ເພື່ອລະນຶກເຖິງ ວັນຄ້າຍວັນເກີດ ຂອງ ທ່ານ ຟີແລນ ກາດສໂຕຼ ອາດີດ ຜູ້ນຳແຫ່ງການປະຕິວັດ ກູບາ ຄົບຮອບ 97 ປີ; ພ້ອມທັງເປັນການກະກຽມ ໃຫ້ແກ່ການສະເຫຼີມສະຫຼອງ ວັນສ້າງຕັ້ງສາຍພົວພັນການທູດ ຄົບຮອບ 50 ປີ ລະຫວ່າງ ລາວ ແລະ ກູບາ ໃນປີ 2024.

            ຕອນເຊົ້າ ວັນທີ 21 ພະຈິກ 2023 ນີ້ ຢູ່ທີ່ຫ້ອງກຽດຕິຍົດ ສະພາປະຊາຊົນແຂວງ ທ່ານ ສົມສັກ ດອນຈານິດ ກຳມະການພັກແຂວງ ຮອງປະທານສະພາປະຊາຊົນ ແຂວງຫົວພັນ ໄດ້ຕ້ອນຮັບ ການມາຢ້ຽມຢາມ ຂອງທ່ານ ແອນນາ ວຽນ ວາລເດສ ( Enna Viant Valdes ) ເອກອັກຄະລັດຖະທູດ ແຫ່ງ ສ. ກູບາ ປະຈຳ ສາທາລະນະລັດ ປະຊາທິປະໄຕ ປະຊາຊົນລາວ ພ້ອມດ້ວຍຄະນະ ຈາກສູນກາງ ໃນໂອກາດນີ້ ທ່ານ ສົມສັກ ດອນຈານິດ ກໍໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ການມາຢ້ຽມຢາມ ແລະ ເຮັດວຽກຢູ່ ແຂວງຫົວພັນ ຂອງເອກອັກຄະລັດຖະທູດ ແຫ່ງ ສ. ກູບາ ປະຈຳລາວ. ຈາກນັ້ນ, ຕ່າງຝ່າຍກໍໄດ້ ລາຍງານ ສະພາບການເຄື່ອນໄຫວວຽກງານ ຂອງແຕ່ລະຝ່າຍ ໂດຍຫຍໍ້ ເຊິ່ງກັນ ແລະ ກັນໄດ້ຮັບຊາບ ເປັນຕົ້ນແມ່ນ ທີ່ຕັ້ງ, ຈຸດພິເສດ ແລະ ພາລະບົດບາດຂອງສະພາປະຊາຊົນແຂວງ ແລະ ສ. ກູບາ ພ້ອມທັງສຶກສາຄວາມເປັນໄປໄດ້ ໃນການຮ່ວມມືໃນຂົງເຂດວຽກງານ ສຶກສາ, ສາທາລະນະສຸກ ແລະ ອື່ນໆ ທັງນີ້ກໍ່ເພື່ອເປັນການຮັດແໜ້ນຄວາມສາມັກຄີ ມິດຕະພາບ ລະຫວ່າງ ສປປ ລາວ ແລະ ສ. ກູບາ ເວົ້າລວມ ເວົ້າສະເພາະ ແມ່ນ ແຂວງຫົວພັນ ກັບ ສ. ກູບາ ໃຫ້ມີຄວາມແໜ້ນແຟ້ນ ຂຶ້ນເລື້ອຍໆ.

ພາບ ແລະ ຂ່າວໂດຍ ນາງ ປຸ້ຍນິຕາ ເພັງມີໄຊ.