(ສພຊ) ໃນວັນທີ 23 ຕຸລາ 2023 ທີ່ຫ້ອງຮັບແຂກສະພາແຫ່ງຊາດ ທ່ານ ສັນຍາ ປຣະເສີດ ປະທານກໍາມາທິການການຕ່າງປະເທດ ສະພາແຫ່ງຊາດ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ນາງ ລໍເຣລ ອີ. ມີລເລີ (Laurel E. Miller) ປະທານມູນນິທິເອເຊຍປະຈໍາ ສ.ອາເມລິກາ ພ້ອມດ້ວຍທີມງານຈາກມູນນິທິເອເຊຍປະຈໍາ ສປປລາວ ເພື່ອປຶກສາຫາລື ແລະ ແລກປ່ຽນຄໍາຄິດຄໍາເຫັນກ່ຽວກັບຜົນສໍາເລັດຂອງການຈັດຕັ້ງປະຕິບັດບັນດາກິດຈະກໍາ ແລະ ໂຄງການ ຢູ່ ສປປລາວ ຂອງມູນນິທິເອເຊຍ ທີ່ໃຫ້ການຊ່ວຍເຫຼືອແກ່ສະພາແຫ່ງຊາດ.

ໂອກາດດັ່ງກ່າວ ທ່ານ ສັນຍາ ປຣະເສີດ ໄດ້ກ່າວສະແດງຄວາມຍິນດີຕ້ອນຮັບ ແລະ ດີໃຈຕໍ່ການເຂົ້າຢ້ຽມຂໍ່ານັບຂອງທ່ານ ນາງ Laurel E. Miller ພ້ອມດ້ວຍຄະນະໃນຄັ້ງນີ້ ພ້ອມທັງແຈ້ງໃຫ້ຮູ້ກ່ຽວກັບສະພາບລວມຂອງສະພາແຫ່ງຊາດ ແລະ ການຊ່ວຍເຫຼືອຕ່າງໆ ຂອງມູນນິທິເອເຊຍ ເປັນຕົ້ນແມ່ນໃຫ້ທຶນການເຝິກອົບຮົມໃຫ້ແກ່ສະມາຊິກສະພາແຫ່ງຊາດ, ຊ່ວຍເຫຼືອທາງດ້ານການແປກົດໝາຍເປັນພາສາຕ່າງປະເທດ ແລະ ທ່ານ ປະທານກໍາມາທິການການຕ່າງປະເທດ ຍັງໄດ້ສະເໜີມູນນິທິເອເຊຍໃຫ້ການຮ່ວມມືສະໜອງຊ່ຽວຊານທາງດ້ານກົດໝາຍ ເພື່ອໃຫ້ຄວາມຮູ້ ແລະ ຂໍ້ມູນໃນການຮ່າງ ແລະ ສ້າງກົດໝາຍ, ຊ່ວຍສ້າງ ແລະ ຊ່ວຍທາງດ້ານເວັບໄຊສະພາແຫ່ງຊາດ ແລະ ຊ່ວຍເຫຼືອທາງດ້ານຕ່າງໆໃຫ້ແກ່ສະພາປະຊາຊົນແຂວງ.

ທ່ານ ນາງ Laurel E. Miller ກໍໄດ້ກ່າວສະແດງຄວາມຂອບໃຈທີ່ທ່ານ ສັນຍາ ປຣະເສີດ ໄດ້ເສຍສະຫຼະເວລາອັນມີຄຸນຄ່າໃຫ້ການຕ້ອນຮັບຢ່າງອົບອຸ່ນ ແລະ ຍິນດີຮັບເອົາຄໍາຄິດຄໍາເຫັນ ແລະ ຂໍ້ສະເໜີຕ່າງໆທີ່ທ່ານ ປະທານກໍາມາທິການການຕ່າງປະເທດ ໄດ້ສະເໜີມານັ້ນ ເພື່ອນໍາເອົາໄປຄົ້ນຄວ້າ ແລະ ເຮັດວຽກຮ່ວມກັບ ເລຂາທິການສະພາແຫ່ງຊາດ ແຫ່ງ ສປປລາວ ຕື່ມອີກ.

(ພາບ ແລະ ຂ່າວ: ສອນສັກ ວັນວິໄຊ)