ຕອນເຊົ້າຂອງວັນທີ 9 ພະຈິກ 2023 ນີ້ ສະພາປະຊາຊົນແຂວງຫຼວງນໍ້າທາ ໄດ້ຈັດກິດຈະກຳຮ່ວມໃຈກັນບໍລິຈາກເລືອດໂດຍບໍ່ຮຽກຮ້ອງສິ່ງຕອບແທນ ຂຶ້ນທີ່ຫ້ອງປະຊຸມຂອງສະພາປະຊາຊົນແຂວງ ຫຼວງນໍ້າທາ ໂດຍການເປັນປະທານຮ່ວມຂອງ ທ່ານ ພັທ ບຸນສົມ ທຳມະວົງ ສະມາຊິກສະພາປະຊາຊົນແຂວງ, ຮອງປະທານຄະນະກຳມະການຍຸຕິທຳ ປກຊ-ປກສ ສະພາປະຊາຊົນແຂວງ ແລະ ທ່ານ ນາງ ພັດຊະນະ ບາສີ ຮອງຫົວໜ້າອົງການກາແດງແຂວງ ມີຄະນະເລຂາທິການ, ຫົວໜ້າ, ຮອງຂະແໜງ  ແລະ ພະນັກງານວິຊາການພາຍໃນສະພາປະຊາຊົນແຂວງ ເຂົ້າຮ່ວມຢ່າງພ້ອມພຽງ.

ໃນພິທີຜູ້ຕາງໜ້າຈາກອົງການກາແດງ ປະຈຳແຂວງຫຼວງນ້ຳທາ ໄດ້ຂຶ້ນກ່າວຈຸດປະສົງໃນການຈັດກິດຈະກຳຄັ້ງນີ້ ພ້ອມທັງໂຄສະນາປຸກລະດົມຈິດໃຈພະນັກງານລັດຖະກອນທຸກທ່ານທີ່ເຂົ້າຮ່ວມກິດຈະກຳຄັ້ງນີ້ ຈົ່ງພ້ອມໃຈກັນບໍລິຈາກເລືອດເພື່ອເປັນການຊ່ວຍເຫຼືອສັງຄົມ, ຜ່ານມາດຖານເງື່ອນໄຂຂອງຜູ້ທີ່ຈະບໍລິຈາກເລືອດ ແລະ ສິດທີ່ຜູ້ບໍລິຈາກເລືອດທີ່ຈະໄດ້ຮັບ, ທັງນີ້ ສູນບໍລິຈາກເລືອດກໍໄດ້ຖືເອົາວຽກງານການປຸກລະດົມບໍລິຈາກເລືອດແບບສະໝັກໃຈ ບໍ່ຮຽກຮ້ອງສິ່ງຕອບແທນ ເປັນບູລິມະສິດສຳຄັນອັນໜຶ່ງ ໂດຍມີການຈັດຕັ້ງເຄື່ອນໄຫວຂົນຂວາຍຜູ້ບໍລິຈາກເລືອດດ້ວຍຫຼາຍຮູບການ ແລະ ຈັດຕັ້ງເຄື່ອນໄຫວຮັບບໍລິຈາກເລືອດຮ່ວມກັບການຈັດຕັ້ງ ແລະ ຊຸມຊົນຕ່າງໆຈຳນວນໜຶ່ງ ແຕ່ເລືອດທີ່ໄດ້ມານັ້ນຍັງບໍ່ພຽງພໍ ສາເຫດຕົ້ນຕໍກໍຍ້ອນວ່າຈຳນວນຜູ້ບໍລິຈາກເລືອດ ຍັງມີຈຳກັດ ຫຼາຍຄົນຍັງຢ້ານກົວຕໍ່ການບໍລິຈາກເລືອດ ແລະ ອື່ນໆ.

ໃນໂອກາດດັ່ງກ່າວ ທ່ານ ພັທ ບຸນສົມ ທຳມະວົງ ສະມາຊິກສະພາປະຊາຊົນແຂວງ, ຮອງປະທານຄະນະກຳມະການຍຸຕິທຳ ປກຊ-ປກສ ສະພາປະຊາຊົນແຂວງ, ກໍໄດ້ຍົກໃຫ້ເຫັນເຖິງບົດບາດ ຄວາມສຳຄັນຂອງການບໍລິຈາກເລືອດ ເຊິ່ງເປັນການເສຍສະຫລະຊ່ວຍເຫຼືອສັງຄົມເພື່ອນມະນຸດດ້ວຍກັນທີ່ຍັງລໍຄອຍການຊ່ວຍເຫລືອ, ທັງຊຸກຍູ້, ປຸກລະດົມ ພະນັກງານລັດຖະກອນພາຍໃນສະພາປະຊາຊົນແຂວງໃຫ້ພ້ອມໃຈກັນບໍລິຈາກເລືອດເພື່ອຊ່ວຍເຫລືອສັງຄົມ.

ໃນການຈັດກິດຈະກຳບໍລິຈາກເລືອດໂດຍບໍ່ຮຽກຮ້ອງສິ່ງຕອບແທນໃນຄັ້ງນີ້ ມີຜູ້ບໍລິຈາກເລືອດຈໍານວນ 06 ທ່ານ, ໄດ້ຮັບເລືອດທັງໝົດ 6 ຖົງ ແລະ ເລືອດທີ່ໄດ້ຮັບຈາກການບໍລິຈາກໃນຄັ້ງນີ້ແມ່ນຈະນຳໄປຊ່ວຍເຫຼືອຄົນເຈັບທີ່ຕ້ອງການເລືອດ ເພື່ອໃຫ້ເກີດປະໂຫຍດສູງສຸດຕໍ່ສັງຄົມ;   ການບໍລິຈາກເລືອດເປັນສິ່ງທີ່ປະເສີດ, ການບໍລິຈາກເລືອດ ແມ່ນການສ້າງບຸນກຸສົນອັນຍິ່ງໃຫຍ່ຂອງທ່ານ ເພາະວ່າທ່ານໄດ້ຊ່ວຍກອບກູ້ເອົາຊີວິດຂອງຄົນຜູ້ທີ່ກຳລັງຈະສີ້ນຫວັງ ໃຫ້ມີຊີວິດກັບຄືນມາ.

                                                                               ນັກຂ່າວ: ນາງ ວັນນີ ແຝງບົວວັນ