(ສພຊ) ໃນຕອນເຊົ້າວັນທີ 6 ພະຈິກ 2023 ທີ່ຫໍສະພາແຫ່ງຊາດ ນະຄອນຫຼວງວຽງຈັນ, ໄດ້ຈັດ ກອງປະຊຸມປຶກສາຫາລືການກະກຽມຄວາມພ້ອມຮອບດ້ານໃນການຕ້ອນຮັບຄະນະຜູ້ບໍລິຫານມະຫາວິທະຍາໄລຈຸລາລົງກອນ ຣາຊະວິທະຍາ ແຫ່ງຣາຊະອານາຈັກໄທ ໂດຍການເປັນປະທານຂອງທ່ານ ດຣ. ນາງ ວິພາວັນ ພົມວິຫານ ປະທານກອງທຶນຊ່ວຍເຫຼືອສັງຄົມສະພາແຫ່ງຊາດ, ເຂົ້າຮ່ວມມີຕາງໜ້າຈາກອົງການພຸດທະສາສະໜາສັມພັນ ແຫ່ງ ສປປລາວ, ຄະນະກອງທຶນ, ກອງເລຂາກອງທຶນ ພ້ອມດ້ວຍພະນັກງານວິຊາການ ໂດຍອີງຕາມຂໍ້ຕົກລົງວ່າດ້ວຍ ການແຕ່ງຕັ້ງຄະນະຮັບຜິດຊອບກະກຽມກອງປະຊຸມປຶກສາຫາລືກ່ຽວກັບບົດບັນທຶກຄວາມເຂົ້າໃຈ ລະຫວ່າງກອງ ທຶນຊ່ວຍເຫຼືອສັງຄົມສະພາແຫ່ງຊາດ ແຫ່ງ ສປປລາວ ກັບມະຫາວິທະຍາໄລຈຸລາລົງກອນ ແຫ່ງ ຣາຊະອານາຈັກໄທ ສະບັບເລກທີ 902/ຄລສ, ລົງວັນທີ 3 ພະຈິກ 2023.

ກອງປະຊຸມ ໄດ້ຜ່ານຂໍ້ຕົກລົງແຕ່ງຕັ້ງຄະນະຮັບຜິດຊອບຮັບຕ້ອນຄະນະມະຫາວິທະຍາໄລຈຸລາລົງກອນ; ຜ່ານແຜນການເຄື່ອນໄຫວຂອງຄະນະມະຫາວິທະຍາໄລຈຸລາລົງກອນ ຢູ່ ສປປລາວ ເຊິ່ງຈະເຄື່ອນໄຫວໃນວັນທີ 9-11 ພະຈິກ 2023 ນີ້. ຫຼັງຈາກນັ້ນ, ກອງປະຊຸມໄດ້ພ້ອມກັນປຶກສາຫາລື ແລະ ເປັນເອກະພາບກັນໃນໜ້າວຽກ ຕ່າງໆ ພ້ອມທັງຮັບຟັງການໃຫ້ທິດຊີ້ນຳຂອງປະທານກອງປະຊຸມ ເພື່ອເຮັດໃຫ້ແຜນການຕ້ອນຮັບຄະນະຜູ້ບໍລິຫານ ມະຫາວິທະຍາໄລຈຸລາລົງກອນຣາຊະວິທະຍາ ແຫ່ງຣາຊະອານາຈັກໄທ ປະສົບຜົນສຳເລັດຕາມລະດັບຄາດໝາຍທີ່ ວາງໄວ້.