ວັນທີ 5 ທັນວາ 2023 ຢູ່ທີ່ສຳນັກງານສະພາປະຊາຊົນແຂວງຄໍາມ່ວນ ໄດ້ຈັດພິທີເຜີຍແຜ່ເຊື່ອມຊຶມເອກະສານສຳຄັນຂອງພັກ, ໂດຍການເປັນປະທານຂອງ ສະຫາຍ ນາງ ບັງອອນ ໄຊຍະສິດ ກຳມະການປະຈໍາພັກແຂວງ ຮອງປະທານສະພາປະຊາຊົນແຂວງຄໍາມ່ວນ, ມີ ສະຫາຍ ບົວພັນ ແສງຈັນ ກຳມະການພັກແຂວງ ຮອງປະທານສະພາປະຊາຊົນແຂວງ, ມີບັນດາ ສະຫາຍຄະນະພັກສະພາປະຊາຊົນແຂວງ, ຄະນະກຳມະການ, ຄະນະເລຂາທິການ, ສະມາຊິກພັກ ແລະ ພະນັກງານ-ລັດຖະກອນສະພາປະຊາຊົນແຂວງຄໍາມ່ວນເຂົ້າຮ່ວມ.

     ໃນພິທີ ສະຫາຍ ນາງ ບັງອອນ ໄຊຍະສິດ ກ່າວເປີດກອງປະຊຸມ ພ້ອມທັງນຳພາດຳເນີນກອງປະຊຸມ, ຈາກນັ້ນ ບັນດາສະຫາຍຄະນະນຳຂອງສະພາປະຊາຊົນແຂວງຄໍາມ່ວນ ກໍ່ໄດ້ຜັດປ່ຽນກັນຂຶ້ນເຜີຍແຜ່ຜັນຂະຫຍາຍເອກະສານກ່ຽວກັບຄຳແນະນຳການຈັດຕັ້ງປະຕິບັດຄໍາສັ່ງຂອງຄະນະເລຂາທິການສູນກາງພັກ ວ່າດ້ວຍການກະກຽມ ແລະ ດຳເນີນກອງປະຊຸມໃຫ່ຍ 3 ຂັ້ນຂອງພັກ ສະບັບເລກທີ 221/ຄຈສພ, ລົງວັນທີ 16 ສິງຫາ 2023, ຄໍາສັ່ງວ່າດ້ວຍການກະກຽມ ແລະ ດຳເນີນກອງປະຊຸມໃຫ່ຍ 3 ຂັ້ນຂອງພັກ ສະບັບເລກທີ 411/ຄລສພ, ລົງວັນທີ 8 ສິງຫາ 2023, ຄໍາແນະນໍາການກະກຽມ ແລະ ດໍາເນີນຊີວິດການເມືອງທ້າຍສະໄໝກອງປະຊຸມໃຫ່ຍ 3 ຂັ້ນຂອງພັກ ສະບັບເລກທີ 285/ຄກສພ, ລົງວັນທີ 15 ກັນຍາ 2023, ບົດສະຫຼຸບຕີລາຄາການຈັດຕັ້ງປະຕິບັດມະຕິກອງປະຊຸມໃຫ່ຍຄົບຄະນະກາງສະໄໝ ຂອງຄະນະບໍລິຫານງານພັກແຂວງ ສະໄໝທີ X, ຜ່ານບົດສະຫຼຸບຕີລາຄາແຜນພັດທະນາເສດຖະກິດ-ສັງຄົມ 5 ປີຄັ້ງທີ X ຂອງແຂວງ(ໄລຍະກາງສະໄໝ), ມະຕິກອງປະຊຸມຄົບຄະນະກາງສະໄໝຂອງຄະນະບໍລິຫານງານພັກແຂວງ, ມະຕິກອງປະຊຸມຄົບຄະນະກາງສະໄໝ ຂອງຄະນະບໍລິຫານງານສູນກາງພັກ, ຄໍາສັ່ງແນະນຳຂອງຄະນະປະຈໍາພັກແຂວງ ສະບັບເລກທີ 12/ຄປຈ.ຄມ, ລົງວັນທີ 31 ຕຸລາ 2023 ກ່ຽວກັບການຈັດຕັ້ງເຊື່ອມຊຶມ ແລະ ຜັນຂະຫຍາຍມະຕິກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກແຂວງ, ຄໍາແນະນຳກ່ຽວກັບການຈັດຕັ້ງດຳເນີນກອງປະຊຸມໃຫ່ຍອົງຄະນະພັກເມືອງ, ຄະນະພັກກອງບັນຊາການທະຫານແຂວງ, ຄະນະພັກກອງບັນຊາການປ້ອງກັນຄວາມສະຫງົບແຂວງ, ຄະນະພັກຮາກຖານ, ໜ່ວຍພັກຮາກຖານ ໃນທົ່ວແຂວງຄໍາມ່ວນ ສະບັບເລກທີ 14/ຄປຈ.ຄມ, ລົງວັນທີ 31 ຕຸລາ 2023 ແລະ ບົດໂອ້ລົມຂອງ ສະຫາຍ ຄໍາພັນ ພົມມະທັດ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ປະທານຄະນະກວດກາສູນກາງພັກ, ປະທານອົງການກວດກາແຫ່ງລັດ ແລະ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ ຕໍ່ກອງປະຊຸມວຽກງານກວດກາທົ່ວປະເທດ ປະຈໍາປີ 2022.

ຕອນທ້າຍກອງປະຊຸມ ສະຫາຍ ນາງ ບັງອອນ ໄຊຍະສິດ ກຳມະການປະຈໍາພັກແຂວງ ຮອງປະທານສະພາປະຊາຊົນແຂວງຄໍາມ່ວນ ກໍ່ໃຫ້ກຽດໂອ້ລົມ ໂດຍທ່ານໄດ້ເນັ້ນໃຫ້ພະນັກງານ, ສະມະຊິກພັກ ໃຫ້ເປັນເຈົ້າການຄົ້ນຄວ້າເຊື່ອມຊຶມກໍາແໜ້ນ ແລະ ຜັນຂະຫຍາຍຜົນກອງປະຊຸມຄົບຄະນະບໍລິຫານງານສູນກາງພັກ ສະໄໝ XI ແລະ ຜົນຂອງກອງປະຊຸມຄົບຄະນະບໍລິຫານງານພັກແຂວງ ສະໄໝ X ເພື່ອໃຫ້ມີຜົນສໍາເລັດຕາມຄາດໝາຍ, ຍົກສູງຄວາມຮັບຜິດຊອບໜ້າທີ່ການເມືອງ ຂອງຕົນ, ພ້ອມກັນຕັ້ງໜ້າເສີມຂະຫຍາຍ ແລະ ປັບປຸງແກ້ໄຂບັນຫາຄົງຄ້າງວຽກງານທີ່ຮັບຜິດຊອບ, ພ້ອມກັນສຸມໃສ່ການກະກຽມກອງປະຊຸມສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນປະຈໍາປີ 2023 ແລະ ກອງປະຊຸມໃຫຍ່ ຄັ້ງທີ IV ຂອງໜ່ວຍພັກຮາກຖານສະພາປະຊາຊົນແຂວງຄໍາມ່ວນໃຫ້ມີຜົນສຳເລັດຕາມຄາດໝາຍ.

ໂດຍ: ເອື້ອ ມະໂນສິງ