ສະພາປະຊາຊົນແຂວງຫລວງນ້ຳທາ ສ້າງຂະບວນການອອກແຮງງານລວມຕ້ອນຮັບຜ້າກະຖິນພະຣາຊະທານຂອງ ເຈົ້າຊີວິດແຫ່ງຣາຊາອານາຈັກໄທ  ໃນຕອນເຊົ້າວັນທີ 7 ພະຈິກ 2023 ເຂົ້າຮ່ວມຂະບວນການອອກແຮງງານຄັ້ງນີ້ມີສະມາຊິກສະພາປະຊາຊົນແຂວງ, ຄະນະເລຂາທິການສະພາປະຊາຊົນແຂວງ, ຫົວໜ້າ, ຮອງຫົວໜ້າຂະແໜງ ພ້ອມດ້ວຍພະນັກງານວິຊາການພາຍໃນສະພາປະຊາຊົນແຂວງເຂົ້າຮ່ວມຢ່າງພ້ອມພຽງ.

ຊຶ່ງການສ້າງຂະບວນການອອກແຮງງານລວມຄັ້ງນີ້ແມ່ນໄດ້ອານາໄມເກັບຂີ້ເຫຍື້ອຕາມເສັ້ນທາງເລີ່ມແຕ່ສີ່ແຍກຕະຫລາດອຸດສາຫະກຳແຂວງຫລວງນ້ຳທາ ຫາ ສີ່ແຍກໄຟແດງບ້ານຫົວຂົວ ແລະ ຖາງຫຍ້າ, ອານາໄມອາຄານ, ຂອບເຂດຄວາມຮັບຜິດຊອບຂອງຕົນ ທັງນີ້ກໍເພື່ອເປັນການຕ້ອນຮັບນັກທ່ອງທ່ຽວທັງພາຍໃນ ແລະ ຕ່າງປະເທດທີ່ມາທ່ຽວງານບຸນຜ້າກະຖິນພະຣາຊະທານຂອງ ເຈົ້າຊີວິດແຫ່ງຣາຊາອານາຈັກໄທ ທີ່ຈະມາທອດຖວາຍ ຢູ່ວັດສາມັກຄີໄຊ ແຂວງຫລວງນ້ຳທາ ທີ່ໄດ້ຈັດຂື້ນໃນວັນທີ 6 – 12 ພະຈິກ 2023 ນີ້ ແລະ ເພື່ອຄວາມເປັນລະບຽບສະອາດງາມຕາ ພ້ອມທັງ ເປັນການຜູກແໜ້ນຄວາມສາມັກຄີພາຍນອກພາຍໃນໃຫ້ແໜ້ນແຟ້ນກວ່້າເກົ່າ.