ໃນວັນທີ 30 ພະຈິກ 2023 ທີ່ສະພາປະຊາຊົນແຂວງຄໍາມ່ວນ ໄດ້ຈັດກອງປະຊຸມສຳມະນາວຽກງານຕິດຕາມກວດກາການປະເມີນຜົນການຈັດຕັ້ງປະຕິບັດກົດໝາຍ ໃຫ້ແກ່ ສະມາຊິກສະພາປະຊາຊົນແຂວງຄໍາມ່ວນ ແລະ ເສນາທິການຊ່ວຍວຽກ ຂອງສະພາປະຊາຊົນແຂວງຄໍາມ່ວນ ໂດຍການເປັນປະທານຂອງ ບຸນມີ ພິມມະສອນ ປະທານສະພາປະຊາຊົນແຂວງຄໍາມ່ວນ, ເຂົ້າຮ່ວມມີບັນດາທ່ານ ຄະນະປະຈໍາສະພາປະຊາຊົນແຂວງ,  ສະມາຊິກສະພາປະຊາຊົນແຂວງປະຈໍາເຂດເລືອກຕັ້ງ 10 ຕົວເມືອງ, ນັກວິທະຍາກອນຈາກສູນກາງ ແລະ ພະນັກງານເສນາທິການຊ່ວຍວຽກ ຂອງສະພາປະຊາຊົນແຂວງຄໍາມ່ວນເຂົ້າຮ່ວມທັງໝົດ 101  ທ່ານ, ຍິງ 37 ທ່ານ.

ໂອກາດດັ່ງກ່າວ ທ່ານ ບຸນມີ ພິມມະສອນ  ໄດ້ມີຄໍາເຫັນກ່າວເປີດກອງປະຊຸມ ເຊິ່ງທ່ານໄດ້ຮຽກຮ້ອງບັນດາທ່ານທີ່ເຂົ້າຮ່ວມກອງປະຊຸມຄັ້ງນີ້ ພ້ອມກັນສຸມສະຕິປັນຍາ ແລະ ນໍາໃຊ້ເວລາອັນມີຄຸນຄ່ານີ້ເຂົ້າໃນການຟັງ, ການສົນທະນາ ແລະ ແລກປ່ຽນບົດຮຽນນໍາກັນໃຫ້ເລິກເຊິ່ງ, ສາມາດນໍາເອົາບົດຮຽນໄປຈັດຕັ້ງຜັນຂະຫຍາຍເຂົ້າໃນການປະຕິບັດພາລະບົດບາດຂອງຕົນໃຫ້ດີຂຶ້ນ, ສະເໜີໃຫ້ບັນດາທ່ານຄະນະຮັບຜິດຊອບກອງປະຊຸມ ຈົ່ງກະກຽມຄວາມພ້ອມ, ອໍານວຍຄວາມສະດວກໃຫ້ແກ່ວິທະຍາກອນ ແລະ ນັກສໍາມະນາກອນ ໄດ້ຈັດຕັ້ງເຄື່ອນໄຫວຕາມວາລະກອງປະຊຸມ ແລະ ທັນເວລາ, ເຮັດໃຫ້ກອງປະຊຸມໄດ້ດໍາເນີນສໍາເລັດຕາມຈຸດປະສົງ ແລະ ຄາດໝາຍທີ່ກໍານົດໄວ້. ຫລັງຈາກນັ້ນກອງປະຊຸມໄດ້ຮັບຟັງສະເໜີບັນຍາຍບົດກ່ຽວກັບການຕິດຕາມກວດກາ ການປະເມີນຜົນການຈັດຕັ້ງປະຕິບັດກົດໝາຍໃນຂົງເຂດເສດຖະກິດ ແລະ ຂົງເຂດຍຸຕິທຳ; ການຕິດຕາມກວດກາຂອງ ສະພາປະຊາຊົນຂັ້ນແຂວງ; ໄດ້ຮັບຟັງການເຜີຍແຜ່ ມະຕິຂອງຄະນະປະຈໍາສະພາແຫ່ງຊາດ ວ່າດ້ວຍການຕິດຕາມກວດກາ ການປະເມີນຜົນການປະຕິບັດກົດໝາຍ ສະບັບເລກທີ 53/ຄປຈ, ລົງວັນທີ 23 ສິງຫາ 2022 ແລະ  ເຜີຍແຜ່ຄູ່ມືການຕິດຕາມກວດກາ ການປະເມີນຜົນການຈັດຕັ້ງປະຕິບັດກົດໝາຍ, ພ້ອມນັ້ນ, ບັນດາທ່ານຜູ້ແທນ ແລະ ແຂກຜູ້ເຂົ້າຮ່ວມກອງປະຊຸມໄດ້ສຸມໃສ່ແລກປ່ຽນຄຳຄິດຄຳເຫັນຢ່າງກົງໄປກົງມາແຕ່ລະຫົວຂໍ້ຕ່າງໆທີ່ວິທະຍາກອນໄດ້ສະເໜີໃນບັນດາເນື້ອດັ່ງກ່າວ ເພື່ອເຮັດໃຫ້ການຈັດຕັ້ງປະຕິບັດວຽກງານ, ມີຄວາມເປັນເອກະພາບ, ສາມາດຈັດຕັ້ງປະຕິບັດໄດ້ ຢ່າງມີປະສິດທິພາບ ແລະ ປະສິດທິຜົນສູງ.

ຕອນທ້າຍຂອງກອງປະຊຸມໃນຄັ້ງນີ້ ທ່ານ ປະທານສະພາປະຊາຊົນແຂວງຄໍາມ່ວນ ໄດ້ມີຄໍາເຫັນໂອ້ລົມກອງປະຊຸມສຳມະນາ ຄັ້ງນີ້ ບັນດາທ່ານຜູ້ແທນ ແລະ ເສນາທິການຂອງສະພາປະຊາຊົນແຂວງຄໍາມ່ວນ ທີ່ເຂົ້າຮ່ວມກອງປະຊຸມຍົກສູງຂີດຄວາມສາມາດຈະນຳເອົາເນື້ອໃນບົດຮຽນ ແລະ ທັກສະຄັ້ງນີ້ນຳໄປຈັດຕັ້ງປະຕິບັດໜ້າທີ່ວຽກງານຕາມພາລະບົດບາດຂອງຕົນ ໃຫ້ມີປະສິດທິພາບ ແລະ ປະສິດທິຜົນສູງຂຶ້ນກ່ວາເກົ່າ.

ໃນໂອກາດດຽວກັນ ທ່ານ ຍັງໄດ້ສະແດງຄວາມຊົມເຊີຍ ແລະ ຂອບໃຈຕໍ່ຜູ້ໃຫ້ທຶນຈັດກອງປະຊຸມໃນເທື່ອນີ້ ເຊິ່ງໄດ້ຮັບການສະໜັບສະໜູນໂດຍ: ຈາກມູນນິທິເວສມິນສເຕີ ເພື່ອປະຊາທິປະໄຕ ( WFD ).

ໂດຍ: ເອື້ອ ມະໂນສິງ