ 14-17 ກຸມພາ 2018, ທ່ານ ບຸນປອນ ບຸດຕະນະວົງ ຮອງ​ປະທານ​ສະພາ​ແຫ່ງ​ຊາດ ພ້ອມດ້ວຍຄະນະ ໄດ້ສືບຕໍ່ເຄື່ອນໄຫວຕິດຕາມກວດກາ ກ່ຽວກັບຜົນກະທົບຈາກການນໍາໃຊ້ສານເຄມີອັນຕະລາຍເກີນຄ່າມາດຕະຖານຕໍ່ສິ່ງແວດລ້ອມ, ສັງຄົມ ແລະ ທໍາມະຊາດ ຢູ່ແຂວງອຸດົມໄຊ.

ໂອກາດລົງເຮັດວຽກຢູ່ແຂວງອຸດົມໄຊ, ທີ່ຫ້ອງປະຊຸມພະແນກພາຍໃນແຂວງ ຄະນະໄດ້ຮັບຟັງການລາຍງານຫຍໍ້ຈາກບັນດາພະແນກການກ່ຽວຂ້ອງຂອງແຂວງ ​ແລະ ມີບາງຄໍາຖາມເຈາະຈີ້ມ, ​ແລກປ່ຽນຄໍາຄິດຄໍາເຫັນຕໍ່ບັນດາພະແນກການ; ຈາກນັ້ນ ຕາງໜ້າບັນດາພະແນກການ ໄດ້ອະທິບາຍຊີ້ແຈງຕໍ່ບັນຫາທີ່ຄະນະໃຫ້ຄວາມສົນໃຈ.

ຫລັງຈາກນັ້ນ, ຄະນະໄດ້ສົມທົບກັບອໍານາດການປົກຄອງແຂວງ, ບັນດາທ່ານ ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ, ອໍານາດການປົກຄອງເມືອງ ໄດ້ລົງ ຕິດຕາມບັນດາໂຄງການທີ່ນໍາໃຊ້ສານເຄມີທີ່ມີຄວາມສ່ຽງທາງດ້ານສິ່ງແວດລ້ອມ ເປັນຕົ້ນຢ້ຽມຢາມໂຮງງານອົບໝາກເດືອຍ, ໂຄງການໄຟຟ້ານໍ້າຕົກນໍ້າແບງ ຢູ່ເມືອງປາກແບງ; ຢ້ຽມຢາມໂຮງງານອົບສາລີ, ສວນກ້ວຍຫອມ ຢູ່ເມືອງຮຸນ.

​ໃນ​ໂອກາດ​ນີ້, ທ່ານຮອງປະທານສະພາແຫ່ງຊາດ ໄດ້ມີຄໍາເຫັນໂອ້ລົມ ເຊິ່ງທ່ານໄດ້ສະແດງຄວາມຍ້ອງຍໍຕໍ່ການນໍາແຕ່ລະພາກສ່ວນ ທີ່ໄດ້ເອົາໃຈໃສ່ຕໍ່ການ ຈັດຕັ້ງປະຕິບັດວຽກງານ ແລະ ສະໜອງຂໍ້ມູນໃຫ້ຄະນະໄດ້ຕາມລະດັບຄາດໝາຍ; ນອກຈາກນີ້, ທ່ານໄດ້ຮຽກຮ້ອງໃຫ້ບັນດາພະແນກການເອົາໃຈໃສ່ຕິດຕາມກວດກາເຂັ້ມງວດ ຕໍ່ບັນດາໂຮງງານ, ບັນດາບໍລິສັດທີ່ບໍ່ໄດ້ຮັບອະນຸຍາດ, ເອົາໃຈໃສ່ຕິດຕາມການນໍາເຂົ້າສານເຄມີ, ປະສານສົມທົບຮ່ວມກັບບັນດາພະແນກການ ເພື່ອຖອດຖອນບົດຮຽນຮ່ວມກັນ, ຕິດຕາມກວດກາດ້ານສຸຂະພາບ ແລະ ດ້ານແຮງງານ ຖືກຕ້ອງຕາມລະບຽບກົດໝາຍຫລືບໍ່ ແລະ ຍັງໄດ້ເນັ້ນເອົາໃຈໃສ່ຈັດຕັ້ງ ປະຕິບັດມະຕິສະບັບເລກທີ 018/ສພຊ ລົງວັນທີ 28 ພະຈິກ 2016 ກ່ຽວກັບການອອກນິຕິກໍາລຸ່ມ ກົດໝາຍ ແລະ ຜົນກະທົບຈາກການນໍາໃຊ້ສານເຄມີອັນຕະລາຍເກີນຄ່າມາດຕະຖານຕໍ່ສິ່ງແວດ ລ້ອມ, ສັງຄົມ ແລະ ທໍາມະຊາດ ເພື່ອເກັບກໍາຂໍ້ມູນ ສະເໜີວິທີການ ແລະ ມາດຕະການໃນການ ແກ້ໄຂຕໍ່ກອງປະຊຸມຄະນະປະຈໍາສະພາແຫ່ງຊາດ ແລະ ກະກຽມໃສ່ກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດຊຸດທີ VIII.