(ສພຊ) ໃນວັນທີ 14 ພະຈິກ 2023 ທີ່ສະພາແຫ່ງຊາດ, ທ່ານ ຮສ. ປອ. ລິນຄຳ ດວງສະຫວັນ ປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ ໄດ້ຕ້ອນຮັບການເຂົ້າຢ້ຽມຂ່ຳນັບຂອງທ່ານ Sudesh Maniar ເອກອັກຄະລັດຖະທູດ ແຫ່ງ ສາທາລະນະລັດ ສິງກະໂປ ປະຈໍາ ສປປລາວ ໃນໂອກາດມາດຳລົງຕຳແໜ່ງເປັນເອກອັກຄະລັດຖະທູດ ຄົນໃໝ່.

ໂອກາດນີ້, ທ່ານ ຮສ. ປອ. ລິນຄຳ ດວງສະຫວັນ ກໍໄດ້ກ່າວສະແດງຄວາມຕ້ອນຮັບຢ່າງອົບອຸ່ນ ພ້ອມຕີລາຄາສູງໃນການພົບປະຄັ້ງນີ້ ເຊິ່ງຈະເປັນໂອກາດດີທີ່ຈະໄດ້ປຶກສາຫາລື ກ່ຽວກັບການຊຸກຍູ້ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສປປລາວ ແລະ ສ. ສິງກະໂປ ກໍຄື ລະຫວ່າງ ສອງອົງການນິຕິບັນຍັດ ໃຫ້ໄດ້ຮັບການພັດທະນາ ແລະ ຂະຫຍາຍຕົວຍິ່ງໆຂຶ້ນ ເຊິ່ງທ່ານໄດ້ລາຍງານຫຍໍ້ ກ່ຽວກັບພາລະບົດບາດຂອງກຳມາທິການ ເຊິ່ງເຮັດໜ້າທີ່ເປັນເສນາທິການ ໃຫ້ແກ່ສະພາແຫ່ງຊາດ ແລະ ຄະນະປະຈຳສະພາແຫ່ງຊາດ ໃນການສ້າງ, ປັບປຸງກົດໝາຍ ແລະ ນິຕິກຳໃຕ້ກົດໝາຍ, ຕິດຕາມກວດກາການຈັດຕັ້ງປະຕິບັດລັດຖະທຳມະນູນ, ກົດໝາຍ ແລະ ມະຕິ ຂອງສະພາແຫ່ງຊາດ, ແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ໃນຂົງເຂດວຽກງານເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ເຊິ່ງກວມເອົາ 6 ກະຊວງຄື: ກະຊວງກະສິກຳ ແລະ ປ່າໄມ້, ກະຊວງອຸດສາຫະກຳ ແລະ ການຄ້າ, ກະຊວງໂຍທາທິການ ແລະ ຂົນສົ່ງ, ກະຊວງເຕັກໂນໂລຊີ ແລະ ການສື່ສານ, ກະຊວງພະລັງງານ ແລະ ບໍ່ແຮ່ ແລະ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ລວມທັງເຂດເສດຖະກິດພິເສດ. ທ່ານຍັງໃຫ້ຮູ້ຕື່ມວ່າໃນປີ 2024 ສປປລາວ ຈະເປັນປະທານອາຊຽນ ແລະ ສະພາແຫ່ງຊາດລາວ ເປັນເຈົ້າພາບຈັດກອງປະຊຸມໃຫຍ່ສະມັດຊາລັດຖະສະພາ ລະຫວ່າງຊາດອາຊຽນ ຄັ້ງທີ 45 (AIPA-45) ແລະ ຫວັງຢ່າງຍິ່ງວ່າ ສິງກະໂປ ຈະໃຫ້ການສະໜັບສະໜູນ ໃຫ້ ສປປລາວ ເຮັດສໍາເລັດໜ້າທີ່ດັ່ງກ່າວ. ພ້ອມນັ້ນ, ທ່ານຍັງໄດ້ອວຍພອນໄຊອັນປະເສີດມາຍັງທ່ານ ເອກອັກຄະລັດຖະທູດ ຄົນໃໝ່ ພ້ອມດ້ວຍຄະນະ ຈົ່ງມີສຸຂະພາບແຂງແຮງ, ມີຄວາມຜາສຸກ ແລະ ປະສົບຜົນສຳເລັດໃນການປະຕິບັດໜ້າທີ່ວຽກງານອັນມີກຽດສະຫງ່າ.

ຈາກນັ້ນ, ທ່ານ Sudesh Maniar ກໍໄດ້ກ່າວສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ພ້ອມທັງສະ ແດງຄວາມຊົມເຊີຍຕໍ່ການພົວພັນຮ່ວມມືລະຫວ່າງສອງຊາດ ກໍຄືການຮ່ວມມືລະຫວ່າງ ສອງອົງການນິຕິບັນຍັດ ສິງກະໂປ-ລາວ ທີ່ນັບມື້ເຕີບໃຫ່ຍເຂັ້ມແຂງ, ຍືນຍົງ ແລະ ໄດ້ຮັບຜົນສຳເລັດໃນຫຼາຍດ້ານ ແລະ ຍັງໄດ້ໃຫ້ຄຳໝັ້ນສັນຍາວ່າຈະຕັ້ງໜ້າປະຕິບັດໜ້າທີ່ຂອງຕົນໃນໄລຍະທີ່ປະຈຳຢູ່ ສປປລາວ ຢ່າງເຕັມທີ່ ເພື່ອນຳເອົາຜົນປະໂຫຍດສູງສຸດມາສູ່ສອງປະເທດ ກໍຄືປະຊາຊົນສອງຊາດລາວ-ສິງກະໂປ.