(ສພຊ) ໃນວັນທີ 7 ພະຈິກ 2023 ທີ່ສະພາແຫ່ງຊາດ ນະຄອນຫຼວງວຽງຈັນ, ໄດ້ມີພິທີພົບປະສອງຝ່າຍ ລະຫວ່າງ ທ່ານ ສິງຄຳ ວົງພະຈັນ ຮອງເລຂາທິການສະພາແຫ່ງຊາດ ພ້ອມດ້ວຍຄະນະ ແລະ ທ່ານ ຊ. ບັດບາທາຣ໌ ຮອງເລຂາທິການໃຫຍ່ ສະພາຄູຣານໃຫຍ່ ແຫ່ງ ມົງໂກລີ ພ້ອມດ້ວຍຄະນະ ໃນໂອກາດທີ່ຄະນະຜູ້ແທນຫ້ອງວ່າການສະພາຄູຣານໃຫຍ່ ແຫ່ງ ມົງໂກລີ ໄດ້ເດີນທາງມາຢ້ຽມຢາມ ແລະ ເຮັດວຽກຢູ່ ສປປລາວ ໃນລະຫວ່າງວັນທີ 6-14 ພະຈິກ 2023.

ການພົບປະຄັ້ງນີ້, ສອງຝ່າຍ ໄດ້ພ້ອມກັນປຶກສາຫາລື ກ່ຽວກັບການຈັດຕັ້ງຜັນຂະຫຍາຍ ເນື້ອໃນຂອງບົດບັນທຶກຄວາມເຂົ້າໃຈ ວ່າດ້ວຍການຮ່ວມມື ລະຫວ່າງ ສະພາແຫ່ງຊາດລາວ ແລະ ສະພາຄູຣານໃຫຍ່ມົງໂກລີ ກໍຄືບົດບັນທຶກຊ່ວຍຈຳວ່າດ້ວຍການຮ່ວມມື ລະຫວ່າງ ຄະນະເລຂາທິການສະພາແຫ່ງຊາດລາວ ແລະ ຫ້ອງວ່າການສະພາຄູຣານໃຫຍ່ມົງໂກລີ ໃຫ້ເກີດໝາກຜົນຕົວຈິງ. ພ້ອມກັນນັ້ນ, ທັງສອງຝ່າຍຍັງໄດ້ແລກປ່ຽນຂໍ້ມູນຂ່າວສານ ກ່ຽວກັບກົງຈັກການຈັດຕັ້ງຂອງ ສະພາແຫ່ງຊາດລາວ ແລະ ສະພາຄູຣານໃຫຍ່ມົງໂກລີ ລວມທັງກົງຈັກການຈັດຕັ້ງຂອງ ຄະນະເລຂາທິການສະພາແຫ່ງຊາດລາວ ແລະ ຫ້ອງວ່າການສະພາຄູຣານໃຫຍ່ມົງໂກລີ, ປຶກສາຫາລື ກ່ຽວກັບທິດທາງແຜນການຮ່ວມມືໃນຕໍ່ໜ້າ ເພື່ອເປັນການປະກອບສ່ວນອັນສໍາຄັນ ໃນການເສີມສ້າງສາຍພົວພັນມິດຕະພາບ ແລະ ການຮ່ວມມື ອັນເປັນມູນເຊື້ອທີ່ດີ ລະຫວ່າງ ລາວ-ມົງໂກລີ ກໍຄືການພົວພັນຮ່ວມມື ລະຫວ່າງ ສອງອົງການນິຕິບັນຍັດ ເວົ້າລວມ, ເວົ້າສະເພາະ ການພົວພັນຮ່ວມມື ລະຫວ່າງ ຄະນະເລຂາທິການສະພາແຫ່ງຊາດລາວ ແລະ ຫ້ອງວ່າການສະພາຄູຣານໃຫຍ່ ໃຫ້ນັບມື້ນັບຂະຫຍາຍຕົວຍິ່ງໆຂຶ້ນ.

ຝ່າຍລາວ, ໄດ້ຕີລາຄາສູງຕໍ່ການມາຢ້ຽມຢາມ ແລະ ເຮັດວຽກ ຢູ່ ສປປລາວ ຂອງຄະນະຜູ້ແທນຫ້ອງວ່າການສະພາຄູຣານໃຫຍ່ມົງໂກລີ ໃນຄັ້ງນີ້ ເຊິ່ງແມ່ນການສືບຕໍ່ການຈັດຕັ້ງປະຕິບັດຜົນສຳເລັດຂອງການຢ້ຽມຢາມ ແລະ ເຮັດວຽກ ຂອງຄະນະຜູ້ແທນຂັ້ນສູງຂອງສະພາແຫ່ງຊາດ ແຫ່ງ ສປປລາວ ຢູ່ປະເທດມົງໂກລີ ໃນເດືອນກັນຍາຜ່ານມາ. ນອກຈາກນີ້, ຄະນະຜູ້ແທນຫ້ອງວ່າການ ສະພາຄູລານໃຫຍ່ມົງໂກລີ ຍັງໄດ້ນຳເອົາຜ້າພົມທີ່ມີຄວາມສວຍງາມ ເຊິ່ງເປັນຜະລິດຕະພັນຂອງປະເທດມົງໂກລີ ມາມອບເປັນຂອງຂວັນໃຫ້ແກ່ສະພາແຫ່ງຊາດລາວ ເຊິ່ງເປັນສັນຍາລັກແຫ່ງການພົວພັນຮ່ວມມື ລະຫວ່າງ ສອງປະເທດ ກໍຄືສອງອົງການນິຕິບັນຍັດ.