(ສພຊ) ເນື່ອງໃນໂອກາດທີ່ເຂົ້າຮ່ວມກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX ໃນລະຫວ່າງວັນທີ 31 ຕຸລາ ຫາ 21 ພະຈິກ 2023 ຂອງບັນດາທ່ານສະມາຊິກສະພາແຫ່ງຊາດ ໃນວັນເສົາທີ 11 ພະຈິກຜ່ານມາ, ບັນດາທ່ານສະມາຊິກສະພາແຫ່ງຊາດ ຕາງໜ້າແຕ່ລະເຂດເລືອກຕັ້ງ ນຳໂດຍທ່ານ ສົມມາດ ພົລເສນາ ຮອງປະທານສະພາແຫ່ງຊາດ ໄດ້ຢ້ຽມຢາມເຂດພັດທະນາກວມລວມໄຊເສດຖາ ນະຄອນຫຼວງວຽງຈັນ ໂດຍການຕ້ອນຮັບຂອງທ່ານ ຊົງຈູນ ຜູ້ອໍານວຍການບໍລິສັດຮ່ວມທຶນລາວ-ຈີນຈໍາກັດ ພ້ອມດ້ວຍຄະນະ.

ໂອກາດດັ່ງກ່າວ ຄະນະຜູ້ແທນ ໄດ້ຮັບຟັງການລາຍງານສະພາບການພັດທະນາເຂດໂດຍຫຍໍ້ ຈາກທ່ານ ຂຽງຄໍາ ພຸດຈັນທະວົງສາ ຮອງອໍານວຍການບໍລິສັດ ຮ່ວມທຶນລາວ-ຈີນ ຈໍາກັດ; ຮັບຊົມວິດີໂອແຜນຄວາມຄືບໜ້າຂອງເຂດ ແລກປ່ຽນແບບເປີດກວ້າງ; ຮັບຟັງຄໍາເຫັນໂອ້ລົມຈາກທ່ານ ຮອງປະທານສະພາແຫ່ງຊາດ. ຫຼັງຈາກນັ້ນ, ຄະນະ ຍັງໄດ້ຢ້ຽມຊົມເຂດ ແລະ ຢ້ຽມຢາມ ບໍລິສັດ ຈົ່ງຫຼຸ້ນໂຊລາເຊລ ໃນເຂດພັດທະນາ.

(ພາບ ແລະ ຂ່າວ: ສອນສັກ ວັນວິໄຊ)