ໃນຕອນບ່າຍວັນທີ 13 ທັນວາ 2023 ທີ່ຜ່ານມາ ທີ່ສະພາປະຊາຊົນແຂວງຈໍາປາສັກ ນໍາໂດຍ ສະຫາຍ ສາຍທອງ ໄຊຍະວົງ ຮອງເລຂາຄະນະບໍລິຫານງານພັກແຂວງ,​ ປະທານຄະນະສະມາຊິກສະພາແຫ່ງຊາດ ເຂດເລືອກຕັ້ງທີ 15 ທັງເປັນປະທານສະພາປະຊາຊົນແຂວງຈໍາປາສັກ ພ້ອມຄະນະ ໄດ້ຕ້ອນຮັບການມາເຄື່ອນໄຫວຢ້ຽມຢາມ ແລະ ເຮັດວຽກ ຂອງຄະນະຜູ້ແທນສະພາປະຊາຊົນແຂວງກວາງນາມ ສສ ຫວຽດນາມ ນຳໂດຍ ສະຫາຍ ຫງວຽນ ກົງ ແທງ ກໍາມະການພັກແຂວງ, ຮອງປະທານສະພາປະຊາຊົນແຂວງກວາງນາມ,

ພ້ອມດ້ວຍຄະນະ ທີ່ເດີນທາງມາຢ້ຽມຢາມ ແລະ ເຮັດວຽກຢູ່ແຂວງຈໍາປາສັກ.

ການຕ້ອນຮັບໄດ້ມີພິທີພົບປະ ແລະ ເຮັດວຽກຮ່ວມກັນ ໂດຍໃນພິທີ ສະຫາຍ ສາຍທອງ ໄຊຍະວົງ ຮອງເລຂາຄະນະບໍລິຫານງານພັກແຂວງ, ຮອງປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 15, ຮອງປະທານສະພາປະຊາຊົນແຂວງຈໍາປາສັກ ໄດ້ກ່າວສະແດງຄວາມຕ້ອນຮັບຄະນະຜູ້ແທນສະພາປະຊາຊົນແຂວງກວາງນາມ ສສ ຫວຽດນາມ ຢ່າງອົບອຸ່ນ ແລະ ໄດ້ລາຍງານສະພາບລວມ ການຈັດຕັ້ງປະຕິບັດວຽກງານຂອງແຂວງ ກໍຄືການຈັດຕັ້ງປະຕິບັດວຽກງານຂອງສະພາປະຊາຊົນແຂວງຈໍາປາສັກ ໂດຍຫຍໍ້, ພ້ອມທັງຕີລາຄາສູງຕໍ່ການມາຢ້ຽມຢາມ ແລະ ເຮັດວຽກຂອງຄະນະຜູ້ແທນສະພາປະຊາຊົນແຂວງກວາງນາມ ໃນຄັ້ງນີ້ວ່າ: ເປັນການປະກອບສ່ວນອັນສຳຄັນ ເຂົ້າໃນການເສີມສ້າງມູນເຊື້ອອັນດີງາມ ແຫ່ງສາຍພົວພັນມິດຕະພາບອັນຫຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ, ຫວຽດນາມ-ລາວ ອ້າຍນ້ອງ ກໍ່ຄື ສະພາປະຊາຊົນສອງແຂວງ ພວກເຮົາ ທີ່ມີມາແຕ່ດົນນານແລ້ວ ໃຫ້ມີຄວາມແໜ້ນແຟ້ນ ຈະເລີນງອກງາມ ແລະ ເກີດດອກອອກຜົນຍິ່ງໆຂຶ້ນ.

ຈາກນັ້ນ, ສະຫາຍ ຫງວຽນ ກົງ ແທງ ກໍາມະການພັກແຂວງ, ຮອງປະທານສະພາປະຊາຊົນແຂວງກວາງນາມ ສສ ຫວຽດນາມ ໄດ້ກ່າວສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ອໍານວຍຄວາມສະດວກດ້ານຕ່າງໆ ຕໍ່ການມາຢ້ຽມຢາມແຂວງຈໍາປາສັກ ໃນຄັ້ງນີ້, ພ້ອມທັງໄດ້ລາຍງານສະພາບລວມ ແລະ ການຈັດຕັ້ງປະຕິບັດວຽກງານຂອງແຂວງກວາງນາມ ໂດຍສະເພາະການເຄື່ອນໄຫວວຽກງານຂອງສະພາປະຊາຊົນແຂວງ ໂດຍຫຍໍ້.

ການມາຢ້ຽມຢາມ ແລະ ເຮັດວຽກ ຂອງຄະນະຜູ້ແທນສະພາປະຊາຊົນແຂວງກວາງນາມ ສສ ຫວຽດນາມ ໃນຄັ້ງນີ້, ໃນພິທີພົບປະ ສະພາປະຊາຊົນແຂວງ ທັງ 2 ຝ່າຍ ໄດ້ສົນທະນາແລກປ່ຽນບົດຮຽນ ແລະເຫັນດີເປັນເອກະພາບກັນໃນການເພີ່ມທະວີການຈັດຕັ້ງປະຕິບັດວຽກງານການເສີມສ້າງມູນເຊື້ອອັນດີງາມ ແຫ່ງສາຍພົວພັນມິດຕະພາບອັນຫຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ, ຫວຽດນາມ-ລາວ ອ້າຍນ້ອງ ເສີມສ້າງຜັນຂະຫຍາຍສາຍພົວພັນການຮ່ວມມືດັ່ງກ່າວ ເຂົ້າສູ່ລວງເລິກໃນການໃຫ້ການຊ່ວຍເຫຼືອເຊິ່ງກັນ ແລະ ກັນ ລະຫວ່າງ ສະພາປະຊາຊົນແຂວງຈໍາປາສັກ ສປປ ລາວ ກັບ ສະພາປະຊາຊົນແຂວງກວາງນາມ ຫວຽດນາມ ໃຫ້ໄດ້ມີການເຊັນບົດບັນທຶກຮ່ວມມືກັນໃນຕໍ່ໜ້າ.

(ພາບ ແລະ ຂ່າວ: ສົມວິຈິດ ໄຊມົນຕີ)