ເພື່ອກະກຽມໃຫ້ມີຄວາມພ້ອມຮອບດ້ານ ໃສ່ກອງປະຊຸມສະໄໝສາມັນ ເທື່ອທີ 06 ຂອງສະພາປະຊາຊົນແຂວງ ຊຸດທີ II ໃນຕອນເຊົ້າວັນທີ 08 ພະຈິກ 2023 ທີ່ຫ້ອງປະຊຸມສະພາປະຊາຊົນແຂວງສະຫວັນນະເຂດ ໄດ້ຈັດກອງປະຊຸມປຶກສາຫາລືໂດຍ ການເປັນປະທານຂອງ ທ່ານ ນາງ ພູທອນ ແກ້ວພູວົງ ຮອງປະທານ ສະພາປະຊາຊົນແຂວງ, ບັນດາທ່ານໃນຄະນະປະຈຳສະພາປະຊາຊົນແຂວງ ພ້ອມດ້ວຍບັນດາທ່ານ ຮອງປະທານຄະນະກຳມະການ, ຮອງເລຂາທິການ, ມີຫົວໜ້າ, ຮອງຫົວໜ້າຂະແໝງ ພ້ອມທັງ ພະນັກງານ-ວິຊາການ ທີ່ກ່ຽວຂ້ອງເຂົ້າຮ່ວມ. 
ກອງປະຊຸມໄດ້ຮັບຟັງການລາຍງານສະພາບການກະກຽມຄວາມພ້ອມຈາກ 03 ຄະນະກໍາມະການ ແລະ ຄະນະເລຂາທິການ, ປຶກສາຫາລື ກ່ຽວກັບແຜນການເຄື່ອນໄຫວ ຕິດຕາມກວດກາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈໍາປີ 2023 ຂອງສະພາປະຊາຊົນແຂວງ ຈາກຄະນະຮັບຜິດຊອບໂຄງການ, ພ້ອມນີ້ກໍ່ໄດ້ປຶກສາຫາລື ກ່ຽວກັບການວັນເວລາທີ່ຈະເປີດກອງປະຊຸມຮ່ວມກັບອົງການປົກຄອງແຂວງຕື່ມອີກ.
ຈາກນັ້ນ ປະທານກອງປະຊຸມກໍ່ໄດ້ມີຄໍາເຫັນແລກປ່ຽນຕໍ່ກອງປະຊຸມ ພ້ອມທັງເປີດໂອກາດໃຫ້ບັນດາທ່ານທີ່ເຂົ້າຮ່ວມກອງປະຊຸມປະກອບຄໍາຄິດຄໍາເຫັນ, ແລກປ່ຽນເຊິ່ງກັນແລະ ກັນ ເພື່ອໃຫ້ກອງປະຊຸມດັ່ງກ່າວປະສົບຜົນສໍາເລັດຢ່າງຈົບງາມ.