(ສພຊ) ໃນລະຫວ່າງວັນທີ 23-26 ພະຈິກ 2023, ຄະນະຜູ້ແທນຂັ້ນສູງຂອງສະພາແຫ່ງຊາດລາວ ນໍາໂດຍທ່ານ ສົມມາດ ພົລເສນາ ຮອງປະທານສະພາແຫ່ງຊາດ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມປະຈຳປີເວທີປຶກສາຫາລືລັດຖະສະພາອາຊີ-ປາຊີຟິກ (APPF) ຄັ້ງທີ 31 ທີ່ ມານີລາ, ສາທາລະນະລັດ ຟີລິບປິນ. ກອງປະຊຸມຄັ້ງນີ້, ຈັດຂຶ້ນພາຍໃຕ້ຄໍາຂວັນ: “ການເປັນຄູ່ຮ່ວມມືທີ່ເຂັ້ມແຂງ ເພື່ອສັນຕິພາບ, ຄວາມຈະເລີນຮຸ່ງເຮືອງ ແລະ ຄວາມຍືນຍົງ” ໂດຍການເປັນປະທານຮ່ວມຂອງທ່ານ ຢວານ ມິເຄວ ເອັບ ຊູບີຣີ ປະທານວຸດທິສະພາຟິລິບປິນ ແລະ ທ່ານ ເຟີດິແນນ ມາຕິນ ຈີ ໂຣມູອານເດດ, ປະທານສະພາຜູ້ແທນຣາຊະດອນຟີລິບປິນ. ມີຄະນະຜູ້ແທນຈາກລັດຖະສະພາ 19 ປະເທດ. ພ້ອມນັ້ນ ຍັງມີບັນດາຕາງໜ້າຈາກອົງການຈັດຕັ້ງສາກົນ ແລະ ແຂກທີ່ຖືກເຊີນຂອງປະເທດເຈົ້າພາບ ເຂົ້າຮ່ວມຫຼາຍກວ່າ 259 ຄົນ.
ກອງປະຊຸມປະຈໍາຄັ້ງນີ້, ຄະນະຜູ້ແທນໄດ້ລົງເລິກປຶກສາຫາລື, ແລກປ່ຽນຄໍາຄິດຄໍາເຫັນ ເຊິ່ງກັນ ແລະ ກັນ ແລະ ຄົ້ນ ຄວ້າພິຈາລະນາຮ່າງມະຕິທັງໝົດ 37 ສະບັບ ທີ່ລັດຖະສະພາສະມາຊິກ APPF ສະເໜີຕໍ່ກອງປະຊຸມຄະນະກຳມະການຂົງເຂດວຽກງານຕ່າງໆເຊັ່ນ: ການເມືອງ ແລະ ຄວາມໝັ້ນຄົງ, ເສດຖະກິດ ແລະ ການຄ້າ, ການຮ່ວມມືໃນພາກພື້ນອາຊີ-ປາຊີຟິກ ແລະ ວຽກງານສະມາຊິກລັດຖະສະພາເພດຍິງ ເພື່ອສ້າງຄວາມເຂັ້ມແຂງໃຫ້ແກ່ລັດຖະສະພາໃນການສົ່ງເສີມສັນຕິພາບ ແລະ ສະຖຽນລະພາບ, ເພີ່ມທະວີການຮ່ວມມືດ້ານຄວາມປອດໄພທາງທະເລ ໃນອາຊີ-ປາຊີຟິກ, ຕ້ານອາດຊະຍາກຳຂ້າມຊາດ, ຄວາມສະເໝີພາບຍິງ-ຊາຍ, ການເປັນຜູ້ນຳ ແລະ ການມີສ່ວນຮ່ວມຂອງແມ່ຍິງ, ການພັດທະນາຊັບສິນທາງມະນຸດ ແລະ ອື່ນໆ.
ໃນກອງປະຊຸມ APPF ຄັ້ງທີ 31, ທ່ານ ສົມມາດ ພົລເສນາ ຮອງປະທານສະພາແຫ່ງຊາດ, ຫົວໜ້າຄະນະຜູ້ແທນລາວ ໄດ້ມີຄຳເຫັນຕໍ່ກອງປະຊຸມວຽກງານການເມືອງ ແລະ ຄວາມໝັ້ນຄົງ ພາຍໃຕ້ຫົວຂໍ້: “ການສ້າງຄວາມເຂັ້ມແຂງໃຫ້ແກ່ລັດຖະສະພາ ເພື່ອສົ່ງເສີມສັນຕິພາບ ແລະ ສະຖຽນລະພາບ”, ໂດຍທ່ານໄດ້ຍົກໃຫ້ເຫັນສິ່ງທ້າທາຍ ທີ່ພາກພື້ນອາຊີ-ປາຊີຟິກ ກຳລັງປະເຊີນຢູ່ ໂດຍສະເພາະແມ່ນການປ່ຽນແປງທາງດ້ານພູມສາດ-ຍຸດທະສາດ ແລະ ພູມສາດເສດຖະກິດ, ອາດຊະຍາກຳຂ້າມຊາດ, ບັນຫາເສດຖະກິດ, ໄພເງິນເຟີ້ ແລະ ການເພີ່ມຂຶ້ນຂອງລາຄາອາຫານ ແລະ ພະລັງງານ ເຊິ່ງໄດ້ສົ່ງຜົນກະທົບໂດຍກົງຕໍ່ຊີວິດການເປັນຢູ່ຂອງປະຊາຊົນ, ການພັດທະນາເສດຖະກິດ-ສັງຄົມ. ທ່ານໄດ້ຍົກໃຫ້ເຫັນເຖິງຄວາມສຳຄັນໃນການຮ່ວມມືລະດັບພາກພື້ນ ແລະ ທົ່ວໂລກ ໃນການປົກປັກຮັກສາສັນຕິພາບ, ສະຖຽນລະພາບ ແລະ ຄວາມໝັ້ນຄົງຂອງພາກພື້ນ ກໍຄືໃນໂລກ ເຊິ່ງ APPF ໄດ້ມີບົດບາດສຳຄັນ ໃນການປະກອບສ່ວນແກ້ໄຂບັນຫາດັ່ງກ່າວ ດ້ວຍການສົ່ງເສີມການປຶກສາຫາລື ແລະ ແລກປ່ຽນທັດສະນະເຊິ່ງກັນ ແລະ ກັນ ຕາມບົດບາດຂອງອົງການນິຕິບັນຍັດ. ພ້ອມນັ້ນ, ທ່ານຍັງໄດ້ຍົກໃຫ້ເຫັນເຖິງການດຳເນີນນະໂຍບາຍການຕ່າງປະເທດ ຂອງ ສປປລາວ ແລະ ການປະຕິບັດພາລະບົດບາດຂອງສະພາແຫ່ງຊາດລາວ ໃນການສ້າງ ແລະ ປັບປຸງກົດໝາຍ ໃຫ້ມີຄວາມສອດຄ່ອງກັບສະພາບການພາຍໃນ ແລະ ສົນທິສັນຍາສາກົນທີ່ ສປປລາວ ເປັນພາຄີ. ພ້ອມນັ້ນ, ທ່ານຮອງປະທານສະພາ ຍັງໄດ້ຮຽກຮ້ອງໃຫ້ລັດຖະສະພາສະມາຊິກ APPF ຈົ່ງພ້ອມກັນເພີ່ມທະວີ ແລະ ຊຸກຍູ້ສົ່ງເສີມການສ້າງຄວາມສາມັກຄີປອງດອງ, ຍົກສູງການຮ່ວມມືແບບພະຫຸພາຄີ, ສົ່ງເສີມການແກ້ໄຂຂໍ້ຂັດແຍ່ງຕ່າງໆຢ່າງສັນຕິວິທີ ໂດຍຜ່ານການເຈລະຈາ, ຍຶດໝັ້ນຫຼັກການ ແລະ ລະບຽບການສາກົນ. ໃນຕອນທ້າຍ ທ່ານຍັງໄດ້ແຈ້ງໃຫ້ບັນດາຄະນະຜູ້ແທນທີ່ເຂົ້າຮ່ວມກອງປະຊຸມຊາບ ແລະ ໃຫ້ການສະໜັບສະໜູນການເປັນປະທານອາຊຽນ ຂອງ ສປປລາວ ກໍຄື ການເປັນປະທານສະມັດຊາລັດຖະສະພາລະຫວ່າງຊາດອາຊຽນ (AIPA) ຂອງສະພາແຫ່ງຊາດລາວ ໃນປີ 2024.
ໃນພິທີປິດກອງປະຊຸມ, ຫົວໜ້າຄະນະຜູ້ແທນ ໄດ້ຮ່ວມກັນລົງນາມໃນຖະແຫຼງການຮ່ວມຂອງກອງປະຊຸມ APPF ຄັ້ງທີ 31 ແລະ ໄດ້ຮັບຮອງເອົາມະຕິຕາມຂົງເຂດວຽກງານຕ່າງໆ ຈໍານວນ 10 ສະບັບ ທີ່ເປັນຜົນຂອງການປຶກສາຫາລື.
ໃນການເຂົ້າຮ່ວມກອງປະຊຸມຄັ້ງນີ້, ຄະນະຜູ້ແທນສະພາແຫ່ງຊາດລາວ ຍັງໄດ້ຖືໂອກາດພົບປະສອງຝ່າຍ ກັບຄະນະຜູ້ແທນລັດຖະສະພາເພື່ອນມິດຕ່າງໆເຊັ່ນ: ສສ.ຫວຽດນາມ, ສປຈີນ, ກຳປູເຈຍ ແລະ ໄທ ເຊິ່ງໄດ້ປຶກສາຫາລືກັນກ່ຽວກັບການເສີມຂະຫຍາຍສາຍພົວພັນຮ່ວມມື, ການສະໜັບສະໜູນເຊິ່ງກັນ ແລະ ກັນ ລະຫວ່າງອົງການນິຕິບັນຍັດ. ນອກຈາກນັ້ນ, ຄະນະຜູ້ແທນສະພາແຫ່ງຊາດລາວ ຍັງໄດ້ຢ້ຽມຊົມຫໍພິພິທະພັນແຫ່ງຊາດຟີລິບປິນ ແລະ ຢ້ຽມຊົມອາຄານລັດຖະສະພາຂອງປະເທດຟີລິບປິນ ອີກດ້ວຍ.