ຕອນບ່າຍຂອງວັນຈັນ, ວັນທີ 6 ພະຈິກ 2023, ຢູ່ທີ່ຫ້ອງປະຊຸມສະພາປະຊາຊົນແຂວງ ກໍາມະບານຮາກຖານສະພາປະຊາຊົນແຂວງ ໄດ້ຮ່ວມຊີວິດປະຈໍາເດືອນ 9-10 ປີ 2023, ໂດຍການເປັນປະທານຂອງສະຫາຍ ທະນາກອນ ເຍມະນີ ຄະນະກຳມະບານຮາກຖານສະພາປະຊາຊົນແຂວງ, ມີສະຫາຍ ນາງ ວັນສີ ພວງມະໄລ ຮອງເລຂາໜ່ວຍພັກສະພາປະຊາຊົນແຂວງ, ຄະນະກຳມະບານ ແລະ ສະມາຊິກກໍາມະບານພາຍໃນຮາກຖານສະພາປະຊາຊົນແຂວງເຂົ້າຮ່ວມຢ່າງພ້ອມພຽງ.

ຈຸດປະສົງ, ເພື່ອເປັນການຈັດຕັ້ງປະຕິບັດຕາມກົດລະບຽບຂອງສະຫະພັນກໍາມະບານລາວ ແລະ ເພື່ອເປັນການສະຫຼຸບຕີລາຄາການນໍາພາຈັດຕັ້ງປະຕິບັດວຽກງານ ຂອງຄະນະກໍາມະບານຮາກຖານສະພາປະຊາຊົນແຂວງ, ຄະນະຮັບຜິດຊອບໄດ້ຕາງໜ້າຄະນະກໍາມະບານຜ່ານຮ່າງບົດສະຫຼຸບປະຈໍາເດືອນ 9-10 ປີ 2023 ແລະ ທິດທາງແຜນການປະຈໍາ ເດືອນ 11 ປີ 2023 ຂອງກໍາມະບານຮາກຖານສະພາປະຊາຊົນແຂວງ ແລະ ສະຫາຍ ທະນາກອນ ເຍມະນີ ຄະນະກຳມະບານຮາກຖານສະພາປະຊາຊົນແຂວງ ໄດ້ຜ່ານຮ່າງບົດປະເມີນການຈັດຕັ້ງປະຕິບັດ ຂໍ້ແຂ່ງຂັນ 5 ເປັນເຈົ້າ ປະຈໍາປີ 2023 ແລະ ທິດທາງແຜນການປະຈໍາປີ 2024.

ຫຼັງຈາກນັ້ນ, ບັນດາສະຫາຍສະມາຊິກກຳມະບານ ໄດ້ປະກອບຄໍາຄິດຄໍາເຫັນໃສ່ 2 ຮ່າງບົດສະຫຼຸບດັ່ງກ່າວຢ່າງກົງໄປກົງມາ, ເພື່ອເຮັດໃຫ້ມີເນື້ອໃນຄົບຖ້ວມສົມບູນ, ຖືກຕ້ອງສອດຄອງຕາມກົດລະບຽບຂອງສະຫະພັນກໍາມະບານລາວ, ສາມາດນໍາເອົາທິດທາງແຜນການໄປຈັດຕັ້ງຜັນຂະຫຍາຍໃຫ້ປະກົດຜົນເປັນຈິງ ແລະ ສາມາດເປີດກອງປະຊຸມສະຫຼຸບ ການປະເມີນການຈັດຕັ້ງປະຕິບັດ ຂໍ້ແຂ່ງຂັນ 5 ເປັນເຈົ້າ ປະຈໍາປີ 2023 ໃຫ້ທັນກັບເວລາ.